Ezequiel 8

यरूशलेमो रे मन्दरो दे ओरी देवतेया री पूजा

1 बेबीलोनो दे म्हारे गुलामिया रे छठुए सालो रे छठुए मीन्ने रे पाँजुए दिने जेबे आऊँ आपणे कअरे बैठी रा था ओर यहूदा प्रदेशो रे बुजुर्ग मेरे सामणे बैठी रे थे, तेबे परमेशर यहोवे री शक्ति तेथी मां पाँदे प्रकट ऊई। 2 तेबे मैं आपणे सुफने दे केसी एड़े माणूंए खे देखेया जो एक आदमिए जेड़ा दिशो था। तेसरे लको ते थाले, तेसरा शरीर आगी जेड़ा जल़ने लगी रा था, ओर तेसरे लको ते पाँदे तेसरा शरीर बऊत गर्म चमकाए रे पीतल़ी जेड़ा चमकणे लगी रा था। 3 तिने नौखा आथ जा कुछ बढ़ाई की मेरे सिरो रे बाल़ पकड़े, तेबे परमेशरो री आत्मे आऊँ तरती ओर सर्गो बीचे चकी की परमेशरो रे दखाए रे दर्शणो रे यरूशलेमो रे मन्दरो दे पीतरे, आँगणो रे तेस बड़े द्वारो गे पऊँचाई ता, जेतेरा मूँ उत्तरो रिया तरफा खे ए ओर जेती परमेशरो खे रोष चढ़ाणे वाल़ी मूर्तिया री जगा थी, जेतेरी बजा ते जल़न पैदा ओई। 4 तेबे तेती चिनार नदिया रे कनारे इस्राएलो रे परमेशरो रा तेज तेड़ा ई था जेड़ा मैं मैदानो दे देखेया था। 5 तेबे परमेशरे माखे बोलेया, "ओ माणूंआ, आपणी आखी उत्तरो रिया तरफा खे चकी की देख।" तेबे मैं आपणी आखी चकी की उत्तरो रिया तरफा खे देखेया कि बेदिया रे बड़े द्वारो रे उत्तरो रिया तरफा खे तेथो खे जाणे रिया जगा दे से मूर्ति थी जेतेते परमेशर घृणा करो था। 6 तेबे तिने माखे बोलेया, "ओ माणूंआ, क्या तूँ देखणे लगी रा कि यो लोक क्या करने लगी रे? इस्राएलो रा कराना कितणे गंदे काम करोआ, ताकि आऊँ आपणे पवित्र मन्दरो ते दूर ऊई जाऊँ, पर तां इना ते बी जादा घृणित काम देखणे।" 7 तेबे से माखे मन्दरो रे आँगणो रे द्वारो दे लईगा ओर मैं देखेया कि कांदा दे एक छेद ए। 8 तेबे परमेशरे माखे बोलेया, "ओ माणूंआ, कांदा खे फाड़, तेबे मैं कांद फाड़ी की क्या देखेया कि एक द्वार ए।" 9 तेबे परमेशरे माखे बोलेया, "पीतरे जाई की देख कि यो लोक एती केड़े गंदे काम करने लगी रे।" 10 इजी री खातर आऊँ तेते द्वारो ते पीतरे गया ओर मैं देखेया कि एक बड़े कमरे री चऊँ कनारली कांदा दे हर तरआ रे लूरने वाल़े जन्तु ओर घृणित डांगरा रे चित्र बणी रे थे, ओर तिना सबी मूर्तिया रे चित्र बणी रे थे जिना री इस्राएली लोक पूजा करो थे। 11 इस्राएलो रे कराने रे बुजुर्गा बीचा ते सत्तर मर्द जिना बीचे शापानो रा पाऊ याजन्याह बी ए, सेयो तिना चित्रा सामणे खड़ी रे ओर हर एकी मर्दे आपणे आथो दे तूपदान लई राखेया ओर तूपो रे तुएँ ते बादल़ो री खुशबू उठणे लगी री। 12 तेबे परमेशरे माखे बोलेया, "ओ माणूंआ, क्या तैं देखी राखेया कि इस्राएलो रे कराने रे बुजुर्ग आपणी-आपणी नक्काशी वाल़े कमरे पीतरे, मतलब न्हेरे दे क्या करने लगी रे? सेयो एकी दूजे ते बोलोए कि यहोवा आसा खे नि देखदा, यहोवे देश छाडीता रा।" 13 तेबे तिने माखे बोलेया, "तां इना ते बी जादा घृणित काम देखणे जो यो लोक करोए।" 14 तेबे से माखे यहोवे रे मन्दरो ते तेस बड़े द्वारो गे लईगा जो उत्तरो रिया तरफा खे था ओर मैं तेती जवाणसा बैठी रिया ओर रोंदिया देखिया। सेओ रोणे लगी रिया थिया कऊँकि देवता तम्मूज मरी गा था।*8:14 तम्मूज बेबीलोनो दे खाद ओर डाल़ा खे बढ़ाणे वाल़ा देवता था। लोका रा मानणा था कि हर साल गर्मिया रे आखरी दे तेसरी मौत ऊई जाओई, ओर जेतेरा नतीजा ये आ कि गर्मिया दे डाल़-बूट सूकणे लगी जाओए, ओर डाल़िया रा उगणा बन्द ऊई जाओआ। लोक, खास करी की जवाणसा, तेसरिया मौता पाँदे शोग मनाओईया। ओर मन्दरो रे पीतरे आँगणो दे बैठी जाओ थिया। सेयो रो थिया ओर तेसरे दूबारा जिऊँदा ऊणे खे प्रार्थना करो थिया। 15 तेबे परमेशरे माखे बोलेया, "ओ माणूंआ, क्या तैं ये देखी राखेया? तां इना ते बी जादा घृणित काम देखणे।" 16 तेबे से माखे यहोवे रे पीतरले आँगणो दे लईगा ओर तेती यहोवे रे द्वारो गे आँगण ओर बेदिया बीचे कोई पच्ची मर्द आपणी पीठ यहोवे रे मन्दरो रिया तरफा खे ओर आपणे मूँ पूर्बो रिया तरफा खे कित्ते रे थे, सेयो पूर्ब दिशा ते निकल़दे ऊए सूरजो री पूजा करने खे माथा टेकणे लगी रे थे। 17 तेबे परमेशरे माखे बोलेया, "ओ माणूंआ, देख! यहूदा रे लोक मेरे मन्दरो दे ये घिनौने काम करने लगी रे! ये एक खतरनाक गल्ल ए! ओर सेयो आपणे देशो दे हर जगा दे उपद्रवो रे काम करने लगी रे। सेयो माखे हर बखत रोष दलांदे रओए। तिना खे देख! सेयो जितणा ऊई सको मेरी बेज्जती करदे रओए।*8:17 ये यहूदा रे लोका रा परमेशरो री बेज्जती करने रा सबी ते बेज्जतिया वाल़ा तरिका ए। 18 इजी री खातर मां बी जल़नी दे आई की तिना खे सजा देणी। मां यहूदा रे लोका पाँदे दया नि करनी। सेयो मतादा रिया तँईं मां पाँदे चींगदे बी रओ, तेबे बी मां तिना री गल्ल नि सुणनी।"