Ezequiel 21

बाबेल परमेशरो री तलवार

1 यहोवे फेर माखे ये सन्देश दित्तेया, 2 ओ नाश ऊणे वाल़े माणूंआ, आपणा मूँ यरूशलेमो रिया तरफा खे कर ओर आराधना करने री पवित्र जगा रिया तरफा खे वचन सुणा; इस्राएल देशो रे बारे दे भविष्यबाणी कर ओर तिना खे चतौणी दे, 3 प्रभु यहोवा यहेजकेलो खे बोलोआ कि इस्राएलो रे लोका खे ईंयाँ बोल, "देख, आऊँ तेरे खलाफ ए ओर मां आपणी तलवार म्यानो ते खींजी की तां बीचा ते तर्मी ओर पापी दुँईं रा नाश करना। 4 इजी खे कि आऊँ तां बीचा ते तर्मी ओर पापी दुँईं रा नाश करने वाल़ा ए, इजी बजा ते मां आपणी तलवार म्यानो ते निकाल़ी की तेतेरा इस्तेमाल देशो रे सबी लोका पाँदे दक्खणो ते लई की उत्तरो तक अमला करने खे करना; 5 तेबे दुनिया रे सबी लोका खे पता लगी जाणा कि आऊँ यहोवा ए ओर तिना जाणी लणा की मैं आपणी तलवार म्यानो ते खींजी राखी ओर तेस तिदे फेर नि राखणी।" 6 इजी री खातर ओ नाश ऊणे वाल़े माणूंआ, तू राड़ी दे, पारी दु:ख कर ओर बऊत दु:खी ऊई की इस्राएलो रे लोका सामणे राड़ी दे। 7 जेबे सेयो तांते पूछो, तूँ राड़ी कऊँ देणे लगी रा, तेबे बोलेया, समाचारो रिया बजा ते। कऊँकि एड़ी गल्ल ऊणे वाल़ी ए कि सबी रे मन टूटी जाणे ओर सबी रे आथ टीले पड़ने, सबी री आत्मा बेबस ओर सबी रे जानू कमजोर ऊई जाणे। देखो, तुसे बेफिकर ऊई की रओ कि ये बऊत छोड़ ऊणा। परमेशर यहोवे री येई बाणी ए।

8 तेबे यहोवे माखे ये सन्देश दित्तेया, 9 "ओ नाश ऊणे वाल़े माणूंआ, भविष्यबाणी करी की तिना खे बोल, परमेशर यहोवा ईंयाँ बोलोआ, देख, पैनी कित्ती री तलवार ओर चमकाई री तलवार! 10 से मेरिया तलवारी खे पैनी करी राख कि आऊँ तीजी ते बऊत सारेया लोका खे कायी सकूँ; ओर ये इजी खे चमकाई राखी ताकि बिजल़िया जेड़ी चमको! तो क्या आसा खे खुश ऊणा चाईयो? से तो यहोवे रे पाऊए रा राजदण्ड ए, ओर सबी राजदण्डा खे बेकार जाणने वाल़ा ए। 11 से चमकाणे खे इजी खे दित्ती थी ताकि आथो दे लई सको, से इजी खे पैनी कित्ती ओर चमकाई ती ताकि काणे वाल़ेया रे आथो दे देयो। 12 इजी री खातर ओ नाश ऊणे वाल़े माणूंआ, चींगो, ओर हाय, हाय कर! कऊँकि तलवार मेरे लोका पाँदे चलणे वाल़ी ए, से इस्राएलो रे सबी परदाना पाँदे चलणे वाल़ी ए; मेरी प्रजा साथे सेयो बी तलवारी रे गेड़े दे आईगे, इजी बजा ते तूँ दु:खो दे आपणी छाती पीट। 13 कऊँकि सच्ची तेसरी जाँच ऊई री जे तिना खे बेकार जाणने वाल़ा राजदण्ड पनि रओ, तो क्या? परमेशर यहोवे री येई बाणी ए। 14 इजी री खातर परमेशरे बोलेया, ओ नाश ऊणे वाल़े माणूंआ, भविष्यबाणी कर ओर आथो साथे चाड़िया बजा ओर तलवार दो बार क्या तीन बार बी तलवार चलो, ये तो काणे खे तलवार ए, बल्कि बड़े ते बड़े खे काणे री तलवार ए, जो चऊँ कनारा ते तिना पाँदे अमला करोई। 15 इजी बजा ते मेरे लोक डरो रे मारे काँबी जाणे। तिना बीचा ते बऊत जे रूड़ी जाणे। मेरी तलवार शईरो दे हर जगा तिना खे काणे खे त्यार ए। ये बिजल़िया जेड़ी चमकणे लगी री। ये काणे खे त्यार ए। 16 ओ मेरी तलवार दोधारी बण, ओर दाँणे कनारे जा, तेबे त्यार ऊई की खूँजे कनारे मुड़, जेथो खे बी तेरा मूरा ओ। 17 मां बी चाड़िया बजाणियां ओर आपणा रोष ठण्डा करना, माखे यहोवे एड़ा बोली राखेया।"

