Ezequiel 20

इस्राएलो रा बिद्रोह

1 म्हारे गुलामिया दे गये दे पाँजुए मीन्ने रे दसुए दिने इस्राएलो रे कुछ बुजुर्ग मांगे आए। ये सातुआ साल था जेबे आसे बेबीलोनो दे बन्दी थे। परदान मां सामणे बैठी रे थे। सेयो चाओ थे कि आऊँ यहोवे ते कुछ सन्देश पूछूँ। 2 तेबे यहोवे माखे बोलेया, 3 "ओ नाश ऊणे वाल़े माणूंआ, इस्राएली बुजुर्गा खे ईंयाँ बोल, परमेशर यहोवा ईंयाँ बोलोआ, तुसे बोलोए कि तुसे मांते कोई सन्देश चाओए। आऊँ तुसा खे बोलूँआ कि मेरी जिन्दगिया री कसम, मां तुसे ईंयाँ आपू नेड़े नि आऊणे देणे। 4 ओ नाश ऊणे वाल़े माणूंआ, तिना रा न्याय कर ओर तिना खे दोषी ठरा। ओर तिना खे बोल कि तिना रे बुजुर्गा रे घिनौने काम कितणे बुरे थे। 5 ओर तिना खे बोल, परमेशर यहोवा ईंयाँ बोलोआ: जेस दिने मैं इस्राएलो रे लोक चूणी ले ओर याकूबो रे कुलो ते कसम खाई ओर मिस्र देशो दे आपणे आपू खे प्रगट कित्तेया ओर तिना साथे कसम खाई की बोलेया, आऊँ तुसा रा परमेशर यहोवा ए। 6 तेस दिने ई मैं तिना खे ये बी कसम खाई कि मां तुसे मिस्र देशो ते निकयाल़ी की एक देशो दे पऊँचाणे, जो मैं तुसा रिया तँईं चूणी ला रा, से सबी देशो ते जादा सुन्दर ए ओर तिदे दूद ओर सयीतो रिया खाड्डा बह्ओईया।" 7 तुसा बीचा ते हे एकी खे आपणियां-आपणियां घिनौनिया मूर्तिया दूर करनिया चाईयो जिना ते तुसे प्यार करो थे, ओर मिस्रो रे देवतेया रिया मूर्तिया साथे आपू खे अशुद्ध नि करो। कऊँकि आऊँ ई तुसा रा परमेशर यहोवा ए। 8 पर सेयो मेरे खलाफ ऊईगे ओर तिने मेरी एक नि सुणनी चायी, जिना घृणित मूर्तिया ते सेयो प्यार करो थे, सेयो किने बी सेटिया नि ओर ना मिस्रो रिया मूर्तिया छाडिया। तेबे मैं बोलेया, "मां एथी मिस्र देशो दे तुसा खे सजा देणी ओर पूरा कोप दखाणा। 9 तेबे बी मैं आपणे नाओं रे मुताबिक एड़ा कित्तेया कि जिना बीचे सेयो थे ओर जिना सामणे आऊँ तिना खे मिस्र देशो ते काडणे खे सामणे आया था तिना जातिया सामणे सेयो अपवित्र नि ठईरो। 10 आऊँ इस्राएलो रे परिवारो खे मिस्रो ते बारे निकयाल़ी की रेगिस्तानो दे ली आया। 11 तेती मैं तिना खे आपणी बिधिया बताईया ओर आपणे बिधान बी बताए ताकि जो कोई माणूं तिना खे मानो, से तिना रिया बजा ते जिऊँदा रओ। 12 तेबे मैं तिना रिया तँईं आपणे रामो रे दिन ठराए जो मेरे ओर तिना बीचे नशाण ठईरे ताकि सेयो जाणो कि आऊँ परमेशर तिना खे पवित्र करने वाल़ा ए। 