1 यहोवे यहेजकेलो खे बोलेया, "ओ नाश ऊणे वाल़े माणूंआ, तूँ इस्राएलो रे पाह्ड़ा खे भविष्यबाणी करी की बोल, ओ इस्राएलो रे पाह्ड़ो, यहोवे रा वचन सुणो। 2 परमेशर यहोवा ईंयाँ बोलोआ: तुसा रे दुश्मणे तो तुसा रे बारे दे बोली राखेया, वा! पुराणे बखतो रिया ऊच्चिया जगा एबे म्हारिया ऊईगिया रिया ए।" 3 इजी बजा ते भविष्यबाणी करी की बोल, परमेशर यहोवा ईंयाँ बोलोआ, "नेड़े-तेड़े रे देशे जो तूँ उजाड़ ओर चऊँ कनारे ते तूँ एड़ा निगल़ी ला रा कि तुसे बची रिया जातिया रे कब्जे दे ऊई जाओ ओर बकवासी तुसा रिया गल्ला करोए ओर आम लोक तुसा री निन्दा करोए।" 4 इजी बजा ते, ओ इस्राएलो रे पाह्ड़ो, परमेशर यहोवे रा वचन सुणो, परमेशर यहोवा तुसा खे ईंयाँ बोलोआ, "मतलब पाह्ड़ ओर पाह्ड़िया खे ओर नाल़े ओर तराईया खे ओर उजड़े रे खण्डहर ओर सुनसाण शईरा खे जो चऊँ कनारली बची रिया जातिया ते लूटी गे ओर तिना री आसिया री बजा ऊईगे रे; 5 परमेशर यहोवा ईंयाँ बोलोआ, मैं आपणे रोषो रिया आगी ते पक्का बची री जातिया रे ओर सारे एदोम देशो रे बारे दे बोली राखेया कि जिने मेरा देश आपणे मनो रे पूरे मजे ओर कमण्डो साथे आपणे अक्को रे करी राखेया ताकि से पराया ऊई की लूटी जाओ।" 6 इजी बजा ते इस्राएलो रे देशो रे बारे दे भविष्यबाणी करी की पाह्ड़, पाह्ड़िया, नाल़े ओर तराईया खे बोल, परमेशर यहोवा ईंयाँ बोलोआ, "देखो, तुसे जातिया री निन्दा सयीन करी राखी, इजी बजा ते आऊँ तुसा रे दुश्मणा ते बड़े पारी रोषो दे आई की बोलणे लगी रा।" 7 परमेशर यहोवा ईंयाँ बोलोआ, "आऊँ आथ ऊबे चकी कि कसम खाऊँआ कि तिना देशा छोड़ ई आपणी बेज्जती सयीणी पड़नी।"

8 पर ओ इस्राएलो रे पाह्ड़ो, तुसा पाँदे डाल़िया लगणियां ओर तिना रे फल मेरी इस्राएली प्रजा खे लगणे, कऊँकि सेयो छोड़ ई गुलामिया ते वापस इस्राएलो खे आई जाणे। 9 देखो, आऊँ तुसा साथे ए ओर मां तुसा पाँदे दया करनी ओर तुसे फसला बांदे-लगांदे जाणे। 10 मां तां पाँदे बऊत माणूं, मतलब इस्राएलो रा सारा कराना बसाणा ओर शईर फेर बसणे ओर खण्डहर फेर बणाए जाणे। 11 मां तां पाँदे माणूं ओर डांगर दोनो बऊत जादा बढ़ाणे ओर मां तूँ पुराणे बखतो जेड़ा बसाणा ओर मां तेरी री पईले ते जादा पलाई करनी। तेबे ताखे पता लगी जाणा कि आऊँ ई यहोवा ए। 12 मां तुसे, मतलब मेरी प्रजा इस्राएल लोक, फेर एते देशो दे रणे खे वापस ली आऊणे ओर सेयो तुसा रे मालक ऊणे ओर तुसे तिना रे आपणे इस्से ऊणे ओर तां तिना रे बच्चे अकाल़ो रिया बजा ते मरने नि देणे। 13 परमेशर यहोवा ईंयाँ बोलोआ, "दूजिया जातिया ये बोली की तुसा रा मजाक करोईया, कि इस्राएल एड़ा देश ए जो आपणे ई माणूंआ खे कायी देओआ, ओर आपणे ई बच्चेया खे पूखा मरने देओआ। 14 इजी री खातर तूँ फेर माणूंआ खे नि खाई सकणा ओर ना आपू बीचे बसी री जातिया बिना नाश करनिया, परमेशर यहोवे री येई बाणी ए।" 15 मां फेर जातिया-जातिया रे लोका ते तेरी निन्दा नि सुनवाणी ओर ताखे फेर जातिया-जातिया रे लोका ते निन्दा नि सयीणी पड़नी ओर तां आपू पाँदे बसी रिया जातिया खे फेर ठोकर नि खुलाणी, परमेशर यहोवे री येई बाणी ए।

