Ezequiel 7

अन्तो रा आऊणा

1 तेबे यहोवे रा ये एक ओर सन्देश मांगे पऊँचेया, 2 तिने बोलेया "ओ नाश करने वाल़े माणूंआ, आऊँ परमेशर यहोवा, इस्राएलो रे लोका खे ईंयाँ बोलोआ: सारे इस्राएल देशो रे नाश ऊणे रा बखत आईगा दा ए।*7:2 यहे. 7:5 3 ओ इस्राएल, तेरे लोका रा अन्त बी आई गा ओर मां आपणा रोष तुसा पाँदे पड़काई की तुसा रे चाल-चलणो रे मुताबिक तुसा खे सजा देणी ओर तुसा रे सारे घिनौने कामा रा फल तुसा खे देणा। 4 मां तुसा पाँदे कोई दया नि करनी ओर ना करूणा करनी। मां तुसा रे बुरे बर्ताओ रिया तँईं तुसा खे पक्का सजा देणी। तेबे तुसा खे पता लगी जाणा कि ये सब इजी बजा ते ऊआ कऊँकि मैं यहोवे ये करी राखेया। 5 परमेशर यहोवा ईंयाँ बोलोआ: तुसा पाँदे एक ते बाद एक मुसीबत आऊणे लगी री, 6 अन्त आऊणे लगी रा ओर से बऊत छोड़ आई जाणा। 7 ओ इस्राएल देशो रे रणे वाल़ेयो, तुसे नाश ऊई जाणे। बखत आई गा, दिन नेड़े ए, जेबे तुसे नाश ऊई जाणे। तेस बखते पाह्ड़ो रे मन्दरा पाँदे मूर्तिपूजा करने वाल़े लोक खुश नि ऊणे पर डरी जाणे।"

8 एबे बऊत छोड़ मां आपणा रोष तुसा पाँदे पड़काणा ओर तुसा पाँदे पूरा रोष त्वारना ओर तुसा रे चाल-चलणो रे मुताबिक तुसा खे सजा देणी ओर तुसा रे सारे घिनौने कामो रा फल तुसा खे पुगताणा। 9 मेरी दया तुसा पाँदे नि ऊणी ओर ना मां तुसा पाँदे कोई करूणा करनी। मां तुसा रे बुरे चाल-चलणो रा फल तुसा खे पुगताणा ओर तुसा रे घिनौने पाप तुसा दे बणे दे रणे। तेबे तुसा खे पता लगी जाणा कि आऊँ यहोवा सजा देणे वाल़ा ए। 10 देखो, तुसा री मुसीबता रा दिन आईगा रा ए! तुसा पाँदे बड़ी पारी मुसीबत आऊणे वाल़ी ए! एकी डाल़ो जेड़े जिदे फूल आऊणे वाल़ा ए, तुसा रे कमण्ड ओर बुरे काम सजा रिया तँईं त्यार ए। 11 उपद्रव बढ़दे-बढ़दे दुष्टता री सजा बणीगी, इस्राएलो रे लोका बीचा ते कोई नि बचणा ओर ना तिना रा वैभव, ना तिना रा बऊत तअन ओर ना तिना रा खास ऊणे बीचा ते कुछ रणा ओर ना तिना रिया तँईं केसी शोग करना। 12 बखत आई गा, दिन नेड़े आई गा रा, ना तो खरीदणे वाल़ा खुशी मनाओ ओर ना बेचणे वाल़ा दु:ख करो, इस्राएलो रे सारे लोक जो एबु बी देशो दे रणे लगी रे तिना पाँदे कोप पड़की रा। 13 चाए सेयो जिऊँदे रओ जो बी माणूं आपणी जमीन बेचो आ, तेसखे से जमीन फेर नि मिलणी, जदुए तक से जिऊँदा ए। परमेशरे दशी राखेया ए कि तेसा पीड़ा रे खलाफ न्याय ओर नाशो रा दर्शण नि बदलणा। तेस आपणा मन नि बदलणा। सब कोई आपणे पापो रिया बजा ते नाश ऊणे। 14 सिपाईए लड़ाईया खे त्यार ऊणे रिया तँईं नरसिंगा बजाया। पर लड़ाई लड़ने खे कोई बी बारे नि जांदा, कऊँकि इस्राएलो रे सबी लोका पाँदे मेरा रोष पड़की रा।