13 तेबे बी इस्राएलो रे लोके मां साथे रेगिस्तानो दे बगावत कित्ती, सेयो मेरी बिधिया पाँदे नि चले ओर मेरे बिधान तुच्छ जाणे, जिना खे जे माणूं मानो तो से तिना खे मानी की जिऊँदा रणा ओर तिने मेरे रामो रे दिन बऊत अपवित्र करीते।" तेबे मैं बोलेया, "इजी बजा ते आऊँ तिना ते बऊत नराज था। मैं तिना खे तेथी रेगिस्तानो दे नाश करने रा फैंसला करी ला था, 14 पर मैं आपणे तर्मी नाओं रे मुताबिक एड़ा कित्तेया कि सेयो तिना जातिया सामणे, जिना सामणे ते आऊँ तिना खे निकयाल़ी की ल्याया था, अपवित्र नि ठईरो। 15 तेबे मैं रेगिस्तानो दे तिना ते कसम खाई कि जो देश मैं तिना खे देईता रा ओर जो सबी देशा बीचे सुन्दर ए, जिदे दूद ओर सयीतो रिया खाड्डा बह्ओईया, तिदे सेयो नि पऊँचाणे।" 16 कऊँकि तिना खे मेरे नियम तुच्छ लगे ओर मेरी बिधिया पाँदे नि चले ओर मेरे रामो रे दिन अपवित्र कित्ते थे, कऊँकि तिना रा मन तिना री मूर्तिया रिया तरफा खे लगेया रा रया। 17 तेबे बी मैं तिना पाँदे दया री नजर कित्ती ओर सेयो नाश नि कित्ते ओर ना ई सेयो रेगिस्तानो दे पूरी तरअ ते नाश कित्ते। 18 तेबे मैं रेगिस्तानो दे तिना री ल्वादा खे बोलेया, "आपणे बुजुर्गा री बिधिया पाँदे नि चलो, ना तिना री रवाजा खे मानो ओर ना तिना री मूर्तिया री पूजा करी की आपू खे अशुद्ध करो। 19 आऊँ तुसा रा परमेशर यहोवा ए, मेरी बिधिया पाँदे चलो ओर मेरे बिधान मानणे दे चौकसी करो 20 ओर मेरे रामो रे दिनो खे पवित्र मानो कि सेयो मेरे ओर तुसा बीचे नशाण ठईरो ओर जेते कि तुसे जाणो कि आऊँ तुसा रा परमेशर यहोवा ए।" 21 पर तिना रे बच्चेया बी मां साथे बगावत कित्ती, सेयो मेरी बिधिया पाँदे नि चले, ना मेरे बिधानो खे मानणे दे चौकसी कित्ती, जिना खे जे माणूं मानो तो सेयो तिना रिया बजा ते जिऊँदे रओ। तिने मेरे रामो रे दिनो रे बारे दे मेरे बिधानो रा पालण ना करी की से अपवित्र कित्तेया। इजी बजा ते आऊँ तिना ते बऊत नराज था। आऊँ तिना खे तेथी उजाड़ जगा दे नाश करने खे त्यार था। 22 पर मैं आपणे आपू खे रोकेया। ओर आपणे नाओं रे मुताबिक एड़ा कित्तेया कि तिना जातिया सामणे जिना सामणे आऊँ इस्राएलिया खे निकयाल़ी की ल्याया था, सेयो अपवित्र नि ठईरो। 23 तेबे मैं उजाड़ जगा दे तिना ते कसम खाई कि मां तुसे जातिया-जातिया बीचे तित्तर-बित्तर करी देणे। 24 इस्राएलो रे लोके मेरिया बिदिया नि मानिया। तिने बिधानो खे मानणे खे ना करिती। ओर रामो रे दिनो खे तिने अशुद्ध कित्तेया। सेयो तिना मूर्तिया री पूजा करने खे बऊत ई उत्सुक थे जिना री पूजा तिना रे बुजुर्ग करेया करो थे। 25 तेबे मैं तिना खे एड़िया-एड़िया बिधिया ठराईया जो अच्छिया नि थिया ओर एड़िया-एड़िया रवाजा जिना रिया बजा ते सेयो जिऊँदे नि रयी सको। 26 मैं सेयो तिना रिया ई पेंटा रिया बजा ते अशुद्ध ऊणे दित्तेया, ओर आपणे सबी जेठेया पाऊआ खे आगी दे बलि करने दित्तेया। ये सब तिना खे सजा देणे ओर ये दखाणे रिया तँईं था कि आऊँ ई यहोवा ए। 