Ezequiel 26

सोर शईरो रे खलाफ न्याय

1 ग्यारुए सालो रे पईले मीन्ने रे पईले दिने यहोवे रा ये सन्देश माखे मिलेया, 2 "ओ नाश ऊणे वाल़े माणूंआ, सोर शईर जो यरूशलेम शईरो रे नाशो पाँदे खुश ऊई की बोलणे लगी रा, वा! वा! से जो पूर्बा रिया तरफा खे समृद्ध बपार करने खे जाणे रा द्वार था, से टुटीगा रा ए, ओर आऊँ तेतेरा वारिस आ। कऊँकि से उजड़ी गा दा ए, इजी री खातर आऊँ तनवान ऊई जाणा।" 3 इजी बजा ते परमेशर यहोवा ईंयाँ बोलोआ, "ओ सोर, देख, आऊँ तुसा रे खलाफ ए ओर मां एड़ा करना कि बऊत सारिया जातिया तेरे खलाफ एड़िया उठणियां जेड़िया समुद्रो रिया लईरा उठोईया। 4 देशा पाँदे अमला करने वाल़िया सेना सोर शईरो री दवाल रूड़ाई देणी ओर तेथो रे गुम्मट तोड़ी देणे ओर मां तेते पाँदा ते तेतेरी माट्टी खरेची की से नांगी चट्टान बणाई देणी। 5 से समुद्रो बीचे जाल़ बछाणे री जगा ई ऊई जाणी; कऊँकि परमेशर यहोवे री येई बाणी ए ओर से दुश्मण देशा ते लूटी जाऊणी; 6 ओर तेसरे उपजाऊ जमीना रे गांव तलवारी की नाश ऊई जाणे। तेबे तिना जाणी लणा कि आऊँ ई यहोवा ए।" 7 कऊँकि परमेशर यहोवा ईंयाँ बोलोआ, देख, मां सोर शईरो रे खलाफ दुनिया रा सबी ते शक्तिशाली बाबेलो रा राजा नबूकदनेस्सर कोड़ेया, रथ, सवार, बड़ी पीड़ ओर सेना समेत उत्तर दिशा ते ल्याऊणा। 8 तेसरी सेने उपजाऊ जमीना दे बसे दे शईरा रे लोक लड़ाईया दे कायी देणे। दुश्मणा तुसा रे खलाफ खड्डे खणने, माट्टिया रे टेर लगाणे ओर ढाला री एक मजबूत दवाल खड़ी करनी। 9 तिना शईरो री दवाला टाल़ने खे लकड़ेया रा इस्तेमाल करना। तिना मजबूत गुम्मटा खे टाल़ने रिया तँईं आपणे अथियार रा इस्तेमाल करना। 10 तेसरे कोड़े इतणे ऊणे कि तूँ तिना री तूड़ा साथे टखी जाऊणा ओर जेबे से तेरे बड़े द्वारो रे एड़ा कूसणा, जेड़े लोक नाके वाल़े शईरो रे कूसोए, तेबे तेरी शईरो री दवाल सवार, छकड़े ओर रथो री आवाज सुणी की डरी जाणी। 11 तेस आपणे कोड़ेया री टापा साथे तेरी सारी सड़का केसी देणियां ओर तेरे रणे वाल़े तलवारी साथे काई देणे ओर तेरे मजबूत खम्बे जमीना दे टाल़ी देणे। 12 दुश्मणा रे सिपाईया तेरा तअन लूटी लणा ओर तेरे बपारो रिया चीजा छुड़ाई लणियां; तिना तेरी दवाल टाल़ी देणी ओर तेरे मनो खे सुन्दर लगणे वाल़ा कअर तोड़ी देणा; तेरे पात्थर ओर लक्कड़ ओर माट्टी पाणिए रे सेटी देणी। 13 मां तेरे गाणेया रा सूर बन्द करी देणा ओर तेरी बीणा री आवाज फेर नि सुणनी।*26:13 प्रका. 18:22 14 मां तूँ नांगी चट्टान करी देणी ओर तूँ फेर बसाया नि जाणा, कऊँकि मैं यहोवे ई एड़ा बोली राखेया, परमेशर यहोवे री येई बाणी ए।

15 परमेशर यहोवा सोर शईरो खे बोलोआ, "जेबे तुसा पाँदे जीत आसिल कित्ती जाणी, तेबे समुद्रो रे कनारे रणे वाल़े लोक काये दे लोका रा चींगणा सुणी की बऊत ई डरी जाणे। 16 जेबे समुद्रो रे कनारे रे शईरा रे राजा लोक बऊत दु:खी ऊई जाणे। सेयो एबे आपणे सिंहासणो पाँदे नि बैठणे। तिना आपणे बांके राजेया वाल़े टाल्ले खोली देणे। तिना डरो रे मारे कांबदे ऊए जमीना पाँदे बैठी जाणे। जेबे तिना सुणना कि तुसा साथे क्या ऊई रा, तो सेयो तुसा रिया आरा री खबर सुणी की रा कांबणे लगी जाणे। 17 तिना तेरे बारे दे शोगो रा गाणा बणाई की ताखे बोलणा, हाय! मच्छुआरे री बसायी री हाय! सराये रे शईर जो समुद्रो बीचे रणे वाल़ेया समेत सामर्थी था, ओर तेरे लोका रे डरो ते समुद्रो कनारे रणे वाल़े लोक बऊत डरो थे।*26:17 प्रका. 18:9, प्रका. 18:10 18 एबे जेस दिने से शईर नाश ऊई जाणा, एड़ा लगोआ मानो समुद्रो रे कनारे रे इलाके दे रणे वाल़े लोक काँबी जाणे ओर समुद्रो रे द्वीपा रे लोक तेस शईरो रे नाश ऊई जाणे रिया बजा ते डरी जाणे।" 19 कऊँकि आऊँ परमेशर यहोवा ईंयाँ बोलूँआ, "जेबे मां तूँ रेगिस्तानो रे शईरो जेड़ा उजाड़ करी देणा ओर तां पाँदे बड़ा समुद्र चढ़ाणा ओर तूँ डूगे पाणिए दे डूबी जाणा।*26:19 प्रका. 18:19 20 तेबे गड्डेया रे ओर रूड़ने वाल़ेया समेत मां तूँ बी पुराणे लोका साथे उतारी देणा ओर तूँ तिना साथे थाले राखी की पुराणे बखतो री ऊजड़ी री जगा जेड़ी करी देणा; एथो तक कि तूँ फेर नि बसणा ओर ना जिऊँदे लोका बीचे फेर कोई जगा मिलणी। 21 मां तूँ डरने री बजा करी देणा ओर तूँ बादो ते फेर नि रणा, बल्कि टोल़ने ते बी तेरा पता नि लगणा, परमेशर यहोवे री येई बाणी ए।"*26:21 यहे. 27:36, पज. 37:36