Daniel 10

दानिय्येल दर्शने मां अक मैन्हु हेरते

1 फारस मुल्खेरे राज़े कुस्रूएरे राज़ केरनेरे ट्लेइयोवं साले मां मीं दानिय्येले पुड़, ज़ैस जो बेलतशस्सर भी ज़ोतन अक गल बांदी भोइ। ते तै गल सच़्च़ी भी थी कि बड़ी जंग भोल्ही। तैनी ऐह गल बुझ़ी छ़डी, ते तैस एस लाहोरी गल्‍लरी समझ़ भी अई।

2 तैन दिहाड़न मां, अवं दानिय्येल, ट्लेइ हफतन तगर मातम केरतो राव। 3 तैना ट्लाईए हफते पूरे भोने तगर, मीं न त सुवादे बाली रोट्टी खाई ते न मास खावं ते न दाछ़रो रस पीयो, ते न एपनी जानी पुड़ तेल मल्‍लो। 4 फिरी सालेरे पेइले महीनेरे च़ौबियोवं दिहाड़े ज़ैखन अवं हिद्देकेल दरियाएरे बन्ने पुड़ थियो, 5 मीं नज़र देइतां तक्‍कू, कि अक मैन्हु सनेरां लिगड़ां लेइतां मेरे सामने खड़ोए ते तैसेरे लख्खे पुड़ ऊफाज मुल्खेरू खालिस सोन्नेरू मझ़ बन्धोरूए। 6 तैसेरी जान फीरोज़ेरी ज़ेरि, ते तैसेरू तुत्तर बिजलरू ज़ेरू, ते तैसेरी एछ़्छ़ी बलते दीयेरी ज़ेरिन, ते तैसेरी पैखड़ी ते पव चमकेवरे पितलरे ज़ेरेन, ते तैसेरी आवाज़ बड़े लोकां केरि ज़ेरि थी। 7 तै मैन्हु सिर्फ मीं दानिय्येले लाव, ते ज़ैना मैन्हु मीं सेइं साथी थिये तैनेईं किछ भी दर्शन न लाव; पन तैना बड़े थरकने लगे, ते छ़पनेरे लेई नेश्शी जे। 8 तैखन अवं अकैल्‍लो रेइतां एन दर्शन हेरतो राव, मीं हिम्मत न राई, अवं डेरि जेव, ते मीं हिम्मत न राई। 9 फिरी भी मीं तैस मैन्हेरी आवाज़ शुनी, ते ज़ैखन मीं तै आवाज़ शुनी त अवं तुत्तरे भारे बिछ़ड़ी जेव ते डुग्घी निड्ली मां बड़े च़िरे तगर राव।

फारस ते यूनानेरे बारे मां नबूवत

10 फिरी केन्चेरो हथ मीं सेइं हुरो, ते अवं खड़ो केरतां ते हथ्थां केरे भारे थरकतो बिशालो। 11 तैखन तैनी मीं सेइं ज़ोवं, "हे दानिय्येल, हे परमेशरेरे बड़े ट्लारे मैन्हु, ज़ै वचन अवं तीं सेइं ज़ोताईं तैस समझ़, ते सिद्धो खड़ो भो, किजोकि अवं हुना तीं कां भेज़ोरोईं।" ज़ैखन तैनी मीं सेइं ऐह गल की, तैखन अवं खड़ो भोव पन थरकतो राव। 12 फिरी तैनी मीं सेइं ज़ोवं, "हे दानिय्येल, डर न्ना, किजोकि पेइले दिहाड़े ज़ैखन तीं समझ़ने ते बुझ़नेरे लेई मन लेवरो थियो, ते अपने परमेशरे सामने अपनो आप हलीम कियोरो थियो, तैस्से दिहाड़े तेरी प्राथना शुनी जेवरी थी, ते अवं तेरे प्राथनारो जुवाब देने एवरोईं। 13 फारस हुकूमतरे प्रधान 21 दिहाड़न तगर अवं रोकतां रख्खो; पन मीकाएल ज़ै प्रधान स्वर्गदूते, तै मेरी मद्दतरे लेई अव, एल्हेरेलेइ अवं फारसेरे राज़न कां राव। 14 ते हुन्ना अवं तीं समझ़ाने एवरोईं, कि आखरी दिहाड़न मां तेरे लोकां केरि कुन हालत भोनीए। किजोकि ज़ैन दर्शन तीं लाहेरूए, तैन किछ दिहाड़ना बाद पूरू भोल्हु।"

15 ज़ैखन तैनी मैन्हें मीं सेइं एना गल्‍लां केरि छ़ेडी, तैखन अवं तुत्तरे भारे तल्‍ले मां च़ुप राव। 16 तैखन केन्चे ज़ै मैन्हेरो*10:16 ज़ै मैन्हेरो ज़ै स्वर्गदूतेरो ज़ेरो ज़ेरो थियो, मेरे ओठन सेइं हुरो ते मेरू आशी खुल्‍ली जेवं ते अवं गल्‍लां केरने लगो। ज़ै मैन्हु मेरे सामने खड़ो थियो, मीं तैस सेइं ज़ोवं, "हे मालिक, दर्शनेरी गल्‍लां केरे वजाई सेइं मीं सखत तकलीफ भोइ, ते मीं मां कोई हिम्मत न राई। 17 एल्हेरेलेइ प्रभुएरो दास, अवं अपने प्रभु सेइं केन्च़रे गल्‍लां केरि रखताईं? किजोकि मेरी जानी मां त न ताकत राहोरी, ते न अवं शाह घिन्नी लव बटने।"

18 एक्‍की फेरे फिरी तैनी मैन्हें*10:18 मैन्हें स्वर्गदूत ज़ै इन्सानेरो ज़ेरो थियो, तैनी मीं सेइं हुरतां हिम्मत दित्ती। 19 ते तैनी ज़ोवं, "हे परमेशरेरे बड़े ट्लारा मैन्हां, डेरां न्ना, तीं शान्ति मैल्हे, ते तू मज़बूत भो, ते तेरी हिम्मत बनोरी राए।" ज़ैखन तैनी एन ज़ोवं, तैखन मीं हिम्मत केरतां ज़ोवं, "हे मेरे मालिक, हुनी ज़ो, किजोकि तीं मीं हिम्मत दित्तोरिए।"✝10:19 यशा. 41:10. 20 तैखन तैनी ज़ोवं, "कुन तू ज़ानतस कि अवं कोस वजाई सेइं तीं कां एवरोईं? अवं लूशी फारसेरे प्रधाने*10:20 प्रधाने स्वर्गदूत सेइं लड़नेरे लेई वापस गालो; ते ज़ैखन अवं च़लो गालो, त तैखन यूनानेरो प्रधान*10:20 प्रधान स्वर्गदूत एज्जेलो। 21 ते ज़ैन किछ सेच़्च़ी गल्‍लां केरि किताबी मां लिखेरूए, तैन अवं तीं ज़ोताईं; तैन प्रधानां केरे खलाफ, तुश्शे प्रधान मीकाएले*10:21 प्रधान मीकाएले इस्राएली लोकां केरि रक्षा केरनेबालो स्वर्गदूत. छ़ड, मीं सेइं साथी कायम रानेबालो होरो कोई नईं।"