27 ओ नाश ऊणे वाल़े माणूंआ, तूँ इस्राएलो रे लोका खे बोल, परमेशर यहोवा ईंयाँ बोलोआ: इस्राएलो रे लोके मेरे खलाफ चूठिया गल्ला बोलिया ओर मेरे खलाफ बुरिया योजना बणाईया। 28 कऊँकि जेबे मैं सेयो तेते देशो दे पऊँचाए, जेतेखे तिना खे देणे री कसम मैं खाई थी, तेबे सेयो हर एक ऊच्चे टीले ओर हर एक कणे डाल़ा पाँदे नजर करी की तेथी आपणे मेलबलि चढ़ाणे लगे ओर तेथी आपणी पेंटा चढ़ाणे लगे ओर माखे बऊत रोष चढ़ांदे रये, तेथी आपणा खुशबूदार तेल ओर तेथी आपणे अर्घ देणे लगे। 29 तेबे मैं इस्राएलिया ते पूछेया, "जेती ऊच्ची जगा दे तुसे लोक जाओए, तेते रा क्या मतलब ए? इजी बजा तेई तेथो खे आजो तक बामा*20:29 बामा ऊच्ची जगा बोलेया जाओआ।" 30 यहोवे यिर्मयाह खे बोलेया, "इजी री खातर इस्राएलो रे लोका खे बोल, परमेशर यहोवा तुसा ते ये पूछोआ: क्या तुसे बी आपणे बुजुर्गा जेड़े आपू खे अशुद्ध करी देओए? तुसे मां साथे वफादार नि ए। इजी रे बदले क्या तुसे घृणित मूर्तिया री पूजा करी की व्याभिचारणिया रे काम करदे रणा चाओए?" 31 आज बी तुसे सेई आपणी पेंटा चढ़ाओए ओर आपणे बाल-बच्चेया खे आगी दे बलि करी की आपू खे अशुद्ध करोए। चढ़ाओए, ओर फेर तुसे इस्राएलो रे लोक एबु बी ये पूछणे खे आओए कि मेरी इच्छा क्या ए! परमेशर यहोवे री ये बाणी ए कि मेरी जिन्दगिया री कसम तुसे मांते कुछ पनि पूछी सकणे। 32 जो गल्ल तुसा रे मनो दे आओई कि आसा लक्कड़ ओर पात्थरो रिया मूर्तिया रे पुजारी ऊई की दूजी जातिया रे ओर देश-देशो रे कुलो जेड़े ऊई जाणे, से किंयाँ बी पूरी नि ऊई सकदी।

परमेशरो इस्राएल दुबारा बसाणा

33 आऊँ परमेशर यहोवा ईंयाँ बोलूँआ, "मेरी जिन्दगिया री कसम मां आपणी बड़ी शक्तिया साथे ओर बड़े पारी रोषो दे आई की तुसा पाँदे राज करना।*20:33 यिर्म. 21:6 34 मां तागतबर आथ ओर बढ़ाई रिया बाई ते, ओर पड़काई री जलजलाहटा साथे तुसे देश-देशो रे लोका बीचा ते लग करने ओर तिना देशो रे जेती तुसे तित्तर-बित्तर ऊईगे थे, कट्ठे करने। 35 ओर मां तुसे एकी उजाड़ जगा दे लई जाणे, जो दूजी जातिया रे लोके चऊँ कनारा ते केरी राखेया ए। तेती मां तुसा रे आमणे-सामणे तुसा रा न्याय करना। 36 मैं तुसा रे बुजुर्गा खे उजाड़ जगा दे तेबे सजा दित्ती थी जेबे सेयो मिस्रो ते बारे आए थे। मां तुसा खे बी तिंयाँ ई सजा देणी। मां परमेशर यहोवे री येई बाणी ए।" 37 मां तुसे डण्डे रे सारे चलाणे ओर तुसे वाचा रे बन्दनो दे पाणे। 38 मां तुसा बीचा ते सारे बगावत करने वाल़े निकयाल़ी की जो मेरा अपराद करोए, तुसे शुद्ध करने ओर जेस देशो दे सेयो टिकोए, तेथा ते सेयो मां निकयाल़ी की ल्याऊणे, पर इस्राएलो रे देशो रे कूसणे नि देणे, तेबे तुसा खे पता लगी जाणा कि आऊँ ई यहोवा ए। 