1 प्रभुए रा ये सन्देश फेर माखे मिलेया। प्रभुए माखे बोलेया, 2 "ओ नाश ऊणे वाल़े माणूंआ, इस्राएलो रे परदाना रे खलाफ भविष्यबाणी करी की तिना परदाना खे बोल, परमेशर यहोवा ईंयाँ बोलोआ: लाणत ए इस्राएलो रे ग्वाल़ेया पाँदे! तुसे जो आपणा त्यान तो राखोए, पर पेडा री देखपाल़ नि करदे। 3 तुसे तिना रा दूद पियोए, ऊना रे बणे दे टाल़े पईनोए, ओर बढ़िया पेडा खे कायी की तिना रा मास खाओए। पर तुसे कदी बी पेडा री देखपाल़ नि करदे।* 4 तुसे बमार पेडा री देख-भाल़ नि कित्ती, ना तिना रे जख्मा पाँदे कोई त्यान दित्तेया, ना निकयाल़ी रिया वापस ल्याईया, ना राची रिया टोल़िया, पर तुसे तागत ओर जबरदस्ती अक्क चलाई राखेया। 5 सेयो गवाल़े ना ऊणे रिया बजा ते रूल़ी गिया ओर सारे बणो रे जानवरे सेयो कायी की खाई तिया। 6 इजी री खातर मेरी पेडा-बाकरिया ऊच्चे पाह्ड़ा ओर पाह्ड़िया पाँदे पटकणे लगी रिया। सेयो सारिया तरतिया पाँदे ओरे-पोरे ऊईगी रिया ए, ओर सेयो किने पनि टोल़िया ओर ना ई टोल़ने री कोशिश कित्ती।" 7 इजी बजा ते ओ ग्वाल़ेयो, यहोवे रा वचन सुणो: 8 परमेशर यहोवा ईंयाँ बोलोआ, "आऊँ जिऊँदा परमेशर ए, इजी री खातर तुसा खे मेरी गल्ल सुणनी चाईयो। मेरी पेडा-बाकरिया पाँदे बणो रे जानवरे अमला करी राखेया, जिने सेयो कायी तिया ओर खाई लईया, कऊँकि तिना रा कोई ग्वाल़ा नि था। मेरे ग्वाल़ेया तिना खे टोल़ने री कोशिश नि कित्ती। सेयो पेडा री नि, बल्कि आपणी ई देखपाल़ करने लगी रे थे, 9 इजी बजा ते ओ ग्वाल़ेयो, परमेशरो रा ये वचन सुणो, 10 परमेशर यहोवा ईंयाँ बोलोआ, देखो, आऊँ ग्वाल़ेया रे खलाफ ए ओर मां तिना ते आपणी पेडा-बाकरिया रा लेखा लणा ओर सेयो फेर तिना खे चराणे नि देणियां; सेयो फेर आपणा-आपणा पेट नि परी सकणियां। मां आपणियां पेडा-बाकरिया तिना रे मुंए ते छुड़ाई की ल्याऊणिया, ताकि आगो खे सेयो तिना खे नि खाओ।"

11 कऊँकि परमेशर यहोवा ईंयाँ बोलोआ, "देखो, मां आपू आपणियां पेडा-बाकरिया री खबर-सम्बाल़ लणी ओर सेयो टोल़निया।* 12 जिंयाँ ग्वाल़ा आपणियां पेडा-बाकरिया बीचा ते राची रिया खे फेर आपणे चूण्डो रे कट्ठा करोआ, तिंयाँ ई मां बी आपणियां पेडा-बाकरिया कट्ठिया करनिया; मां सेयो तिना सबी जगा ते निकयाल़ी की ल्याऊणिया, जेती सेयो बादल़ ओर अन्दकूप न्हेरे रिया बजा ते तितर-बित्तर ऊई गिया थिया। 13 मां सेयो देश-देशो रे लोका बीचा ते निकयाल़निया ओर सेयो देश-देशो ते कट्ठिया करनिया ओर सेयो तिना री आपणी जमीना दे लई आऊणियां ओर मां सेयो इस्राएलो रे पाह्ड़ो पाँदे, नाल़ेया दे ओर तेस देशो रे सबी बसी री जगा दे चराणिया। 14 मां सेयो अच्छी चराईया दे ओर ऊच्चे-ऊच्चे पाह्ड़ो दे चराणिया, तेती सेयो अच्छी अरयालिया दे बैठेया करनिया ओर इस्राएलो रे पाह्ड़ो पाँदे खरी-खरी काआ चरेया करनी। 