Ezequiel 31

मिस्र देश ओर अश्शूर प्रदेशो रा नाश

1 मारे गुलामिया दे गये रे ग्यारुए सालो रे तीजे मीन्ने रे पईले दिने यहोवे रा ये सन्देश माखे मिलेया, 2 "ओ नाश ऊणे वाल़े माणूंआ, मिस्र देशो रे राजा फिरौन ओर तेसरे नौकरा खे बोल, आपणी बडयाई करने दे तूँ केस जेड़ा ए? 3 देख, अश्शूर तो लबानोनो रे पाहड़ो रा एक देवदार था जेतेरिया सुन्दर-सुन्दर पाँगटिया, कणी छांए देयो थिया ओर बऊत ऊच्चिया थिया ओर तिना री चूँडी बादल़ो तक पऊँचो थी। 4 डूगे चरनेया ते पाणी आओ था, इजी बजा ते देवदारो रा डाल़ लाम्बा ऊईगा। फेर पाणी डाल़ो रे चोठो रे चऊँ कनारे बह्ओ था जो पाणिए खे नेडे़-तेड़ो रे ओरी डाल़ा तक लई जाओ था। 5 इजी बजा ते से बड़ा डाल़ मैदानो रे सबी डाल़ा बीचे ऊच्चा ऊईगा, तेसरिया पाँगटिया बऊत ओर लाम्बिया ऊईया, कऊँकि जेबे सेयो निकल़िया, तेबे तिना खे बऊत पाणी मिलेया। 6 सबी तरआ रे पंछी एतेरिया डाल़िया पाँदे आपणे कोअले बणाओ थे। इजी रिया डाल़िया निठे जानवर बच्चे पैदा करो थे। सब बड़े देश एतेरिया छाया दे रओ थे।*31:6 दानी. 4:12 7 डाल़ इतणा सुन्दर था ओर एतेरिया डाल़िया लाम्बिया थिया। एतेरिया जड़ी डूगे बह्णे वाल़े पाणिए तक पऊँची रिया थिया। 8 परमेशरो रे बगीचे रे देवदार बी तेसखे लकोई नि सको थे, सनौबरो रे डाल़ तेसरी पाँगटिया जेड़े पनि थे ओर ना अर्मोनो रे डाल़, परमेशरो रे बगीचे बीचा ते कोई बी डाल़ तेस बराबर सुन्दर नि था। 9 मैं से बऊत डाल़िया रिया बजा ते सुन्दर बणाया था, एथो तक कि अदन बगीचे रे सारे डाल़, जो परमेशरो रे बगीचे दे थे, तेसते जल़ो थे।"

10 इजी बजा ते परमेशर यहोवा ईंयाँ बोलोआ, "तेसरी ऊचाई जो बढ़ी गी री ओर तेसरी चूँडी जो बादल़ो तक पऊँचोई ओर आपणी ऊचाईया री बजा ते तेसरा मन जो फूलोआ, 11 इजी बजा ते मैं यहोवा परमेशरे ये देवदारो रा डाल़*31:11 देवदारो रा डाल़ परदान देशो रे राजे रे कब्जे दे करिता। तिने एसखे एसरे पापा रे मुताबिक सजा दित्ती। ईंयाँ मैं ये बारे करिता। 12 परदेशी, जो जातिया बीचे खतरनाक लोक ए, तिना से बाडी की छाडी देणा, तेसरी डाल़िया पाह्ड़ा पाँदे ओर सब तराईया रे सेटी देणियां ओर तेसरी पाँगटिया देशो रे सबी नाल़ेया रे टूटी की पड़िया री रणियां ओर सबी जातिया रे लोक तेसरी छांयी खे छाडी की चली जाणे। 13 तेस टल़े रे डाल़ो पाँदे सर्गो रे सब पंछी बसेरा करोए ओर तेसरी पाँगटिया पाँदे मैदानो रे सारे जानवर रओए। 14 ये इजी री खातर ऊआ ताकि जो डाल़ पाणिए रे कनारे लगी रे, सेयो आपणी ऊचाई नि बढ़ाओ, ना आपणी चूँडी बादल़ो तक पऊँचाओ ओर तिना बीचा ते जो पाणिए रिया बजा ते मजबूत ऊईगे रे सेयो ऊच्चे ऊणे रिया बजा ते सिर नि चको; कऊँकि सेयो बी सारे के सारे कब्रा रे पड़े रे माणूंआ जेड़े मौता रे वशो रे करी की अधलोको दे पाई देणे।"

15 परमेशर यहोवा ईंयाँ बोलोआ, "ये डाल़ मरीगा दा ए ओर आपणियां कब्रा दे चलीगा दा ए। जेबे एड़ा ऊआ, तो मैं लोक बऊत दु:खी करीते। मैं पाणिए रे चरने बन्द करीते। एबे बऊत पाणिए रे नाल़े नि रये। मैं लबानोनो रे पाह्ड़ काल़े करीते। बणो रे सारे डाल़ सूकी गे दे। 16 जेबे मैं से कब्रा रे पड़े रे माणूंआ गे अधलोको रे सेटी ता, तेबे तेसरे टल़ने री आवाज सुणी की जातिया-जातिया रे लोक डरी गे ओर अदनो रे बगीचे रे सारे डाल़, मतलब लबानोनो रे खरे-खरे डाल़े, जितणेया खे तेसते पाणी मिलो था, तिना सबी खे अधलोको रे शान्ति मिली। 17 सेयो बी तेस साथे तलवारी साथे मरे रे लोका गे अधलोको रे उतरी गे, मतलब सेयो जो तेसरी तागत थे ओर जातिया-जातिया रे बीचे तेसरी छांयी रे रओ थे। 18 ओ मिस्र, महिमा ओर बडयाईया रे बारे दे अदनो रे बगीचे रे डाल़ा बीचा ते तूँ केस जेड़ा ए? तूँ तो अदनो रे बाकी डाल़ा साथे अधलोको रे उतारना ओर बिना खतना कित्ते रे लोका बीचे तलवारी साथे लड़ाईया दे मरे रे लोका बीचे पड़ेया दा रणा। फिरौन आपणे नौकरा समेत एड़ा ई ऊणा, परमेशर यहोवे री येई बाणी ए।"