1 अवं पौलुस ई चिट्ठी लिखने लगोरोईं। अवं, यीशु मसीहेरो प्रेरित भोनेरे लेई परमेशरेरे मेर्ज़ी सेइं कुजावरोईं। मेरो विश्वासी साथी सोस्थिनेस भी मीं सेइं साथीए (ज़ै मेरी मद्दत केरने लगोरोए)। 2 तुस ज़ैना कुरिन्थुस नगरेरे कलीसियारे विश्वासी आथ, परमेशरे तुस यीशु मसीह मां अपने लोकां केरे रूपे मां अलग कियोरेथ, ते कने पवित्र भोनेरे लेई कुजोरेथ। तैन सेब्भी केरां नंव्वे ज़ैना हर ठैरी इश्शे त कने अपने प्रभु यीशुएरे नंव्वे सेइं प्राथना केरतन।

3 इश्शे बाजी परमेशर, ते प्रभु यीशु मसीहेरे तरफां तुसन अनुग्रह ते शान्ति मैलती राए।

4 अवं तुश्शे बारे मां अपने परमेशरेरू हर वक्त शुक्र केरताईं, एल्हेरेलेइ कि परमेशरेरो ई अनुग्रह तुसन पुड़ यीशु मसीह मां भोव। 5 किजोकि तुसेईं हर लिहाज़े सेइं बेड़ि बरकतां हासिल कियोरिन, किजोकि तुस मसीह सेइं साथी अक आथ। एल्हेरेलेइ तैने तुसन अपनु वचन ज़ोनेरी ते समझ़नेरी खास काबलीत दित्तोरीए। 6 एन्च़रे परमेशरे तुश्शे लेई पक्‍कू कियूं, कि मसीहेरे बारे मां सन्देश सच़्च़े। 7 हुनी तुसन कां सारां आत्मिक वरदानां आन, किजोकि तुस इश्शो प्रभु यीशु मसीह बांदो भोनेरे बड़े इंतज़ारे मां आथ। 8 परमेशर तुसन आखरी तगर विश्वासे मां मज़बूत भी केरेलो, कि तुस इश्शे प्रभु यीशु मसीहेरे वापस एजनेरे दिहाड़े बेइलज़ाम भोथ। 9 परमेशर एन्च़रे केरेलो, किजोकि ज़ैन किछ तै ज़ोते, तैस केरनेरे मां तै वफादारे। ते तैन्ने तुस अपने मट्ठे इश्शे प्रभु यीशु मसीहेरे सेंगती मां कुजेवरेथ।

10 हे ढ्लाव ते बेइनव, अवं इश्शो प्रभु यीशु मसीहेरे अधिकारे सेइं इन केरनेरी बिनती केरताईं, कि सब एक्‍की होरि सेइं राज़ामंद भोथ; ते तुसन मां फिरके न भोन, पन अक मन भोथ, ते अक्‍के खियाल रखा। 11 किजोकि हे मेरे ढ्लाव ते बेइनव, खलोएरे टब्बरेरे लोकेईं मीं तुश्शे बारे मां ज़ोवरूए, कि तुसन मां लड़ाई लेगोरिन भोने। 12 मेरे ज़ोनेरो मतलब ईए, कि तुसन मरां कोई त अपनो आप, "पौलुसेरे ज़ोते," कोई "अपुल्‍लोसेरो," कोई "कैफारो," कोई "मसीहेरो ज़ोते।" 13 ज़ैन तुस केरतथ तैन ठीक नईं, कुन मसीह बेन्टोव? कुन पौलुस क्रूसे पुड़ च़ाढ़ो जेव? या तुसन पौलुसेरे नंव्वे पुड़ बपतिस्मो मैल्हो? 14 अवं परमेशरेरू शुक्र केरताईं, कि क्रिस्पुस ते गयुसेरू अलावा, मीं तुसन मरां केन्ची बपतिस्मो नईं दित्तोरो। 15 कि एरू न भोए, कोई ज़ोए, कि तुसन मेरे चेले बन्नेरे लेई बपतिस्मो मैल्हो। 16 हाँ मीं याद अऊं, मीं स्तिफनासेरे टब्बरे भी बपतिस्मो दित्तो; एन केरे अलावा, अवं न ज़ैनी कि मीं होरि केन्ची बपतिस्मो दित्तो। 17 किजोकि मसीहे अवं बपतिस्मो देनेरे लेई नईं, बल्के खुशखबरी शुनानेरे लेई भेज़ोरोईं, ज़ैखन अवं लोकन परमेशरेरो सन्देश शुनाताईं त अवं मैन्हु केरे च़लाक खियालां केरो इस्तेमाल न केरि, एरू न भोए कि मसीहेरू क्रूस बेफैइदू भोए।

