Ezequiel 14

यहेजकेलो रा मूर्तिपूजा करने वाल़ेया री बेज्जती करना

1 तेबे एकी दिने बेबीलोनो दे जो इस्राएली गुलाम थे तिना रे कुछ मुखिया मांगे आये ओर सेओ मेरे सामणे बैठीगे। 2 तेबे यहोवे रा ये सन्देश माखे मिलेया। ओर तिने माखे बोलेया, 3 "ओ नाश ऊणे वाल़े माणूंआ, इने मुखिये आपणे दिलो दे मूर्तिया राखी लईया दिया ए। तिने एड़िया चीजा अपनाई राखिया ए जिना सेयो पापो दे फसाई देणे। आऊँ तिना री बिनती कऊँ सुणूँ?" 4 इजी री खातर तूँ तिना खे बोल, परमेशर यहोवा ईंयाँ बोलोआ, "हर इस्राएलिया बीचा ते कोई बी आपणी मूर्तिया आपणे मनो दे राखी की ओर आपणे पापो री ठोकर आपणे सामणे राखी की भविष्यबक्ते गे आओ, तेसखे मां यहोवे, तेसरी बऊत मूर्तिया रे मुताबिक ई ज्वाब देणा, 5 मां एड़ा इजी री खातर करना ताकि इस्राएली लोक, जिने आपणी मूर्तिया रिया पूजा करने रिया बजा ते आऊँ छाडीता, फेर तिना ईमानदारिया ते मेरी आराधना करनी।" 6 इजी री खातर इस्राएलो रे लोका खे ये सब बोलो, तिना खे बोलो मेरा स्वामी परमेशर यहोवा ईंयाँ बोलोआ, मां नेड़े आओ ओर आपणी गन्दी मूर्तिया खे छाडी देओ। ओर आपणे सारे घिनौने कामा ते मूँ फेरो। 7 कऊँकि तुसे इस्राएलो रे लोका बीचा ते ओर तेते बीचे रणे वाल़े परदेशिया बीचा ते बी कोई कऊँ नि ओ, जो मां पीछे चलणा छाडी की आपणी घृणित मूर्तिया आपणे मनो दे राखोगा ओर आपणे पापो री ठोकर आपणे सामणे राखो ओर तेबे आपणी कोई गल्ल मांते पूछणे खे भविष्यबक्ते गे आओगा, तो तेसखे मां यहोवे आपू ई ज्वाब देणा। 8 मां एड़े माणूंए रे खलाफ ऊई जाणा। मां तेसखे सजा देणी ओर से ओरी लोका रिया तँईं चिह्न बणना। लोका तेसरा मजाक उडाणा। मां से आपणे लोका बीचे नि रणे देणा, तेबे तुसा लोका खे पता लगी जाणा कि आऊँ ई यहोवा ए। 9 ओर जे कोई भविष्यबक्ता तोखा खाई की चूठी भविष्यबाणी करो, तो चाए मैं तेसखे से सन्देश देणे खे बी बोली राखेया ओ, तो बी मां से बारे निकयाल़ी देणा, ओर आपणे इस्राएली लोका बीचा ते बारे करी देणा। 10 तिना सबी लोका आपणे-आपणे पापा री सजा पाणी, मतलब जेड़ा भविष्यबक्ते खे पूछणे वाल़े रा पाप ठईरना, तेड़ा ई भविष्यबक्ते रा बी पाप ठईरना, ओर मां तिना दुनी खे सजा देणी। 11 ताकि बादो रे इस्राएलो रे लोक मां पीछे चलणा नि छाडो ओर ना आपणे कई प्रकारा रे पापा रिया बजा ते अशुद्ध बणो, बल्कि सेयो मेरी प्रजा बणो ओर आऊँ तिना रा परमेशर ठईरूँ, परमेशर यहोवे री येई बाणी ए।

