Ezequiel 40

एकी दर्शणो दे यहेजकेलो रा यरूशलेमो दे पऊँचाया जाणा

1 पच्चीये सालो दे जेबे आसे बाबेलो दे गुलाम थे, मैं यहोवे री शक्ति आपू पाँदे महसूस कित्ती। ये सालो रे पईले मीन्ने रे दसुए दिने ऊआ। बाबेलो रे सिपाईया रे जरीये यरूशलेम शईरो खे नाश कित्ते दे चौदा साल ऊई चुके दे थे। एकी दर्शणो दे, परमेशर माखे यरूशलेम लईगा। 2 आपणे दर्शणो दे परमेशरे आऊँ इस्राएल देशो रे पऊँचाया ओर तेती एक बऊत ऊच्चे पाह्ड़ो पाँदे खड़ा कित्तेया, जेते पाँदे दक्खण तरफा खे तिना मञ्जला खे देखी कि केसी शईरो रा आकार लगो था। 3 जेबे यहोवा माखे तेती नेड़े लईगा, तेबे मैं एक आदमी देखेया जेसरी शक्ल पीतल़ी जेड़ी चमकणे लगी री थी, तिने आपणे आथो दे रेशमो री नापणे री रस्सी ओर एक नापणे रा डण्डा पकड़ी राखेया था। से मन्दरो रे पीतरे जाणे वाल़े द्वारो गे खड़ी रा था।*40:3 प्रका. 11:1, प्रका. 21:15 4 तिने दशणे वाल़े मर्दे माखे बोलेया, "ओ नाश ऊणे वाल़े माणूंआ, आपणी आखी साथे देख, ओर आपणे कानो साथे सुण; ओर जो कुछ मां ताखे दखाणा तिना सबी पाँदे त्यान दे, कऊँकि तूँ इजी री खातर एती पऊँछायी राखेया ताकि आऊँ ताखे इना गल्ला दखाऊँ ओर जो कुछ देखे से सब कुछ इस्राएलो रे लोका खे बताए।"

5 आऊँ मन्दरो री जगा खे पुरिया तरआ ते केरे दे एक दवाल देखी सकूँ था। तिने माणूंए आथो दे नापणे रा डण्डा लई ला जो साडे दस फुट लाम्बा था ओर दवाल नापी, ओर दवाल साडे दस फुट मोटी ओर साडे दस फुट ऊच्ची थी।*40:5 प्रका. 21:15 6 फेर दशणे वाल़ा मर्द पूर्बा रिया तरफा खे तेस बड़े द्वारो गे गया। पैड़िया पाँदे चढ़ी की बड़े द्वारो री दोनो देऊल़ी री चौड़ाई नापी जो नापणे रे डण्डे बराबर थी। 7 बड़े द्वारो गे सबी कनारे चौकीदारा रे कमरे बणी रे थे। इना रा हर कमरा नापणे रे डण्डे बराबर चौड़ा ओर लाम्बा था, इना कमरेया बीचलिया बाटा री दवाला समेत दूरी साडे सात फुट थी। बड़े द्वारो री पीतरली देऊल़, जो पीतरे जाणे री बाट बड़े दरवाजे ते पीतरे आँगणो गे मन्दरो रिया तरफा खे थी, से बी ओरा ते लई की पोरो तक साडे दस फुट थी। 8 तिने से कमरा नापेया तो देखेया कि से चौदा फुट चौड़ा था। ये पीतरे जाणे वाल़े दरवाजे रा कनारा था जो सबी ते नेड़े था। 9 ये चौदा फुट चौड़ा था, ओर एतेरे खम्बे साडे तीन फुट मोटे थे। ये पीतरे जाणे वाल़ा कमरा बड़े द्वारो रे पीतरले कनारे पाँदे था, जेतेरा रा मूँ मन्दरो रिया तरफा खे था। 10 पूर्वी बड़े द्वारो रे बरामदे रे दुँईं तरफा खे तीन-तीन पईरेदारा रे कमरे एकी आकारो रे थे। हर कमरे दे बीचे कांदा बी एकी जेड़िया थिया। 11 तेबे तिने माणूंए बड़ा द्वार नापेया, जो की खुलणे पाँदे साडे सतारा फुट चौड़ा था, ओर पीतरे जाणे वाल़े द्वारो री बाट साडे बाई फुट चौड़ी थी। 12 हर पईरेदारा रे कमरे रे आगे इक्की ईंच एक कांद थी। कमरे हर तरफा दे साडे दस फुट थे। 13 तेबे तिने बड़े द्वारो री सारी चौड़ाई नापी, ओर सामणे वाल़े पईरेदारा रे कमरे रिया पिछलिया कांदा बीचली दूरी नापी; ये दूरी लगभग चवाल़ी फुट थी। ओर द्वार आमणे-सामणे थे। 14 तेबे तिने बड़े द्वारो रे पीतरा ते लई की पीतरे जाणे वाल़े कमरे तको री बीचलिया कांदा नापिया, तिना री दूरी 105 फुट थी। 15 बड़े द्वारो री बाट एकी कनारा ते लई की दूजे कनारे तक साडे सतासी फुट थी। 16 पईरेदारा री कमरे रे ओर बड़े द्वारो ते पीतरे चऊँ कनारे कमरे रे बीचले खम्बेया रे बीचे-बीचे झिलमिलदार द्वारिया थिया ओर खम्बेया रे द्वारो दे तेड़िया ई थिया ओर बड़े द्वारो रे पीतरे चऊँ कनारे द्वारिया थिया ओर हर एक खम्बे दे खजूरी रे डाल़ बणाई राखे थे।