39 ओ इस्राएलो रे लोके, तुसा खे तो परमेशर यहोवा ईंयाँ बोलोआ: जाई की आपणी-आपणी देवतेया री मूर्तिया री आराधना करो ओर जे तुसे मेरी नि सुणोगे, तो बादो ते बी एड़ा ई करेया करो, पर मेरा पवित्र नाओं आपणी पेंट ओर मूर्तिया रे जरीये अपवित्र नि करना। 40 कऊँकि परमेशर यहोवा ईंयाँ बोलोआ कि इस्राएलो रा सारा कराना आपणे देशो रे मेरे पवित्र सिय्योन पाह्ड़ो पाँदे, इस्राएलो रे ऊच्चे पाह्ड़ो पाँदे, सारे के सारेया मेरी आराधना करनी, आऊँ तेथी तिना ते खुश ऊणा ओर तेथी मां तुसा रिया चकी रिया पेंटा ओर चढ़ाई रिया खरिया-खरिया चीजा ओर तुसा रिया सब पवित्र कित्तिया रिया चीजा तुसा ते लया करूँगा। 41 मां तुसे देशो ते ओर तिना सबी जगा ते वापस ल्याऊणे तेती तुसे रंदे आई रे। तेबे मां तुसा रा स्वागत करना, जेड़े कि माखे खुश करने वाल़ा खुशबू देणे वाल़ा तूप। जेबे मां तुसा बीचे रणा, तो मां ओरी सबी देशा खे दखाणा कि आऊँ पवित्र ए।*20:41 यहे. 28:25 42 जेबे आऊँ तुसा खे इस्राएलो रे देशो रे पऊँचाऊँ, जेतेखे देणे री कसम मैं तुसा रे बुजुर्गा ते खाई थी, तेबे तुसा खे पता लगी जाणा कि आऊँ ई यहोवा ए। 43 तेती तुसा आपणा चाल-चलण ओर आपणे सारे काम जिना खे करी की तुसे अशुद्ध ऊई रे याद करने ओर आपणे बुरे कामो रिया बजा ते आपणी नजरा रे घिनौने ठईरने। 44 ओ इस्राएलो रे कराने, जेबे आऊँ तुसा साथे तुसा रे बुरे चाल-चलण ओर बिगड़े रे कामो रे मुताबिक नि, पर आपणे ई नाओं रे मुताबिक बर्ताव करुँ, तेबे तुसा खे पता लगी जाणा कि आऊँ ई यहोवा ए, परमेशर यहोवे री येई बाणी ए।

दक्खण देशो रे बणो दे आग

45 तेबे यहोवे रा ये सन्देश माखे फेर मिलेया, 46 "ओ नाश ऊणे वाल़े माणूंआ, आपणा मूँ इस्राएलो रे दक्खण दिशा रिया जगा खे कर, दक्खणा रिया जगा खे वचन सुणा ओर दक्खण देशो रे बणो*20:46 दक्खण देशो रे बणो यरूशलेम रे बारे दे भविष्यबाणी कर।" 47 दक्खण देशो रे बणो खे बोल, परमेशर यहोवे रा ये वचन सुण, परमेशर यहोवा ईंयाँ बोलोआ, "मां तांदे आग लगाई देणी, ओर जितणे तेरे अरे, सूके, जितणे बी डाल़ ए, सेयो सारे आगी दे फूखी जाऊणे, तेती आग नि बिजणी ओर तिजी री बजा ते दखणो ते लई की उत्तरो तक सबी रे मूँ फूखी जाऊणे। 48 तेबे सबी लोका खे पता लगणा कि ये आग यहोवे री लगाई रिये ओर ये कदी नि बिजणी।" 49 तेबे मैं परमेशरो ते शकाईत करी की बोलेया, "ओ परमेशर यहोवा, जेबे आऊँ एड़िया गल्ला लोका खे बोलूँआ, तो सेयो लोक मेरे बारे दे बोलेया करोए कि ये तो सिर्फ काअणी ई बोलेया करोआ।"