15 आऊँ आपू ई आपणी पेडा-बाकरिया रा ग्वाल़ा ऊणा ओर मां तिना खे शान्तिया साथे रणे खे जगा देणी, परमेशर यहोवे री येई बाणी ए।* 16 मां राची रिया पेडा टोल़निया ओर निकयाल़ी रिया वापस ल्याऊणिया, जो काईल ऊणिया तिना रे जख्म बानणे, ओर बमार ठीक करनिया ओर जो मोटिया ओर तागतबर ए सेयो मां नाश करी देणियां, मां तिना री चरवाई न्याय साथे करनी।" 17 ओ मेरे लोको, तुसा खे परमेशर यहोवा ईंयाँ बोलोआ, "देखो, आऊँ पेडा-पेडा बीचे, खाडूआ ओर बाकरेया बीचे न्याय करूँआ।* 18 क्या तुसा खे ये छोटी गल्ल लगोई कि तुसे अच्छी चराई चरो ओर बाकी चराईया खे आपणे पैरा निठे माँडो ओर क्या तुसा खे ये छोटी गल्ल लगोई कि तुसे साफ पाणी पियो ओर बाकी पाणिए खे आपणे पैरा साथे गाऊदल़ा करो? 19 क्या मेरी पेडा-बाकरिया खे से काआ चरना पड़ना जो तुसे आपणे पैरे की केसी राखेया ओर तुसा रे पैरा निठे गाऊदल़ा कित्तेया रा पाणी पीणा पड़ना?" 20 इजी बजा ते परमेशर यहोवा तिना खे ईंयाँ बोलोआ, "देखो, मां आपू मोटी ओर पतल़ी पेडा-बाकरिया बीचे न्याय करना।* 21 तुसे जो सबी बमारा खे बाँयी ओर फरकुआ साथे एथो तक ताका देओए ओर सींगो साथे एथो तक मारोए कि सेयो तित्तर-बित्तर ऊई जाओईया, 22 इजी बजा ते मां आपणियां पेडा-बाकरिया बचाणियां, सेयो फेर नि लूटणियां ओर मां पेडा-पेडा ओर बाकरी-बाकरिया बीचे न्याय करना। 23 मां तिना पाँदे आपणे दास दाऊदो जेड़ा एक एड़ा ग्वाल़ा ठईराणा, जेस सेयो चराणिया, से मेरा दास दाऊद ऊणा, तेस ई सेयो चराणिया ओर सेई तिना रा ग्वाल़ा ऊणा। 24 आऊँ, यहोवा, तिना रा परमेशर ठईरना ओर मेरा दास दाऊद तिना बीचे परदान ऊणा; मैं परमेशरे ई ये बोली राखेया। 25 मां आपणे लोका साथे शान्तिया री वाचा बानणी ओर दुष्ट जानवर देशो दे रणे नि देणे; तेबे सेयो जंगल़ो रे बिना डरे रणे ओर बणो दे सऊणे। 26 मां सेयो ओर आपणी पाह्ड़िया रे नेड़े-तेड़े रिया जगा आशीष रिया बजा बनाणियां ओर मां बरखा रे बखतो दे बरखा करनिया, ओर से बरखा आशीर्वादो री बरखा ऊणी। 27 मैदानो रे डाल़ फलणे ओर जमीना आपणी उपज उपजाणी ओर सेयो आपणे देशो रे बिना डरे रणे, जेबे मां तिना रा जूँगड़ा तोड़ी की तिना लोका रे आथो ते छुड़ाणा, जो तिना ते सेवा कराओए, तेबे तिना खे पता लगी जाणा कि आऊँ ई यहोवा ए। 28 सेयो फेर जातिया-जातिया नि लुटणे ओर ना ई बणो रे डांगरा सेयो खाणे, सेयो बिना डरे रणे ओर सेयो केसी नि डराणे। 29 मां तिना खे उपजाऊ बगीचा लगाणा ओर सेयो देशो रे फेर पूखे नि मरने ओर ना परदेशी जातिया रे लोका फेर तिना री निन्दा करनी। 30 तिना खे पता लगी जाणा कि आऊँ परमेशर यहोवा, तिना साथे ए ओर सेयो जो इस्राएलो रे लोक ए, सेयो मेरी प्रजा ए, मां परमेशर यहोवे री येई बाणी ए। 31 तुसे तो मेरी पेडा-बाकरिया, मेरी चराईया रिया पेडा-बाकरिया ए, तुसे तो माणूं ए ओर आऊँ तुसा रा परमेशर ए, परमेशर यहोवे री येई बाणी ए।"