1 बेतलेहमो दे बोअज नाओं रा एक अमीर आदमी रओ था, से नाओमीया रे लाड़े एलीमेलेको रे टब्बरो रा था। 2 मोआब देशो री रूते नाओमीया खे बोलेया, "माखे केसी डोरूए दे जाणे दे, ताकि जो मां पाँदे दया दृष्टि करो, तेस पीछे-पीछे आऊँ सिल्ले कट्ठे करने जाऊँ।" नाओमीए तेसा खे बोलेया, "चली जा, बेटी।" 3 तेबे रूत जाई की एकी डोरूए दे सिल्ले बाडणे वाल़ेया पीछे चूगणे लगी ओर जेसरे डोरूए दे रूत सिल्ले कट्ठे करने गयी से संयोगो ते एलीमेलेको रे टब्बरो रे बोअजो रा था। 4 ओर बोअज बेतलेहमो दे आपणे कअरो ते डोरूए दे आई की बाडणे वाल़ेया खे बोलणे लगेया, "यहोवा तुसा साथे रओ," ओर सेयो तेसखे बोलणे लगे, "यहोवा ताखे आशीष देयो।" 5 तेबे बोअजे रूता खे देखी की आपणे तेस देखपाल़ करने वाल़े ते जो बाडणे वाल़ेया पाँदे ठराया था पूछेया, "से केसरी बेटी ए?" 6 तिने देखपाल़ करने वाल़े ज्वाब दित्तेया, "से मोआब देशो री बेटी ए, जो नाओमीया साथे मोआब देशो ते वापस आई री। 7 तेसे बेटिए मांते बोलेया था कि माखे बाडणे वाल़ेया पीछे-पीछे पूल़ेया बीचे चूगणे दे ओर सिल्ले कट्ठे करने दे। तेबे से आई ओर प्यागा ते एबुए तक एथी ए, बस थोड़ी देर तक राम कित्तेया।"

8 तेबे बोअजे रूता खे बोलेया, "ओ मेरी बेटी, मेरी गल्ल त्यानो साथे सुण, केसी दूजे रे डोरूए दे सिल्ले चूगणे नि जाणा, मेरी ई दासिया साथे एथी रणा। 9 त्यानो दे देखणा ओर तिना ई पीछे चलणा जेस डोरूए खे सेयो बाडो, मैं जवाना खे चतौणी देई राखी कि सेयो तां साथे गल़त नि करो। ओर जेबे ताखे त्याये लगो, तो तेते पाणिए ते आपणी त्याये मिटाणी जो तिने कुँएं ते निकाल़ी राखेया ए।" 10 तेबे रूते जमीना दे चूकी की आपणा सिर चुकाया ओर तेसखे तन्यवाद देई की बोलणे लगी, "मैं एड़ा क्या कित्तेया कि तूँ मां पाँदे दया करेया, आऊँ तो सिर्फ एक परदेसणी ए?" 11 बोअजे ज्वाब दित्तेया, "लोके माखे तेरे बारे दे सब कुछ बताईता रा ए। जेबे तेरे लाड़े री मौत ऊई तो तैं नाओमिया री बऊत मताद कित्ती। तैं आपणे माये-बाओ ओर देशो खे छाडणे रा फैंसला कित्तेया। एती तिना लोका साथे रणे खे आई जिना खे ठीक टंगो दे जाणदी पनि थी। 12 ये जो अच्छा काम तैं करी राखेया तेतेरिया तँईं यहोवे ताखे ईनाम देणा ओर इस्राएलो रा परमेशर यहोवा जेसगे तूँ शरण लणे आई री, ताखे पूरा प्रतिफल देणा।" 13 रूते ज्वाब दित्तेया, "ओ मेरे मालक, तेरी दया-दृष्टि मां पाँदे बणी री रओ, कऊँकि तेबे बी आऊँ तेरी दासिया बीचे केसी रे बी बराबर नि ए, तेबे बी तैं आपणी दासिया रे मनो दे तसल्ली देणे वाल़िया गल्ला बोली की माखे शान्ति देई राखी।"

14 तेबे दिने खाणे रे बखते बोअजे तेसा खे बोलेया, "एती आसा गे आयी की रोटी खा ओर आपणा ग्रा सिरके दे डूबा।" तेबे से बाडणे वाल़ेया गे बैठी गी ओर बोअजे तेसा खे पूजे रे सिल्ले दित्ते ओर से खाई की रज्जी गी, ओर कुछ बची बी गया। 15 जेबे से दुबारा सिल्ले चूगणे खे उठी, तेबे बोअजे आपणे बाडणे वाल़ेया खे आज्ञा दित्ती, "एसा खे पूल़ेया बीचे-बीचे बी चूगणे देयो ओर एसा खे कुछ नि बोलणा। 16 बल्कि मुट्ठी परी ऊणे ते बाद जाणीबुजी की कुछ-कुछ निकयाल़ी की सेटी देया करो ओर एसा खे चूगणे खे छाडी देयो ओर एसा खे कुछ नि बोलणा।" 17 तेबे से साँजा तक डोरूआ दे चूगदी रयी; तेबे जो कुछ चूगी चूकी से फटकेया ओर से कोई बारा किलो जौ निकल़ेया। 18 तेबे से तेस जौ खे चकी की शईरो खे वापस गई ओर तेसा री सासुए तेसा रा चूगेया रा जौ देखेया ओर जो कुछ तेसे खाई की बचाया था से तेसे निकयाल़ी की आपणी सासुआ खे दित्तेया। 19 तेसारी सासुए तेसा ते पूछेया, "आज तूँ सिल्ले चूगणे केयी गई थी ओर काम करने केई गयी थी? तन्य ए से जिने तेरी सम्बाल़ लई राखी।" तेबे रूते आपणी सासुआ गे बताईता कि मैं केसगे काम कित्तेया ओर बोलेया, "जेस मर्दो गे आज मैं काम कित्तेया तेसरा नाओं बोअज ए।" 20 नाओमीए आपणी बऊआ खे बोलेया, "से यहोवे री तरफा ते आशीष पाओ, कऊँकि यहोवे ना तो जिऊँदेया पाँदा ते ओर मरेया रे पाँदा ते बी आपणी दया नि टाई!" फेर नाओमीए तेसा खे बोलेया, "बोअज म्हारा रिश्तेदार ए, से म्हारे नेड़ो रे टब्बरो बीचा ते एक ए, जिना पाँदे म्हारी देखपाल़ करने री जिम्मेदारी ए।" 21 तेबे मोआब देशो री रूते बोलेया, "तिने माखे ये बी बोलेया कि जदुओ तक तेसरे सेवक तेसरी सारी बडाई पूरी नि करी लो तदुओ तक तिना ई साथे-साथे लगी री रओ।" 22 नाओमीए आपणी बऊ रूता खे बोलेया, "मेरी बेटी ये अच्छा बीए कि तूँ तेसरी ई दासिया साथे-साथे जाया कर, जे तूँ ओरी लोका रे डोरूआ दे जाए तो सेयो तां साथे बुरा बर्ताओ करी सकोए।" 23 इजी री खातर रूत जौ ओर कणक दुँईं री बडाईया रे अन्तो तक सिल्ले चूगणे खे बोअजो री दासिया साथे-साथे लगी री रयी ओर से आपणी सासुआ साथे ई रओ थी।