Ezequiel 15

बेकार अंगूरो री बेला रा उदारण

1 तेबे यहोवे रा ये सन्देश माखे मिलेया, 2 "ओ नाश ऊणे वाल़े माणूंआ, सबी डाल़ा बीचे अंगूरा री बेला री कोई अहमियत नि ए। अंगूरा री बेल जो जंगल़ो रे डाल़ा बीचे लगोई, तिदे कोई गुण नि ए। 3 तेतेरिया लकड़िया री कोई बी चीज नि बणदी, ओर ना केसी पांडे खे टांगणे खे तेते बीचा ते खूँडी बणी सकोई। 4 देख, लोक तेसा लकड़िया खे बाल़ने खे आगी दे फूकी देओए ओर तेतेरा से सब फूखी जाओआ, ओर से किजी कामो जोगी नि ऊँदी।" 5 देख, से आगी दे फूखणे ते पईले बी बेकार थी ओर आगी दे जल़ने ते बाद बी बेकार ई ए। तुसे तिजी ते कुछ नि बचाई सकदे। 6 इजी री खातर परमेशर यहोवा ईंयाँ बोलोआ, "जिंयाँ जंगल़ो रे डाल़ा बीचा ते अंगूरा री बेला खे आगी दे फूकी देओए, तिंयाँ ई मां यरूशलेमो रे लोक नाश करी देणे। 7 मां सेयो त्यागी देणे। तिना खे एड़ा लगणा कि सेयो बची गे रे पर फेर बी एक ओर आग ऊणी जेसा सेयो फूकी देणे। ओर जेबे मां तिना खे सजा देणी, तो तुसा लोका जो जिऊँदे रणे जाणी लणा तिना कि ये काम मैं यहोवे ई करी राखेया। 8 मां आपणे लोका रा देश उजाड़ी देणा, कऊँकि तिने लोके मां साथे विश्वासघात करी राखेया ए। परमेशर यहोवे री येई बाणी ए।"