1 अपने राज़ेरे दूइयोवं साले मां नबूकदनेस्सरे एक्‍की राती एरू सुपनु लाऊं, ज़ैस सेइं तैसेरो मन बड़ो परेशान भोइ जेव ते तै झ़ुल्‍ली न बटो। 2 तैखन राज़े हुक्म दित्तो, कि जोष्टी, तांत्री, ते जैदू टूने बाले ते कसदी-पंडतन कुजाथ ते तैना राज़े तैसेरे सुपनेरो मतलब ज़ोन। एल्हेरेलेइ तैना आए ते राज़ेरे सामने हाज़र भोए। 3 तैखन राज़े तैन सेइं ज़ोवं, "मीं अक सुपनु लाहेरूए, ते मेरो मन परेशान भोवरोए, हुनी अवं तैसेरो मतलब समझ़नो चाताईं।" 4 तैखन कसदी-पंडतेईं राज़े सेइं अरामी भाषा मां ज़ोवं, "हे राज़ां, तेरी उमर लम्मी भोए! अपने दासन अपनु सुपनु शुना, ते असां तैसेरो मतलब ज़ोमेले।"* 5 राज़े कसदी लोकन जुवाब दित्तो, "मीं ऐह हुक्म दित्तोरोए कि अगर तुसेईं मतलबे समेत सुपनु न शुनाव त तुश्शे टुक्ड़े-टुक्ड़े किये गाले, ते तुश्शां घरां भी फुकेइतां छ़डेलो। 6 ते अगर तुसेईं मतलबे समेत सुपनु शुनाले त मीं करां किसमे-किसमेरे तोफे ते बड़ी इज़्ज़त मैल्हेली। एल्हेरेलेइ तुसां मीं मतलबे समेत सुपनु शुनाथ।" 7 तैनेईं दुबारां ज़ोवं, "हे राज़ा सुपनु अपने दासन सेइं ज़ो, ते असां तैसेरो मतलब ज़ोमेले।" 8 राज़े जुवाब दित्तो, "अवं पक्‍कू ज़ानताईं कि तुसां हेरतथ कि राज़ेरे ज़बाना ऐह हुक्म निसोरोए कि तुसां वक्त बधानो चातथ। 9 एल्हेरेलेइ अगर तुसेईं मीं सुपनु न शुनाव त तुश्शे लेई अक्‍के हुक्मे। किजोकि तुसेईं सलाह कियोरीए कि ज़ांतगर वक्त बेदलोए, तांतगर असां राज़े झूठी गल्‍लां केरेले। एल्हेरेलेइ तुसां मीं सुपनु शुनाथ, तैखन अवं समझ़ेलो कि तुसां तैसेरो मतलब भी समझ़ेई सकतथ।" 10 कसदी लोकेईं राज़े सेइं ज़ोवं, "सारे संसारे मां एरहो कोई मैन्हु नईं ज़ै राज़ेरे मनेरी गल शुनेई सखे; ते न कोई राज़ो या प्रधान या हाकिम एरहो भोवरोए ज़ैनी कोन्ची जोष्टी, तांत्री या कसदी लोकन सेइं एरी गल पुछ़ोरी भोए। 11 ज़ै गल राज़ो पुछ़ते, तै बड़ी मुश्किले, ते देबतां केरे अलावा ज़ैना मैन्हु सेइं साथी न रान, ते होरो कोई नईं, ज़ै राज़े ऐह गल ज़ोईं सखे।"

12 एस गल्‍ली पुड़ राज़े बड़ी सरक अई, ते क्रोधे भोइतां बाबेलेरे सेभी पंडतन नाश केरनेरो हुक्म दित्तो। 13 एन्च़रे सेइं ई हुक्म निस्सो, ते पंडत लोक नाश भोनेबाले थिये; ते लोक दानिय्येल ते तैसेरे सैथन तोप्पने लगोरे थिये कि तैना भी मारे गान।

14 तैखन दानिय्येले अंगरक्षकां केरे प्रधान अर्योके सेइं ज़ै बाबेलेरे पंडतन मारनेरे लेई निस्सोरो थियो, सोच विचार केरतां अक्ली सेइं तैस सेइं ज़ोवं: 15 ते राज़ेरे हाकिमे अर्योके पुछ़ने लगो, "ऐह सखत हुक्म राज़े किजो दित्तो?" तैखन अर्योके दानिय्येले तैन सब किछ ज़ोवं ज़ैन भोवरू थियूं। 16 ते दानिय्येले अकदम अन्तर गेइतां राज़े कां बिनती की, कि तैसेरे लेई कोई वक्त रख्खो गाए, त तै महाराज़ेरे सुपनेरो मतलब ज़ोलो।