16 तेबे यहोवे रा ये सन्देश फेर माखे मिलेया, 17 "ओ नाश ऊणे वाल़े माणूंआ, जेबे इस्राएलो रा कराना आपणे देशो रे रओ था, तेबे आपणे चाल-चलण ओर कामो रे जरीये सेयो तेतेखे अशुद्ध करो थे; तिना रा चाल-चलण माखे महावारी आई री जवाणसा री अशुद्धता जेड़ा लगो था। 18 इजी री खातर जो अत्या तिने देशो रे कित्ती ओर देश आपणी मूर्तिया साथे अशुद्ध कित्तेया, इजी बजा ते मैं तिना पाँदे आपणा रोष पड़काया। 19 मैं सेयो जातिया-जातिया बीचे तित्तर-बित्तर कित्ते ओर सेयो देश-देशो रे रूल़ी गे; मैं तिना खे तिना रे चाल-चलण ओर कामो रे मुताबिक सजा दित्ती।" 20 सेयो जेते-जेते देशो दे गये, तेती बी तिने मेरा पवित्र नाओं अपवित्र ठराया, तेथो रे लोक तिना रे बारे दे ये बोलो थे, "यो यहोवे रे आपणे लोक थे, पर तेबे बी तिने यो आपणे देशो ते निकाल़ी ते।"* 21 पर मैं आपणे पवित्र नाओं री खबर-सम्बाल़ लई, जो इस्राएलो रे कराने तिना जातिया बीचे अपवित्र ठराया था, जेती सेयो गये थे।

