Ezequiel 6

इस्राएलो रे पाह्ड़ो रे खलाफ भविष्यबाणी

1 तेबे यहोवे रा ये एक ओर सन्देश मांगे पऊँचेया, 2 तिने बोलेया, "ओ माणूंआ आपणा मूँ इस्राएलो रे पाह्ड़ो रिया तरफा खे करी की तिना रे खलाफ भविष्यबाणी कर कि तिना साथे क्या ऊणा।" 3 ओ इस्राएलो रे पाह्ड़ो ओर पाह्ड़ियो, सुणो परमेशर यहोवा तुसा ते क्या बोलोआ, "मां लड़ाईया री तलवार पेजणी ओर तुसा रे पूजा करने री मूर्तिया रे मन्दर जो पाह्ड़ो पाँदे ए तोड़ी देणे। 4 मूर्तिया खे बलि चढ़ाणे खे जो तुसा री बेदिया ए सेयो तोड़ी की टुकड़े-टुकड़े करी देणियां। तुसा री सूरजो रिया मूर्तिया तोड़ी देणियां ओर मां सेयो लोक जो मूर्तिया री पूजा करोए कायी देणे। 5 मां इस्राएलिया री लाशा तिना री मूर्तिया सामणे राखणियां ओर तिना री आड्डिया तुसा रे नेड़े-तेड़े बखेरी देणियां। 6 इस्राएलो रे सारे शईर नाश करी देणे, तिना रिया सब बेदिया ओर तिना रिया मूर्तिया रे टुकड़े-टुकड़े करी देणे, तिना रिया तूपो रिया बेदिया चूर-चूर ऊई जाणिया, ओर जो कुछ तिने बणाई राखेया से सब राची जाणा। 7 तुसा रे लोक मारे जाणे ओर तेबे तुसा बीचा ते जो लोक बची जाणे तिना मानी लणा की आऊँ यहोवा ए। 8 परमेशरे बोलेया, तेबे बी मां तुसा रे कई लोक बचाणे। इजी री खातर जेबे तुसे देश-देशो दे ओरे-पोरे बिखरी जाओ, तेबे दूजी जातिया बीचे तुसा रे कई लोक तलवारी साथे मरने ते बची जाणे। 9 तेबे तिना बचे रे लोका, तिना जातिया बीचे, जिना दे सेयो गुलाम ऊई की जाणे, आऊँ याद करना ओर ये बी कि म्हारा मूर्तिपूजा करने वाल़ा विश्वासघाती मन यहोवे ते केड़ा अटी गा रा ओर म्हारी व्याभिचारणिया जेड़िया आखी मूर्तिया पाँदे केड़िया लगी रिया, जेते कि यहोवे रा मन टूटी रा। ईंयाँ तिना बुराईया रिया बजा ते, जो तिने आपणी बणाई री मूर्तिया री आराधना करी की करी राखिया, सेयो आपणी नजरा दे घिनौने ठईरने। 10 तेबे तिना खे पता लगी जाणा कि मैं यहोवे ई तिना खे सजा देई राखी। सेयो समजी जाणे की जेबे मैं तिना खे सजा देणे री तमकी दित्ती थी, तो मेरा पक्का इरादा था की मां एड़ा करना था।" 11 इजी री खातर आऊँ परमेशर यहोवा तांते बोलूँआ, "यहेजकेल आपणे आथ-पैर पटक ओर चींगी की बोल कि तूँ कितणा बेचैन आ, ओर मेरे इस्राएली लोका साथे क्या ऊणा, इजी बजा ते रोओ, कऊँकि तिना रे सारे बुरे कामा ओर बुरे बर्ताओ रिया बजा ते आपणे दुश्मणा रिया तलवारी की मरने, ओर पूख ओर बमारिया ते मरने। 12 दूरो रे लोक बमारिया साथे मरने। ओर जो नेड़े ऊणे सेयो लड़ाईया दे तलवारी साथे काये जाणे ओर जो बची की शईरो दे रंदे ऊए केरेया जाओ, से पूखा साथे मरना। ईंयाँ मां आपणा रोषो री तागत तिना पाँदे पूरी तरअ ते उतारनी। 13 जेबे हर एक ऊच्ची पाह्ड़िया ओर पाह्ड़ो री हर एक चूँडिया पाँदे, हर एक अरे डाल़ो निठे ओर हर एक कणे बड़े डाल़ो री छांयी निठे, जेती-जेती सेयो आपणी मूर्तिया खे सुख देणे वाल़े खुशबूदार द्रव्य चढ़ाओए, तेती तिना रे काये रे लोक आपणी बेदिया रे नेड़े-तेड़े आपणी मूर्तिया बीचे पड़े रे रणे, तेबे तुसा लोका खे पता लगी जाणा कि आऊँ परमेशर यहोवा ए। 14 मां आपणा आथ तिना रे खलाफ बढ़ाई की से देश, दक्खणा रे रेगिस्तानो ते लई की उत्तरा दे रिबला शईरो तक, उजाड़ करी देणे। तेबे तिना खे पता लगी जाणा कि आऊँ ई परमेशर यहोवा ए ओर जो बोलूँआ से करूँआ।"