Ezequiel 3

1 तेबे परमेशरे माखे बोलेया, "ओ नाश करने वाल़े माणूंए रे पाऊ, जो तां सामणे राखी राखेया तिजी खे खाई दे, मतलब एसा कताबा खे खा, तेबे जाई की इस्राएलो रे कराने साथे गल्ला कर।"*3:1 प्रका. 10:9 2 इजी री खातर मैं मूँ खोलेया ओर तिने से कताब माखे खुल़ाई ती। 3 तेबे परमेशरे माखे बोलेया, "ओ माणूंआ, एसा कताबा खे जेतेखे ताखे आऊँ देऊँआ पचायी दे ओर आपणियां आन्तड़िया इजी साथे परी दे।" तेबे मैं से खाई ती ओर से मेरे मुंए दे सयीतो जेड़ी मीठी लगी। 4 तेबे परमेशरे माखे बोलेया, "ओ माणूंआ, तूँ इस्राएलिया रे कराने गे जाई की मेरे वचन तिना खे सुणा। 5 आऊँ ताखे तिना लोका गे पेजणे लगी रा जिना री पाषा सिखणा कठण नि ए जेते खे तूँ सिखी नि सकदा। आऊँ ताखे तेरे इस्राएली लोका गे पेजणे लगी रा। 6 आऊँ ताखे तिना माणूंआ गे पेजणे लगी रा जिना री पाषा तूँ ठीक-टंगो दे समजेया। जे आऊँ ताखे तिना माणूंआ गे पेजदा जिना री पाषा ताखे समजणे दे कठण ए, तो सेयो हैरान ऊणे थे ओर तां जो तिना ते बोलणा से तिना त्यानो साथे सुणना। 7 पर इस्राएलो रे लोका तेरी नि सुणनी, कऊँकि सेयो मेरी पनि सुणना चांदे, सेयो इजी री बजा ते नि सुणना चांदे कऊँकि सेयो सब बऊत जिद्दी ए। 8 देख, मां तूँ तिथणा ई टीठ बनाणा जितणे सेयो ए, ओर तिथणा ई जिद्दी बनाणा जितणा सेयो ए। 9 जेड़ा ईरा पात्थरो ते बी सख्त ओआ तेड़ा ई मां तेरा मन तिना रे सामणे सख्त करी देणा। तूँ तिना ते बी जादा जिद्दी ऊणा, तैं तिना ते नि डरना। तैं तिना ते बिल्कुल नि डरना कऊँकि सेयो बिद्रोही कराने रे ए।"

10 तेबे परमेशरे माखे बोलेया, "ओ माणूंआ, जितणे वचन आऊँ ताखे बोलूँ तिना सबी खे सुण ओर आपणे मनो दे राख।" 11 आपणे साथी इस्राएलिया गे जा जो आपणे देशो खे छाडणे खे मजबूर ऊणे ते बाद एती बेबीलोनो दे ए, ओर तिना ते गल्ल बात कर। तिना खे बोल, "यहोवा ईंयाँ बोलोआ" ओर फेर तिना खे मेरा सन्देश बता, चाए सेयो सुणो या ना सुणो। 12 तेबे तेते दर्शणो दे आऊँ परमेशरो री आत्मे ठवाल़ेया ओर मैं आपू पीछे बड़ी गड़गड़ाटी साथे एक आवाज सुणी। मैं केसी खे ये बोलदे ऊए सुणेया, "यहोवे री महिमा तेसरिया जगा दे स्तुति ओ।" 13 तेबे मैं तेते साथे ई तिना प्राणिया रे पंखो री आवाज, जो एकी-दूजे साथे लगो थे ओर तिना साथे टईरा री आवाज ओर एक बड़ी गड़गड़ाट सुणी। 14 तेबे परमेशरो री आत्मा माखे ठवाल़ी की लईगी ओर आऊँ कठण दु:खो साथे परेया रा ओर मनो दे रोषे ऊँदा ऊआ चली गा ओर यहोवे री शक्ति मां पाँदे प्रबल थी। 15 आऊँ इस्राएलो रे तिना कैदी लोका गे आई गा जो बेबीलोनो रिया दक्खणा दे कबार नदिया रे कनारे तेलाबीब नाओं रे छोटे गाँवो दे रओ थे। तेती आऊँ साता दिना तक तिना बीचे बेचैन ऊई की बैठेया दा रया। मैं जो कुछ बी देखेया, तिजी ते आऊँ हैरान रईगा।

