Ezequiel 35

एदोमो खे परमेशरो री सजा

1 यहोवे रा ये सन्देश माखे फेर मिलेया, 2 "ओ नाश ऊणे वाल़े माणूंआ, आपणा मूँ सेईर पाह्ड़ो रिया तरफा खे करी की तेथो रे लोका रे खलाफ भविष्यबाणी कर।" 3 ओर तिना खे बोल, परमेशर यहोवा ईंयाँ बोलोआ, "ओ सेईर पाह्ड़, आऊँ तेरे खलाफ ए; मां तुसा पाँदे अमला करना, ताकि तुसे रेगिस्तानो जेड़े बणी जाओ। 4 मां तेरे शईर खण्डहर करी देणे ओर तूँ उजाड़ ऊई जाणा, तेबे ताखे पता लगी जाणा कि आऊँ ई यहोवा ए। 5 कऊँकि तूँ इस्राएलिया साथे सदा दुश्मणी राखदा आई रा, इजी बजा ते जेबे तिना रे दुश्मणे तिना पाँदे अमला करी की सेयो काईते, तेबे तैं तिना री मताद नि कित्ती। जेबे मैं तिना खे तिना रे पापो री सजा दित्ती, तेबे सेयो बड़िया मुसीबता दे पड़ीगे।" 6 इजी री खातर परमेशर यहोवा ईंयाँ बोलोआ, "मेरी जिन्दगिया री कसम, मां तेरे दुश्मण ताखे काणे खे पेजणे ओर तिना तूँ कायी देणा। जेबे दूजे लोक काये तेबे तूँ खुश ऊआ था।" 7 ईंयाँ मां सेईर पाह्ड़ उजाड़ ई उजाड़ करी देणा ओर जो तिदे आऊँदा-जांदा ऊगा, से मां नाश करी देणा। 8 मां तेथो रे पाह्ड़ काये देया लोका रिया लाशा साथे परी देणे; तेरे टीले, तराईया ओर सारे नाल़ेया दे तलवारी साथे काये रे पड़ने। 9 मां तूँ सदा खे उजाड़ी देणा ओर तेरे शईर फेर नि बसणे। तेबे तुसा खे पता लगी जाणा कि आऊँ यहोवा ए।

10 परमेशर बोलोआ, "यो दोनो जातिया ओर यो दोनो देश मेरे ऊणे ओर आसे एदोमी ई इना रे मालक ऊई जाणे" तेबे बी यहोवा तेती था। 11 इजी बजा ते परमेशर यहोवा ईंयाँ बोलोआ, "मेरी जिन्दगिया री कसम, तेरे रोषो रे मुताबिक ओर जो जल़न तैं मेरे लोका पाँदे आपणी दुश्मणिया री बजा ते करी राखी, तिजी रेई मुताबिक मां ता साथे बर्ताव करना ओर जेबे मां तेरा न्याय करना, तेबे मां तुसा सामणे आऊणा।" 12 ताखे पता लगी जाणा कि मैं यहोवे तेरी सारिया तिरस्कार कित्ती रिया गल्ला सुणी राखिया, जो तैं इस्राएलो रे पाह्ड़ो रे बारे दे बोली राखिया, सेयो तो ऊजड़ी गे, सेयो आसा खे ई देई राखे, ताकि आसे तिना खे खाऊँ। 13 तैं आपणे मुंए ते मेरे खलाफ बडयाईया कित्तिया ओर मेरे खलाफ बऊत गल्ला कित्तिया; जो मैं सुणी राखिया। 14 परमेशर यहोवा ईंयाँ बोलोआ, "जेबे पूरी तरतिया पाँदे खुशी ऊणी, तेबे मां तूँ उजाड़ी देणा। 15 तूँ इस्राएल जो परमेशरो रा आपणा इस्सा ए तेसरे उजड़ने रिया बजा ते खुश ऊआ, इजी री खातर मां बी तां साथे तेड़ा ई करना; ओ सेईर पाह्ड़, ओ एदोम देश, तूँ सुनसाण रेगिस्तान बणी जाणा। तेबे इस्राएलिया खे पता लगी जाणा कि आऊँ ई यहोवा ए।"