बेबीलोनो रे राजे री तलवार

18 तेबे यहोवे रा ये सन्देश माखे फेर मिलेया, 19 "ओ नाश ऊणे वाल़े माणूंआ, दो बाटा बणाई दे ताकि बाबेलो रे राजे री तलवार आओ; दोनो बाटा एक ई देशो ते निकल़ो! तेबे एक नशाण बणा, मतलब शईरो रे मुरे पाँदे एक नशाण बणा; 20 तलवारी खे सेयो दो जगा दखा जेती बाटा जाओईया। एक बाट शईरो री राजधानी रब्बा खे जाओई, जो अम्मोनिया रा बड़ा शईर ए। दूजी बाट यहूदा देशो रे गढ़वाल़े शईर यरूशलेमो दे जाओई। 21 बाबेलो रा राजा तेते जगा दे पऊँचणा जेती बाट लग-लग जगा खे जाओई। तेस फैंसला करने री कोशिश करनी की केसा बाटा दे जाणा। तेस जादुए रा इस्तेमाल करी की आपणे देवतेया ते पूछणा ताकि सेयो तेसखे बताओ। तेस आपणे देवतेया री मूर्तिया ते प्रार्थना करनी। तेस जानवरा रा काल़जा देखणा। 22 तेसरे दाँणे आथो रे यरूशलेमो रा नाओं ए ताकि से तेसरी तरफा खे युद्धो रे यन्त्र लगाओ ओर गल़ा फाड़ी की काणे री आज्ञा देयो ओर जोरे की ललकारो, शईरो रे बड़े द्वारो रिया तरफा खे युद्धो रे यन्त्र लगाओ ओर अथियार बानी की शईरो रे खलाफ कांदा पाँदे बैठी जाओ। 23 यरूशलेमो रे लोका एते चूठो पाँदे परोसा नि करना कऊँकि तिने जो समजौता करी राखेया ए, से सच्च आ। पर बेबीलोनो रे राजे तिना खे तिना रे पाप याद दलाणे। ओर तिना खे आऊणे वाल़ी गुलामिया रे बारे दे चतौणी देणी।" 24 इजी बजा ते प्रभु यहोवे माखे बोलेया: कऊँकि तुसा रे पाप याद करी राखे ओर तुसा रे पाप जो खुली गे रे, कऊँकि तुसा रे सबी कामा दे पाप ई पाप दिशी रा ओर तुसे याद आई रे, इजी री खातर तुसे दुश्मणा रे जरीये ई पकड़े जाणे। 25 ओ इस्राएलो रे दुष्ट परदान, तेरा दिन आई गा रा, पापो रिया सजा रा बखत आई गा रा। 26 तेरे बारे दे परमेशर यहोवा ईंयाँ बोलोआ: पगड़ी उतार ओर मुकुट बी उतारी दे, ये जेड़ा था तेड़ा नि रणा, जो ईठा ए तेसखे ऊच्चा कर ओर जो ऊच्चा ए तेसखे निठा कर।*21:26 पज. 75:7 27 मां से यरूशलेम शईर पुरिया तरह नाश करी देणा ओर सब कुछ सत्यानाश करी देणा ओर जदुओ तक तेसरा अधिकारी नि आओगा, तदुओ तक से उजाड़ रणा, तेबे मां तेसखे देई देणा।

अम्मोनिया ते बेज्जतिया रा बदला लणा

28 परमेशरे बोलेया, "ओ नाश ऊणे वाल़े माणूंआ, भविष्यबाणी करी की बोल कि प्रभु यहोवा अम्मोनी ओर तिना री कित्ती री बेज्जतिया रे बारे दे ईंयाँ बोलोआ, एक तलवार तिना खे नाश करने रिया तँईं त्यार ए। ये बिजल़िया रिया तरआ चमकी री ए, ये काणे रिया तँईं त्यार ए।" 29 तुसा रे भविष्यबक्तेया तुसा खे चूठे दर्शण बताई राखे, ओर चूठी भविष्यबाणी ताखे बताओए ताकि तूँ तिना दुष्ट अदमरे कायला री क्याड़िया पाँदे पड़े जिना रा दिन आई गा रा ओर जिना रे पापो रे अन्तो रा दिन आई गा रा। 30 एबे तुसे तलवारी खे म्यानी रे वापस राख। जेते जगा रे तूँ बणाई ओर जेते देशो दे तेरी शुरूआत ऊई, तिदे ई मा तेरा न्याय करना। 31 मां तां पाँदे आपणा रोष पड़काणा ओर तुसा पाँदे आपणे रोषो री आग सेटणी ओर तूँ डांगरा जेड़ी माणूंआ रे आथो रे करी देणी जो नाश करने रे निपुण ए। 32 तूँ आगी दे फूखी जाणा, तूँ काया जाणा ओर तेरा खून तेरे ई देशो दे बाह्या जाणा, ओर केसी तूँ फेर याद नि राखणा। कऊँकि मैं यहोवे ई एड़ा बोली राखेया।