इस्राएलो रे पापो री सजा

15 जेबे यो गल्ला ऊणिया, तेबे तेरे दुश्मण तलवारा लई की शईरो ते बारे सड़का दे खड़े ऊणे, ओर शईरो रे पीतरे कअरा दे अकाल़ ओर बमारिया ऊणिया। जो लोक शईरो ते नठी की बणो दे चली जाणे सेयो दुश्मणा रिया तलवारी की लड़ाईया दे मरने। ओर जो शईरो दे रई जाणे, सेयो अकाल़ ओर बमारिये की मरने। 16 मां तिना बीचा ते जो बची की निकल़ना सेयो बचणे तो आए, पर आपणे-आपणे बुरे कामो दे फसे रे तराईया दे रणे वाल़े कबूतरो जेड़े पाह्ड़ो पाँदे दु:खी रणे। 17 सबी रे आथ टीले ओर सबी रे जानू बऊत कमजोर ऊई जाणे। 18 तिना लको दे टाट बानणी ओर आपणा दु:ख बताणे खे तिना रे बाल़ बिखरे दे ऊणे, सबी रे मूँ सूकी जाणे ओर सबी रे सिर गँजे ऊई जाणे। 19 तिना आपणे चाँदिए रे देवतेया रिया मूर्तिया सड़का दे सेटी देणियां ओर तिना आपणे सूईने रे देवतेया रिया मूर्तिया अशुद्ध ठराणियां, यहोवे रे बऊत रोषो रे दिने तिना रे सूईने-चाँदिए रिया मूर्तिया तिना खे बचायी नि सकदिया, ना तिजी साथे तिना रे जियूए खे सन्तुष्टि मिलणी, ना तिना रे पेट परने। कऊँकि से तिना रे बुरे कामो री ठोकरा री बजा ऊई रा। 20 तिना लोका खे आपणे सुन्दर सूईने रे गईणेया पाँदे कमण्ड था। तिने तिना रा इस्तेमाल घिनौनी मूर्तिया ओर चित्र बनाणे खे कित्तेया। इजी री खातर मैं यहोवे तिना रिया किमती चीजा ते तिना खे नफरत करवाई ती। 21 मां तिना रा सूईना-चाँदी लुटणे खे परदेशिया रे आथो दे ओर पैसा छुड़ाणे खे तरतिया रे दुष्ट लोका रे वशो दे करी देणा ओर तिना से अशुद्ध करी देणा। 22 मां तिना ते आपणा मूँ फेरी लणा, तेबे तिना मेरा किमती मन्दर अपवित्र करी देणी, डाकूआ तिदे कूसी की से अपवित्र करी देणी। 23 एक साँगल़ बणाई दे, कऊँकि देश अन्याय री अत्या साथे ओर यरूशलेम शईर उपद्रवो साथे फरेया राए। 24 मां दूजी जातिया रे बुरे ते बुरे लोक ल्याऊणे, ओर तिना लोका इस्राएलो रे लोका रे कअरो रे मालक ऊई जाणे ओर मां तागतवरा रा कमण्ड तोड़ी देणा ओर तिना री पवित्र जगा अपवित्र करिया जाणिया। 25 जेबे सेयो नाश ऊई जाणे, तेबे तिना खे शान्ति टोल़ने ते पनि मिलणी। 26 एकी ते बाद एक मुसीबत आऊणी। खतरनाक चीजा रे बारे दे बऊत सारिया गल्ला आऊणियां। लोका भविष्यबक्तेया ते पूछणा कि तिना खे क्या ऊणा। पुरोईता गे लोका खे सखाणे खे कुछ नि ऊणा। बुजुर्गा गे देणे खे कोई खरी सलाह् नि ऊणी। 27 तुसा रे राजे शोक करना, ओर तेसरे अधिकारिया उम्मीद छाडी देणी ओर दु:खी ऊई की रोणे, ओर लोक डरो रे मारे थरथराई जाणे। मां तुसा खे तुसा रे कित्ते रे बुरे कामा रिया बजा ते सजा देणी, ओर तुसा खे सजा देणी जिंयाँ तुसे ओरी ना न्याय करोए। तेबे तिना खे पता लगी जाणा कि आऊँ परमेशर यहोवा ए।