मन्दरो रा बारला आँगण

17 तेबे दशणे वाल़ा मर्द माखे बारले आँगणो दे लईगा ओर तेस आँगणो रे चऊँ कनारे कमरे थे ओर एक मेल्ला बणी रा था, जेते पाँदे तीई कमरे बणी रे थे। 18 ये मेल्ला, मतलब थालला मेल्ला बड़े द्वारो साथे लगेया दा था ओर तिना री लम्बाईया रे मुताबिक था। 19 तेबे दशणे वाल़े माणूंए मन्दरो रे आँगणो दे बारे ओर पीतरे जाणे वाल़े द्वारा रे बीचली दूरी नापी; जो 175 फुट थी।

उत्तर दिशा रा द्वार

20 ओर क्या देखेया कि उत्तरा रिया तरफा खे एक बड़ा द्वार था, जो बारले आँगणो ते जुड़ेया दा था। तिने तेसरी लम्बाई ओर चौड़ाई नापी, 21 एती बी हर तरफा खे तीन पईरेदारा रे कमरे थे, जिना दे बांडणे वाल़िया कांदा ओर एक पीतरे जाणे वाल़ा बरांडा था। सारे नाप पूर्बो रे बड़े द्वारो ते मेल खाओ थे। पीतरे जाणे वाल़े दरवाजे री बाट साडे सतासी फुट लाम्बी ओर साडे तेताल़ी फुट चौड़ी थी, जो सामणे वाल़े पईरेदारा रे कमरेया री पिछली कांदा बीचे थी। 22 इजी दे बी द्वारिया रे ओर खम्बेया रे आँगण ओर खजूरी री नपाई पूर्बो रे बड़े द्वारो री जी थी ओर एते पाँदे चढ़ने खे सात पैड़िया थिया ओर तिना सामणे एतेरा आँगणा था। 23 जेड़ा पूर्बा रिया तरफा खे बड़ा द्वार था तेड़ा ई उत्तरा रिया तरफा खे बी था, जो मन्दरो रे पीतरले आँगणो रिया तरफा खे जाओ था, जो बारले बड़े द्वारो रे सामणे था। दुनी पीतरे आऊणे वाल़े द्वारा बीचली दूरी 175 फुट थी।

