Ezequiel 28

सोर शईरो रे राजे रे खलाफ भविष्यबाणी

1 यहोवे रा ये सन्देश माखे एक बार फेर मिलेया, 2 "ओ नाश ऊणे वाल़े माणूंआ, सोर शईरो रे परदानो खे बोल, परमेशर यहोवा ईंयाँ बोलोआ कि तैं कमण्डी ऊई की ये बोली राखेया, कि आऊँ एक देवता ए, आऊँ समुद्रो बीचे एकी द्वीपो पाँदे एकी शईरो दे एकी देवते रे आसणो पाँदे बैठी रा!" पर जे तू आपणे आपू खे देवते जेड़ा दखाएया, तेबे बी तू ईश्वर नि ए, माणूं ई ए।*28:2 यहे. 28:9 3 तूँ दानिय्येलो ते जादा अक्लमंद तो आए; कि तूँ सारे पेतो खे जाणेया, 4 तूँ आपणी बुद्धि ओर समजा रे जरीये अमीर ऊआ ओर आपणे पण्डारा दे सूईना-चाँदी राखी राखेया; 5 तैं आपणी बुद्धिया साथे लेण-देण कित्तेया, जेते कि तूँ अमीर ऊईगा ओर अमीर ऊणे रिया बजा ते ताखे कमण्ड ऊईगा। 6 इजी बजा ते परमेशर यहोवा ईंयाँ बोलोआ, कऊँकि तूँ सोचेया कि तूँ परमेशरो जेड़ा अक्लमंद आ, 7 इजी री खातर देख, मां तां पाँदे एड़े परदेशिया ते अमला करवाणा, जो सबी जातिया ते जादा दुष्ट ए; तिना सेयो सब बांकिया चीजा नाश करी देणियां जो तुसे आपणे अक्ला ओर समजा ते आसिल करी राखिया, 8 तिना तूँ मौता रे कुएँ दे सेटी देणा, ओर तूँ तलवारे की काई देणा, समुद्रो तेरी कब्र बणी जाणा। 9 तेबे क्या तां आपणे काणे वाल़ेया रे सामणे बोलदे रणा, आऊँ देवता ए। तूँ आपणे काईल करने वाल़ेया रे आथो दे देवता नि, माणूं ई ठईरना। 10 तूँ परदेशिया रे आथो ते बिना खतना कित्ते रे लोका जेड़ा मरना; कऊँकि मैं ई एड़ा बोली राखेया, परमेशर यहोवे री येई बाणी ए।

सोर शईरो रे राजे रा नाश

11 तेबे यहोवे रा ये सन्देश माखे मिलेया, 12 ओ नाश ऊणे वाल़े माणूंआ, सोरो रे राजे रे बारे दे ये शोगो रा गाणा बणाई की तेसखे बोल, परमेशर यहोवा ईंयाँ बोलोआ,

"तूँ तो अक्लमंद ए,

तूँ बऊत जादा बुद्धिमान ओर बऊत सुन्दर ए।

13 तूँ परमेशरो रे अदन नाओं रे बगीचे रे था;

तांगे गईणे, माणिक्य, पुखराज, ईरा, फिरोजा, सुलैमानी मणि, यशब, नीलमणि, मरकत ओर लाल सब प्रकारा रे मणि ओर सूईने रे टाल्ले थे;

तेरे डफ ओर बँसरिया तां बीचे ई बणाईया थिया;

जेस दिने तूँ बणाया गया था; तेस दिने सेयो बी त्यार कित्तिया थिया।*28:13 प्रका. 2:7

14 तूँ रक्षा करने वाल़ा अभिषिक्त करूब था, मैं तूँ एड़ा ठराया कि तूँ परमेशरो रे पवित्र पाह्ड़ो पाँदे रये था;

तूँ आगी जेड़े चमकणे वाल़े मणिया बीचे चलो-फिरो था।

15 जेस दिनो ते तूँ बणाया ओर जेस दिनो तक तांदे बुराई नि थी,

तेस दिनो तक तूँ आपणी सारी चाला रे निर्दोष रया।

16 पर बऊत जादा लेण-देणो रिया बजा ते तूँ बुराईया साथे परी की अपवित्र ऊईगा;