परमेशरो रा यहेजकेलो खे पईरेदार बनाणा

16 जेबे सात दिन बीतीगे, तेबे परमेशरो रा ये वचन मांगे पऊँचेया, 17 "ओ माणूंआ, मैं तूँ इस्राएलो रे कराने खे पईरेदार ठराई राखेया, तैं मेरे मुंए रिया गल्ला सुणी की तिना खे चतौणी देई की बोलणा।*3:17 यहे. 33:7 18 जेबे आऊँ कुछ दुष्ट लोका रे बारे दे बोलूँआ, सेयो आपणे पापो रिया बजा ते जरूर मरने ओर जे तूँ तिना खे सावधान नि करे ओर ना दुष्टा खे ये बोले कि जे तुसे जिऊँदे रणा चाओए तो तिना खे आपणे बुरे कामा ते मुड़ना पड़ना, तो सेयो दुष्ट लोक आपणे कित्ते रे पापो रिया बजा ते मरने, पर तेसरिया मौता रा लेखा मां तांते ई लणा। 19 पर जे तूँ दुष्टो खे सावधान करे ओर से आपणे बुरे काम करने ते नि फिरो, तो से आपणे बुरे कामो दे फसेया दा ई मरी जाणा, पर तां आपणे प्राण बचाणे। 20 तिंयाँ ई, जे तर्मी माणूं आपणे तर्मो ते फिरी की बुरे काम करने लगो तो मां तेस साथे बुरा बर्ताओ करना, पर तां तिना खे चतौणी देणी चाईयो। जे तूँ तिना खे चतौणी नि देगा ओर सेयो आपणे बुरे कामा ते नि फिरो, तो सेयो आपणे पापो रिया बजा ते मरी जाणे, ओर जो तर्मो रे काम तिने करी राखे ऊगे, तिना री सुधि नि लई जाणी, पर तिना रे खूनो रा लेखा मां तांते ई लणा। 21 पर जे तूँ तर्मिया खे एड़ा बोली की सावधान करे कि से पाप नि करो ओर से पापो ते बची जाओ, तो से चतौणी मानणे रिया बजा ते जरूर जिऊँदे रणे ओर तां आपणे प्राण बचाणे।"

यहेजकेल बोलणे दे असमर्थ

22 तेबे मैं यहोवे रा तेती मां साथे ऊणा महसूस कित्तेया ओर तिने माखे बोलेया, "उठी की शईरो ते बारे मैदानो दे जा ओर तेती मां तां साथे गल्ला करनिया।" 23 तेबे आऊँ उठी की बारे मैदानो दे गया ओर मैं तेती देखेया कि यहोवे रा प्रताप जेड़ा माखे कबार नदिया पाँदे, तेड़ा ई एती बी दिशणे लगी रा ओर आऊँ आदर करने खे मुंए रे पारे थाले जमीना पाँदे पड़ीगा। 24 तेबे परमेशरो री आत्मा माँदे आईगी ओर तेसे आऊँ पैरा रे पारे खड़ा कित्तेया, तेबे से माखे बोलणे लगेया, "आपणे कअरो रे पीतरे जाई की द्वार बन्द करी की बैठी जा। 25 ओ नाश करने वाल़े माणूंआ, देख, तिना लोका तूँ रस्सिया साथे बानी की राखणा ओर तूँ निकल़ी की तिना लोका बीचे जाई नि सकणा। 26 कऊँकि सेयो बिद्रोह करने वाल़े लोक ए। मां तेरी जीब तेरे ताल़ूए साथे लगाणी, जेते कि तूँ तिना खे बकी नि सकणा। 27 पर जेबे मां तां साथे गल्ला करनिया, तेबे मां तेरा मूँ खोलणा ओर तैं तिना खे एड़ा बोलणा, ‘परमेशर यहोवा ईंयाँ बोलोआ’, ओर तैं मेरा सन्देश सुनाणा। जो लोक तेरिया गल्ला सुणने वाल़े ऊणे तिना तो सुणना, पर बऊत जे लोका नि सुणना, कऊँकि सेयो बिद्रोह करने वाल़े लोक ए।"