दक्खणा रा बड़ा द्वार

24 तेबे दशणे वाल़ा मर्द माखे दक्खणा रिया तरफा खे लईगा ओर तेती बी एक बड़ा द्वार था; ओर तिने एतेरे खम्बे ओर खम्बेया रा आँगण नापेया जो इना जेड़ा ई था। 25 इजी दे कांदा साथे द्वारिया थिया, जेड़े तिना सबी दे थिया, ओर एक आऊणे रा कमरा था जेथा ते बड़े द्वारो री बाट बारे आँगणो खे खुलो थी। ओर सबी जेड़े, बड़े द्वारो री बाट साडे सतासी फुट लाम्बी ओर साडे तेताल़ी फुट चौड़ी थी जो सामणे बणे दे पईरेदारा रे कमरे रिया पिछली कांदा रे बीचे थी। 26 इदे बी चढ़ने खे सात पैड़िया थिया ओर तिना सामणे खम्बेया री कांद थी ओर दुँईं कनारले खम्बेया पाँदे खजूरी रे डाल़ बणाई राखे थे। 27 ओर एती बी, बारले बड़े द्वारो रे सामणे, एक ओर बड़ा द्वार था जो पीतरे आँगणो दे जाओ था। दुनी बड़े द्वारा बीचली दूरी 175 फुट थी।

पितरले आँगणो रे तीन बड़े द्वार

28 तेबे दशणे वाल़ा मर्द माखे दक्खणा रे बड़े द्वारो रिये ऊई की पीतरले आँगणो दे लईगा ओर तिने दक्खणा रा बड़ा द्वार नापेया जो ओरी जेड़ा ई था। 29 इजी रा पईरेदारा रा कमरा, बीचलिया कांदा ओर ब्रंडा ओरी जेड़े ई आकारो रे थे। इजी रिया कांदा दे ओर ब्रंडे दे द्वारिया बी थिया। ओर ओरी जेड़े, आँगण साडे सतासी फुट लाम्बा ओर साडे तेताल़ी फुट चौड़ा था। 30 पीतरले ब्रंडे दे चऊँ कनारे द्वार थे से ब्रंडा नौ फुट लाम्बा ओर साडे तेताल़ी फुट चौड़ा था। 31 एते द्वारो खे पीतरे आऊणे रा ब्रंडा बारले आँगणो रिया तरफा खे था ओर इजी रे खम्बेया पाँदे बी खजूरी रे डाल़ बणी रे थे ओर बड़े द्वारो पाँदे चढ़ने खे आठ पैड़िया थिया।

पितरला आँगण पूर्वो रा बड़ा द्वार

32 तेबे दशणे वाल़ा मर्द माखे पूर्बो रिया तरफा खे पीतरले आँगणो दे लईगा ओर तेते तरफा रे बड़े द्वार नापे ओर सेयो बी तेड़े ई थे। 33 इदे बी पईरेदारा रे कमरे, कांदा ओर ब्रंडा ओरी जेड़े ई आकारो रे थे, ओर कांदा साथे ब्रंडे दे द्वारिया थिया। आँगण साडे सतासी फुट लाम्बा ओर साडे तेताल़ी फुट चौड़ा था। 34 इजी रा ब्रंडा बी बारले आँगणो रिया तरफा खे था ओर तेतेरे दुँईं कनारे खम्बेया पाँदे खजूरी रे डाल़ बणी रे थे ओर बड़े द्वारो पाँदे बी चढ़ने खे आठ पैड़िया थिया।

पितरला आँगण उत्तरो रा बड़ा द्वार

35 तेबे दशणे वाल़े मर्दे आऊँ उत्तरो रे बड़े द्वारो रिया तरफा खे निया ओर से नापेया ओर तेतेरा नाप बी ओरी जेड़ा ई था। 36 तिदे बी बड़े द्वारो गे पईरेदारा रे कमरे, कांदा ओर ब्रंडे रा नाप ओरी बड़े द्वारा रे बराबर ई था ओर द्वारिया बी तिंयाँ ई ओरी जेड़िया थिया। बड़े द्वारो रा आँगण साडे सतासी फुट लाम्बा ओर साडे तेताल़ी फुट चौड़ा था। 37 इजी रे खम्बेया रा ब्रंडा बारले आँगणो रिया तरफा खे था ओर इजी रे खम्बेया पाँदे बी खजूरी रे डाल़ बणी रे थे ओर बड़े द्वारो पाँदे चढ़ने खे आठ पैड़िया थिया।