22 इजी बजा ते तू इस्राएलो रे कराने खे बोल, परमेशर यहोवा ईंयाँ बोलोआ, "ओ इस्राएलो रे कराने, आऊँ एतेखे तुसा रिया तँईं नि, पर आपणे पवित्र नाओं रिया तँईं करूँआ, जो तुसे तिना जातिया बीचे अपवित्र ठराया जेती तुसे गये थे। 23 मां आपणा बड़ा नाओं पवित्र ठराणा, जो तुसे ओरी जातिया बीचे अपवित्र ठराया, जो तुसे तिना बीचे अपवित्र कित्तेया ओर जेबे आऊँ तिना री नजरा दे तुसा बीचे पवित्र ठईरना, तेबे तिना ओरी जातिया खे पता लगी जाणा कि आऊँ ई यहोवा ए, परमेशर यहोवे री येई बाणी ए।"* 24 मां तुसे दूजी जातिया बीचा ते लई लणे ओर देशो ते कट्ठे करने ओर तुसे तुसा रे आपणे देशो दे पऊँचाई देणे। 25 तुसे शुद्ध ऊई जाणे, जेड़े मैं तुसा पाँदे साफ पाणी छिड़की राखेया ए। मां सेयो सब चीजा टाई देणियां जो तुसा खे अशुद्ध बणाओईया। मां सेयो मूर्तिया दूर करी देणियां जिना री तुसे पूजा करोए।* 26 मां तुसा खे नवां मन देणा ओर तुसा रे पीतरे नवीं आत्मा पैदा करनी ओर तुसा रे शरीरो ते पात्थरो रा दिल निकयाल़ी की तुसा खे मासो रा दिल देणा।* 27 मां आपणा आत्मा तुसा रे पीतरे देई की एड़ा करना कि तुसे मेरी बिधिया पाँदे चलणे ओर मेरे नियम मानी की तिना रे मुताबिक करना।* 28 तुसे इस्राएलो रे देशो दे बसणे जो मैं तुसा रे बुजुर्गा खे दित्तेया था ओर तुसे मेरी प्रजा ठईरने ओर आऊँ तुसा रा परमेशर ठईरना। 29 मां तुसे तुसा री सारी अशुद्धता ते छुड़ाणे ओर तुसा रे डोरूआ दे नज्ज बऊत पैदा करना, ओर तुसा बीचे अकाल़ नि पाणा। 30 मां डाल़ो रे फल ओर डोरूआ री उपज बढ़ाणी, ताकि जातिया बीचे अकाल़ो रिया बजा ते तुसा री निन्दा नि ओ। 31 तेबे तुसे आपणे बुरे चाल-चलण ओर आपणे काम जो अच्छे नि थे, याद करी की आपणे पाप ओर घिनौने कामो रिया बजा ते आपणे आपू ते नफरत करने लगणे। 32 परमेशर यहोवा ईंयाँ बोलोआ, "इस्राएल, आऊँ चाऊँआ कि तुसा खे पता लगी जाओ कि आऊँ ये सब तुसा रिया तँईं नि करने लगी रा। आऊँ चाऊँआ कि तुसे जो करने लगी रे, तिजी रिया तँईं शर्म ओर बेज्जती मेहसुस करो।"

33 परमेशर यहोवा ईंयाँ बोलोआ, "जेबे मां तुसे तुसा रे सारे पापो रे कामो ते शुद्ध करने, तेबे तुसा रे शईर बसाणे ओर जो शईर तुसे नाश करी राखे सेयो शईर फेर बणाए जाणे। 34 तुसा रा देश जो सारे आऊणे-जाणे वाल़ेया सामणे उजाड़ ए, से उजाड़ ऊणे रिया बजा ते बाया-बीजेया जाणा। 35 तेबे तिना लोका बोलेया जो इस्राएल देशो रिये जाओए, ये देश जो उजाड़ था, से अदनो रे बगीचे जेड़ा ऊईगा ओर जो शईर खण्डहर ओर उजाड़ ऊईगे थे ओर टाल़ी ते थे, सेयो गढ़वाल़े ऊईगे ओर बसायी ते रे। 36 तेबे जो जातिया तुसा रे नेड़े-तेड़े बची रिया रणियां, तिना खे पता लगी जाणा कि मैं परमेशरे टाल़ेया रा फेर बणाया ओर उजाड़ जगा दे डाल़ लगाए, मैं यहोवे ये बोलेया ओर एड़ा ई करना।"

37 परमेशर यहोवा ईंयाँ बोलोआ, "इस्राएलो रे लोका फेर मांते प्रार्थना करनी कि आऊँ तिना खे एड़ा करुँ, ओर मां तिना रे लोका री गिणती पेडा बाकरिया जेड़ी बढ़ाई देणी। 38 जिंयाँ पवित्र बलिया रिया पेडा-बाकरिया ओईया, मतलब ठराए रे त्योआरो रे बखते यरूशलेम शईरो रिया पेडा-बाकरिया अणगिणत ओईया, तिंयाँ ई एबे जो शईर सुनसाण पड़ी रे, अणगिणत माणूंआ री पीड़ा साथे परी जाणे। तेबे गुलामिया ते आये दे लोका खे पता लगी जाणा कि आऊँ ई यहोवा ए।"