1 एते ते बाद परमेशरो री तागती आऊँ ऊबे चकी की यहोवे रे मन्दरो रे पूर्बो रे बड़े द्वारो गे जेतेरा मूँ पूर्बो री दिशा रिया तरफा खे था, पऊँचाई ता ओर तेती मैं क्या देखेया कि, बड़े द्वारो गे ई पच्ची मर्द ए। मैं तिना बीचे अज्जूरो रा पाऊ याजन्याह ओर बनायाह रा पाऊ पलत्याह देखेया, जो प्रजा रे परदान थे। 2 तेबे यहोवे माखे बोलेया, "ओ नाश ऊणे वाल़े माणूंआ, ये सेयो पच्ची माणूं ए जो एस यरूशलेम शईरो दे बुरे काम करने रे बारे दे सोचोए। ये लोक लोका खे बुरे काम करने री सला देओए।" 3 यो लोक बोलोए, "आसा छोड़ ई फेर आपणे कअर बनाणे लगणा। शईर खाणा बनाणे वाल़े पांडे जेड़ा ए, ओर आसे तेते दे बचे दे ए, जिंयाँ मास तेते दे बचाई की राखेया दा रओआ। 4 ओ नाश ऊणे वाल़े माणूंआ, ताखे तिना खे चतौणी देणे रिया तँईं मेरा सन्देश बोलणा पड़ना।" 5 तेबे यहोवे रा आत्मा मां पाँदे उतरेया ओर तिने माखे बोलेया, "लोका खे एड़ा बोल, यहोवा ईंयाँ बोलोआ: ओ इस्राएलो रे लोको तुसे एड़ा ई बोली राखेया; जो कुछ तुसा रे मनो दे आओआ, आऊँ तेसखे जाणूंआ। 6 तुसे तो एस शईरो दे कई लोक काये, बल्कि एथो रिया सड़का लाशा साथे परी तिया। 7 इजी बजा ते प्रभु यहोवा ईंयाँ बोलोआ: जो माणूं तुसे एस शईरो दे काई राखे, तिना रिया लाशा ई एस शईरो दे टोकणे रा मास ए ओर तुसे एते पांडे ते निकयाल़े जाणे। 8 तुसे तलवारी ते डरोए ओर मां तुसा पाँदे तलवार चलाणी, प्रभु यहोवे री येई बाणी ए।" 9 परमेशरे ये बी बोलेया, "मां तुसे एस शईरो ते निकयाल़ी की परदेशी दुश्मणा रे आथो दे करी देणे ओर तुसा खे सजा दलाणी। 10 तिना तुसे लड़ाईया दे तलवारी साथे काई देणे; तुसा एथी इस्राएलो दे सजा पाणी। तेबे तुसा खे पता लगी जाणा कि आऊँ यहोवा जो बोलूँआ सेई करुँ बी आ। 11 ये शईर तुसा खे टोकणा नि बणना ओर ना तुसे एते बीचला मास ऊणे, मां तुसा रा मुकद्दमा इस्राएलो रे बन्ने पाँदे चुकाणा।" 12 तेबे तुसा खे पता लगी जाणा कि आऊँ ई यहोवा ए; तुसे जो मेरे बिधानो रिया गल्ला नि मानिया। इजी रे बदले तुसे दूजे जातिया रे लोका रे बिधान मानणे लगी रे। 13 आऊँ एड़ी भविष्यबाणी करने लगी रा था कि बनायाह रा पाऊ पलत्याह मरी गा। तेबे आऊँ मुंए रे पारे थाले पड़ी की जोरे की चींगेया ओर बोलेया, "हाय प्रभु यहोवा, क्या तां इस्राएलो रे बचे रे लोक पूरी तरह ते नाश करी देणे?"

14 तेबे यहोवे रा ये सन्देश मांगे पऊँचेया, 15 "ओ नाश ऊणे वाल़े माणूंआ, सुण कि यरूशलेमो रे लोक तेरे, ओर तां साथे गुलामिया दे गये दे ओर सारे इस्राएलिया रे बारे दे क्या बोलोए। सेयो इस्राएलो रे सारे तिना लोका रे बारे दे बोलोए जो एबु बेबीलोनो दे ए।" सेयो बोलणे लगी रे, "सेयो लोक यहोवे ते दूर चली गे दे ए। इजी री खातर ये देश म्हारा ए ओर आसे इदे रई सकूँए।" 16 पर तूँ आपणे साथी गुलामा खे बोल, "प्रभु यहोवा ईंयाँ बोलोआ कि मैं तुसे दूर-दूर जातिया बीचे बसाए ओर देशो-देशो बीचे तित्तर-बित्तर करी तो दित्ते रे, तेबे बी जेते देशो दे तुसे आई रे, तिना दे मां आपू तुसा खे थोड़े दिना खे पवित्र जगा ठईरना।" 17 इजी री खातर तुँ तिना लोका खे बोल, "प्रभु यहोवा ईंयाँ बोलोआ कि कदी मां तुसे तिना जातिया बीचा ते कट्ठे करने जिना बीचे तुसे लई जाई राखे ओर तुसे इस्राएलो दे वापस लई आऊणे, ओर तुसे फेर आपणे देशो दे बसी जाणे। 18 ओर जेबे तुसे जो गुलामिया दे ए, इस्राएलो री जमीना दे वापस आऊणे, तेबे तेस देशो रिया सारी घृणित मूर्तिया ओर घृणित काम बी तेथा ते दूर करने। 19 तेबे मां तिना रा मन एक करी देणा ओर तिना रे पीतरे एक नया आत्मा पैदा करना ओर तिना रे शरीरो ते पात्थरो रा दिल निकयाल़ी की मासो रा दिल देणा,* 20 जेते कि सेयो मेरी बिधिया पाँदे सदा चलेया करो ओर मेरे नियम मानो ओर सेयो मेरी प्रजा ठईरने ओर आऊँ तिना रा परमेशर ठईरना। 21 पर सेयो लोक आपणी घिनौनी मूर्तिया ओर घिनौने कामो पाँदे मन लगाई की चलदे रओए, मां तिना खे तिना रे बुरे कामा री सजा देणी। परमेशर यहोवा येई बोलोआ।"

22 तेबे करूबे आपणे पंख खोले ओर टईर तिना साथे-साथे चले ओर इस्राएलो रे परमेशरो रा तेज तिना पाँदे था। 23 तेबे यहोवे रा तेज यरूशलेम शईरो ते उठी की तेस पाह्ड़ो पाँदे ठईरी गा, जो यरूशलेम शईरो रे पूर्बो रिया तरफा खे था। 24 दर्शणो दे आत्मे आऊँ ऊबे चकेया ओर माखे वापस बेबीलोनो दे लईगी। आऊँ तिना इस्राएलिया गे अटी की आईगा जो तेती बन्दी थे। ये ई दर्शणो रा अन्त था। 25 तेबे जितणिया गल्ला यहोवे माखे दर्शणो दे दखाईया थिया, सेयो मैं गुलामा खे बताईतिया।