18 किजोकि क्रूसेरी कथा नाश भोनेबालां केरे लेई बेवकूफीए, पन असन मुक्ति मैल्हने बालां केरे लेई परमेशरेरी शक्तिए। 19 किजोकि पवित्रशास्त्रे मां परमेशर ज़ोते,

"अवं इन हरेइलो दुनियारे लोकां केरे खियालन कि तैना सोचतन कि तैना ज्ञानी आन, हकीकति मां तैना बेकार खियाल आन।

अवं साबत केरेलो कि तैना अक्लमन्द नईं।"

20 त फिरी, अक्लमन्द मैन्हु केरे बारे मां अस कुन ज़ोम? यहूदी केरे कानूनेरे माहिर मैन्हु केरे बारे मां अस कुन ज़ोम? इस दुनियारे लोकां केरे बारे मां कुन ज़ोम ज़ैना ज़ोने मां च़लाकन? परमेशरे तैना सारे बेवकूफ बनाए ते तैन केरि अक्ल बेफैइदी बकवास साबत की। 21 किजोकि ज़ैखन परमेशरेरे ज्ञानेरे मुताबिक दुनियां ज्ञाने सेइं परमेशर न ज़ानो, त परमेशरे इन रोड़ू लग्गू, इस प्रचारेरे बेवकूफरे मुताबिक विश्वास केरनेबालन मुक्ति दे। 22 यहूदी त निशान चातन, ते गैर कौमां ज्ञानेरे तोपी मां आन। 23 पन अस त तैस क्रूसे पुड़ च़ाढ़ोरे मसीहेरो प्रचार केरतम ज़ै यहूदी केरे लेई ठोकरारी वजाए, ते गैर कौमां केरे लेई बेवकूफीए। 24 पन ज़ैना परमेशरे (अपने लोक भोनेरे लेई) कुजेवरेन, कुन यहूदी, कुन गैर कौमां, तैन केरे लेई मसीह परमेशरेरी शक्ति, ते परमेशरेरू ज्ञाने। 25 किजोकि परमेशरेरी बेवकूफी मैन्हु केरे ज्ञाने करां जादे ज्ञाने बालीए; ते परमेशरेरी कमज़ोरी मैन्हु केरे शेक्ति करां जादे ज़ोरे बालीए।

26 हे ढ्लाव ते बेइनव, इस बारे मां सोचा ज़ेइस परमेशरे तुस कुजाए तुस केरहे थिये, कि न जिसमेरे मुताबिक बड़े ज्ञानी, ते न बेड़ि शेक्तिबाले, ते न इज़्ज़तदार घरेरे कुजाए। 27 ज्ञाने बालन शरमिन्दा केरनेरे लेई परमेशरे तैना च़ुने ज़ैना दुनियारे नज़री मां बेवकूफन। ते ताकतबरन शरमिन्दा केरनेरे लेई परमेशरे तैना च़ुने ज़ैना दुनियारे नज़री मां कमज़ोरन। 28 परमेशरे तैना च़ुने ज़ैना दुनियारी नज़री मां नीच़ ते घटिया आन, बल्के ज़ैना अथ्थी भी नईं तैना भी च़ुने, कि तैन ज़ैना आन, बेकार केरन। 29 परमेशरे एन केरू ताके कोई प्राणी परमेशरेरे सामने घमण्ड न केरि सके। 30 पन परमेशरे तुस यीशु मसीह सेइं अक कियोरेथ, ते मसीहेरे ज़िरिये तैने अपनु ज्ञान दित्तोरूए। परमेशर अपने नज़री मां असन धर्मी भी बनाते। मसीहेरे ज़िरिये अस पवित्र किये जे, ते तै असन इश्शे पापन करां आज़ाद केरते। 31 ताके ज़ेन्च़रे पवित्रशास्त्रे मां लिखेरूए, तेन्च़रे भोए, "कि ज़ै घमण्ड केरे तै तैस पुड़ घमण्ड केरे ज़ैन प्रभुए कियोरूए।"