बलिदान त्यार करने रे कमरे

38 तेबे बड़े द्वारो गे खम्बेया रे नेड़े द्वारो गे एक कमरा था, जेती पुरोईत डांगरा रिया लोथा खे तोई की तिना खे बलिया रे रूपो दे फूकी देयो थे। 39 एते ब्रंडे दे चार मेज थे, कमरे रे हर तरफा खे दो-दो। इना मेजा पाँदे ई सेयो डांगरा खे काओ थे जिना खे पापबलिया रे रूपो दे चढ़ाया जाओ था, या तो तिना खे पूरा फुकी देयो थे या पापो रिया तँईं या फेर दोषबलिया खे बलि चढ़ाया जाओ थी। 40 बड़े द्वारो रे बारले एक तरफा खे, मतलब उत्तरी द्वारो री चढ़ाईया पाँदे दो मेज थे ओर तेतेरे दूजे कनारे पाँदे बी, जो बड़े द्वारो रे ब्रंडे गे थी, दो मेज थे। 41 इजी री खातर तेती कुल मलाई की आठ मेज थे जिना पाँदे बलि करने वाल़े डांगरो खे फाटेया जाओ था; चार कमरे रे पीतरे ओर चार बारे आँगणो दे, 42 तेबे होमबलिया खे बी कअड़े रे पात्थरा रे चार मेज थे, जो साडे कत्ती ईंच लाम्बे, साडे कत्ती ईंच चौड़े ओर इक्की ईंच ऊच्चे थे, तिना मेजा पाँदे बलि करने वाल़े डांगरो खे फाटणे रिया तँईं छुरी ओर अथियार राखे जाओ थे। 43 पीतरे चऊँ कनारे कांदा दे तीन ईंच लाम्बे ऊक लगी रे थे। ओर बलिदानो रा मास मेजा पाँदे राखेया जाओ था। 44 पीतरले आँगणो रे उत्तरो दे बड़े द्वारो रे बारे गाणेवाल़ेया रे कमरे थे जिना रे द्वार दक्खणा रिया तरफा खे थे ओर पूर्वा दे बड़े द्वारो रिया तरफा खे एक कमरा था, जेतेरा द्वार उत्तरो रिया तरफा खे था। 45 दशणे वाल़े मर्दे माखे बोलेया, "ये कमरा, जेतेरा द्वार दक्खणा रिया तरफा खे ए, तिना पुरोईता खे ए, जो मन्दरो री रखवाल़ी करोए। 46 दक्खणा रे द्वारो रे नेड़े रा कमरा तिना पुरोईता खे ए जो बेदिया पाँदे परमेशरो री सेवा करोए। यो सादोक पुरोईतो री ल्वाद ए। सेयो लेविया रे वंशो रे ए जो यहोवे री सेवा-टईल करने रिया तँईं तेसरे नेड़े जाई सकोए।"

पितरला आँगण ओर मन्दर

47 फेर स्वर्दूतो जेड़े दशणे वाल़े माणूंए पितरला आँगण नापेया जो चकोर था, मतलब 175 फुट लाम्बा ओर 175 फुट चौड़ा था। बेदी मन्दरो रे सामणे आँगणो दे थी। 48 फेर दशणे वाल़ा मर्द माखे मन्दरो रे पीतरे ब्रंडे दे लईगा। तिने ब्रंडे रे द्वारो रे दुँईं कनारलिया कांदा नापिया, ओर सेयो साडे आठ फुट मोटिया थिया। बड़ा द्वार साडे चौबी फुट चौड़ा था, ओर बड़े द्वारो रे हर तरफा खे कांदा साडे पाँज फुट जादा लाम्बिया थिया। 49 ब्रंडा पैंती फुट चौड़ा ओर इक्की फुट गईरा था। इजी दे जाणे खे दस पैड़िया थिया, ओर हर तरफा खे एक खम्बा था।