इजी ते मैं तूँ परमेशरो रे पाह्ड़ो ते जेती आऊँ रऊँआ थाले उतारी ता ओर ओ रक्षा करने वाल़े करूब,

मैं तूँ आगी जेड़े चमकणे वाल़े मणिये बीचा ते नाश करी ता।

17 कऊँकि तूँ बऊत सुन्दर थी, इजी री खातर ताखे बऊत कमण्ड था;

ओर वैभवो रिया बजा ते तेरी बुद्धि बिगड़ी गी थी।

मैं तूँ जमीना दे पटकी ता ओर ओरी राजेया रे सामणे तूँ राखेया कि सेयो ताखे देखो।

18 तेरे बऊत जादा बुरे कामो रिया बजा ते ओर लेण-देणो री बुराईया ते तेरी आराधना री जगा अपवित्र ऊईगिया;

इजी बजा ते मैं तां बीचे एड़ी आग पैदा कित्ती कि तिदे तूँ स्वा ऊईगा

ओर मैं तूँ सबी देखणे वाल़ेया सामणे स्वा करी ता।

19 देश-देशो रे लोका बीचा ते जितणे ताखे जाणोए, सब तेरी बजा ते डरी गे;

तूँ डरने री बजा ऊआ ओर फेर कदी नि रणा।"

सिदोन शईरो रे खलाफ भविष्यबाणी

20 यहोवे रा ये सन्देश माखे फेर मिलेया, 21 "ओ नाश ऊणे वाल़े माणूंआ, आपणा मूँ सिदोन शईरो रिया तरफा खे करी की तेसरे खलाफ भविष्यबाणी कर, 22 ओर बोल, प्रभु यहोवा ईंयाँ बोलोआ, ओ सिदोन, आऊँ तेरे खलाफ ए, जो कुछ मां तां साथे करना तेतेरिया बजा लोका मेरी महिमा करनी। जेबे मां ताखे सजा देणी ओर तेस बीचे आपू खे पवित्र ठराऊँगा, तेबे लोका खे पता लगी जाणा कि आऊँ ई यहोवा ए।" 23 मां शईरो रे लोक कायी देणे। दुश्मणा शईरो रे चऊँ कनारा ते अमला करना, ओर तिना रा खून सड़का बह्याई देणा। तेबे तिना खे पता लगी जाणा कि आऊँ ई यहोवा ए।

इस्राएलो खे आशीष मिलणा

24 यहोवा बोलोआ, "इस्राएलो रे लोको, तुसा रे नेड़े-तेड़े रणे वाल़ेया लोका तुसा खे एबे नुकशाण नि पऊँचाणा जेड़ा कि कांडे वाल़ेया बाड़ा या पईने कांडे चूबी की लोका खे कायी देयो ए। ओर तेबे इस्राएली लोका खे पता लगी जाणा कि आऊँ ई परमेशर यहोवा ए, जो बोलूँआ से ई करुँ बी आ।" 25 परमेशर यहोवा ईंयाँ बोलोआ, "जेबे मां इस्राएलो रा कराना तिना सबी लोका बीचे कट्ठा करना, जिना बीचे सेयो तितर-बित्तर ऊए ओर देश-देशो रे लोका सामणे तिना रे जरीये पवित्र परमेशर ठईरना, तेबे सेयो तेते देशो रे रणे, जो मैं आपणे दास याकूबो खे दित्तेया था। 26 इस्राएलो रे लोक आपणे देशो दे बिना डरे बसे दे रणे; तिना कअर बनाणे ओर अंगूरा रे बगीचे लगाणे। जिने बी देशे जो तिना साथे लगदे ए, तिना साथे दुश्मणिया रा बर्ताओ करी राखेया था, तिना खे मां सजा देणी। तेते ते बाद इस्राएली लोक आपणे देशो दे बिना डरे रणे। तेबे तिना खे पता लगी जाणा कि आऊँ ई तिना रा परमेशर यहोवा ए।"