यहोवे रा इस्राईलो खे सजा देणा

12 तेबे यहोवे रा ये सन्देश माखे मिलेया, 13 "ओ नाश ऊणे वाल़े माणूंआ, जेबे केसी देशो रे लोक मां साथे विश्वासघात करी की पापी ऊई जाओ ओर आऊँ आपणा आथ तेस देशो रे खलाफ बढ़ाई की नज्ज आऊणे रा जरिया दूर करुँ ओर तिदे अकाल़ ल्याई की तेथा ते माणूं ओर डांगर दोनो नाश करी देऊँ, 14 तेबे चाए तिदे नूह, दानिय्येल ओर अय्यूब यो तीनो मर्द ओ, तेबे बी सेयो आपणे तर्मो रे जरीये आपणे ई प्राण बचाई सकणे, परमेशर यहोवे री येई बाणी ए।" 15 परमेशरे बोलेया जे आऊँ केसी देशो दे जंगल़ी जानवर पेजूँ ओर से अमला करी की कई माणूंआ खे काई देयो ओर जानवरो रिया बजा ते तिदे कोई नि जाओ, 16 जे यो तीनो तर्मी माणूं नूह, दानिय्येल ओर अय्यूब तेती रये ऊँदे, तेबे बी परमेशर यहोवे री ये बाणी ए कि मेरी जिन्दगिया री कसम, सेयो आपणे माठे-बेटिया खे नि बचायी सकदे, सेयो ई कल्ले बचणे, पर देश उजाड़ ऊई जाणा। 17 परमेशरे बोलेया, "क्या तेस देशो रे खलाफ लड़ने खे आऊँ दुश्मणो री सेना खे पेजी सकूँआ? तिना सैनिका से देश तलवारे की नाश करी देणा। मां से देशो ते सारे लोक ओर डांगर निकयाल़ी की बारे करने। 18 तेबे तिदे चाए सेयो तीन मर्द बी ऊँदे तेबे बी परमेशर यहोवे री ये बाणी ए कि मेरी जिन्दगिया री कसम, सेयो आपणे माठे-बेटिया खे बी मरने ते नि बचायी सकणे थे, सेयो ई कल्ले बचणे थे कऊँकि सेयो तो तर्मी थे। 19 जे आऊँ तेस देशो दे बमारी फैलाऊँ ओर तिदे आपणा रोष पड़काई की तेसरा खून एड़ा बह्ईणे देऊँ कि तेथो रे माणूं ओर डांगर दोनो नाश ओ, 20 तेबे तिदे चाए सेयो तीन मर्द मतलब नूह, दानिय्येल ओर अय्यूब बी तिदे ऊँदे तेबे बी परमेशर यहोवे री ये बाणी ए कि मेरी जिन्दगिया री कसम, सेयो आपणे माठे-बेटिया खे बी मरने ते नि बचायी सकणे थे, सेयो ई कल्ले आपणे तर्मो रिया बजा ते बचणे थे।" 21 इजी री खातर एबे आऊँ, परमेशर यहोवा ईंयाँ बोलूँआ, "मां यरूशलेमो रे लोका पाँदे आपणे चारो दण्ड पऊँचाणे, जेते की तिना खे बऊत पारी सजा मिलणी। कुछ लोक ओर जानवर तलवारे की मरने, कुछ अकाल़ो रिया बजा ते मरने, कुछ जंगल़ी जानवरा रे अमले ते मरने, ओर कुछ विपत्तिया रिया बजा ते नाश ऊई जाणे।*14:21 प्रका. 6:8 22 तेबे बी तुसा रे कुछ लोक जिऊँदे बची जाणे, जवान ओर बच्चे दोनों। ओर जेबे तुसा तिना रे बुरे काम ओर बर्ताओ देखणा, तेबे तुसा समजी जाणा कि यरूशलेमो रे लोका पाँदे तिना कईया बड़ी विपत्तिया खे पेजणे री खास बजा थी जो मैं तिना पाँदे पेजिया थिया। 23 जेबे तुसे तिना रा चाल-चलण ओर काम देखो, तेबे सेयो तुसा री शान्तिया री बजा ऊणे ओर तुसा खे पता लगी जाणा कि मैं जो कुछ यरूशलेमो दे इस्राएली लोका साथे जो करी राखेया, से बिना बजा ते नि कित्तेया, परमेशर यहोवे री येई बाणी ए।"