1 रोड़ू भोथू कि तू मेरे ढ्लाएरो ज़ेरो भोथो,

ज़ैनी मेरी अम्मरे छैती केरू दुद्ध पियूं!

तैखन अगर तू मीं बेइर मैलेथो त अवं तीं फुम्मड़ी देथी,

ते कोई मेरी निन्दा न केरेथो।

2 ते अवं तीं एपनी अम्मरे घरे नेथी,

ते तै मीं शिखालेथी,

ते अवं तीं मसालो मिलोरो दाछ़रो रस,

ते अनारां केरो रस पियाथी।

3 कधे एरू भोथू, कि तैसारो बांओ हथ मेरे दोग्गे हैठ भोथो,

ते तैसारो देइने हथ मीं गले लाथो।

4 हे यरूशलेमेरी कौन्शव, अवं तुसन कसम देचांई,

कि तुस मेरे ट्लारे न बींझ़ेइयथ,

ज़ांतगर तै एप्पु न बींझ़े।

सहेली

5 ऐह कौने ज़ैसां अपने ट्लारे पुड़ टेक लेवरोए

जंगले मरां च़ली एइतीए?

लाड़ी

च़ोइयां केरे बुट्टे हैठ मीं तू बींझ़ाव।

तैड़ी तेरी अम्मा तीं ज़र्म दित्तोरू थियूं,

तैड़ी तेरी अम्मा तकलीफ भुई।

6 मीं नगीनेरे ज़ेरे अपने दिले सेइं लेइतां रख,

ते जंत्रेरे ज़ेरे तू एपनी पैखड़ी पुड़ बेन्धतां रख,

किजोकि प्यार मौतरो ज़ेरो ताकतबरे,

ते तैसेरी जलन कब्रारी ज़ेरि बेरहमे

तैसेरी ज्वाला अग्गरी ज़ेरि भड़कोरीए।

बल्के परमेशरेरी अग आहे।✝

7 पैनेरी हड़ैई सेइं भी प्यार न हिश्शे,

ते न समुन्दरे मां डुबी सके,

अगर कोई अपने घरेरी सारी जाईदात प्यारेरे

बदले दे फिर भी तै बड़ो घटिया समझ़ो गालो।

लैड़रो ढ्ला

8 इश्शी अक निकड़ी बेइन आहे,

ज़ैसारी छाती हेजू नईं बेडोरी।

ज़ेइस तैसारी ड्लाहेरी गल भोल्ही

तेइस असां तैसारे लेई कुन केरम?

9 अगर तै अक शहरपनाह भोथी

त असां तैस पुड़ चैंदरे गुम्मट बनाथे,

ते अगर तैन अक दार भोथू,

त असां तैस पुड़ गैइड़ेरे तखते लामेथे।

लाड़ी

10 अवं अक शहरपनाह थी ते मेरी छाती तैसेरे गुम्मट;

तैखन अवं अपने ट्लारेरे नज़री मां शान्ति आन्ने बालेरी ज़ेरि थी।✝

लाड़ो

11 अक ठार ज़ैस जो बाल्हामोन ज़ोते थिये तैस मां सुलैमानेरी अक दाछ़री बाग थी;

तैनी अपनि बाग बागबानन सौंफी;

ताके तैस मरां हर एक्‍की बागबाने

तैस फलेरे बदले अक हज़ार चैंदरे टुक्ड़े तैस देने थिये।✝

12 पन ज़ै बाग मेरी अपनि आहे तै मेरे लेई आहे;

हे सुलैमान, 1000 तेरे लेइए, ते 200 चैंदरे टुक्ड़े

तैन केरे लेई आन, ज़ैना बागरी हेरगेश केरतन।

13 तू ज़ै बागी मां रहतिस,

मेरे दोस्त तेरी आवाज़ शुन्नी चातन;

तैस मीं भी शुन्ने दे।

लाड़ी

14 हे मेरा ट्लारा लूश केर,

ते खुशबूदार पहाड़न पुड़

चिकारे या जुवान हिरनेरो ज़ेरो बन।