17 तैखन दानिय्येले अपने घरे गेइतां, ते अपने साथी हनन्याह, मीशाएल, ते अजर्याहे ऐह सारो बिस्तार शुनाव; 18 एस भेतेरे बारे मां सुर्गेरे परमेशरेरे दयारे लेई एन ज़ोइतां प्राथना केरा, कि बाबेलेरे पंडतन सेइं साथी दानिय्येल ते तैसेरे साथी नाश न किये गान। 19 तैखन तै भेद दानिय्येले पुड़ रातरे मौके दर्शनेरे ज़िरिये बांदो भोव। तैखन दानिय्येले सुर्गेरे परमेशरे कां एन ज़ोइतां शुक्र कियूं।✝

20 "परमेशरेरे नंव्वेरी तारीफ़ हमेशा-हमेशा भोती राए;

किजोकि समझ़ ते शक्ति सिर्फ तैसेरीए।

21 वक्त ते मौसम तैए बदलते;

तैए राज़न कायम भी केरते, ते तैए खतम भी केरते;

अक्लमन्दन अक्ल ते समझ़दारन समझ़ भी तैए देते;

22 तैए डुग्घी ते छ़ेपोरी गल्‍लां बैंदी केरते;

तैए ज़ानते कि आंधरे मां कुने,

ते तैस सेइं साथी हमेशा लौ टिकोरी रहतीए।

23 हे मेरे दादा-पड़दादां केरे परमेशर,

अवं तेरू शुक्र ते तारीफ़ केरताईं,

किजोकि तीं मीं अक्ल ते शक्ति दित्तोरिए;

ते ज़ै भेद खोलनो असेईं तीं करां मगोरो थियो,

तै तीं असन पुड़ बांदो कियो,

तीं असन सेइं राज़ेरू सुपनु ज़ोवं।"

24 तैखन दानिय्येले अर्योके कां गेइतां, ज़ै राज़े बाबेलेरे पंडतन नाश केरनेरे लेई ठहरावरो थियो, अन्तर गेइतां ज़ोवं, "बाबेलेरे पंडतन नाश न केर, मीं राज़े कां अन्तर ने, अवं मतलब ज़ोइलो।"

25 तैखन अर्योके अकदम दानिय्येल अन्तर राज़े कां नेइतां ज़ोवं, "यहूदा प्रदेशेरे गुलाम लोकन मरां अक मैन्हु मीं मैल्होरोए, ज़ै राज़े सुपनेरो मतलब ज़ोलो।" 26 राज़े दानिय्येले ज़ेसेरू नवं बेलतशस्सर भी थियूं पुछ़ू, "कुन तीं मां एत्री शक्तिए कि ज़ैन सुपनु मीं लाहेरूए, तैसेरे मतलबे समेत मीं सेइं ज़ोलो?" 27 दानिय्येले राज़े ई जुवाब दित्तो, "ज़ै भेद राज़ो पुछ़ते, तै न त पंडत न तांत्री न जोष्टी ते न होरो कोई एजने बाले वक्तेरे बारे मां ज़ोनेबाले राज़े सेइं ज़ोईं सखन, 28 पन भेतां केरो बांदो केरनेबालो परमेशर सुर्गे मांए; ते तैन्नी नबूकदनेस्सर राज़े सेइं ज़ोवरूए कि आखरी दिहाड़न मां कुन-कुन भोनेबालूए। तेरू सुपनु ते ज़ैन किछ तीं बिछ़ाने पुड़ लाहेरू थियूं तैन इन आहे: 29 हे राज़ां, ज़ैखन तीं बिछ़ाने पुड़ ई खियाल अव कि एजने बाले वक्ते मां कुन-कुन भोनेबालूए, तैखन भेतां केरे खोलने बाले तीं सेइं ज़ोवं, कि कुन-कुन भोनेबालूए। 30 मीं पुड़ ऐह भेद एल्हेरेलेइ नईं बांदो कियोरो कि अवं सेभी लोकन करां जादे अक्लमन्द आईं, पन सिर्फ एल्हेरेलेइ खोलोरोए कि सुपनेरो मतलब राज़े शुनाव गाए, ते तू अपने मनेरे खियाल सेमझ़ी सखस।

31 "हे राज़ां, ज़ैखन तू सुपनु हेरने लगोरो थियो, तैखन अक बड्डी मूरती लेइहोने लगी, ते ज़ै मूरती तेरे सामने खड़ी थी, तै बड़ी लम्मी-चौड़ी थी; तैसारी चमक अनोखी थी, ते हेरने मां भी डरनेरी थी। 32 तैस मूरतरी क्रोड़ी त खालिस सोन्नेरी थी, ते तैसारी पैखड़ी ते छाती चैंदरी, ते तैसारू पेट ते पट पितलरे, 33 ते तैसारी ज़ंघां लोंहेरी ते तैसारे पव किछ लोंहेरे ते किछ मित्तरे थिये। 34 फिरी हेरते-हेरते तीं कुन लावं, कि अक घोड़ बगैर केन्चेरे कढने एप्पु निस्सो ते बिछ़ड़तां तैस मूरतरे पव्वन पुड़ पेव ज़ैना मित्तरे ते लोंहेरे थिये तैना च़कराच़ूर किये। 35 तैखन लोंह, मित्ती, पितल, चाँदी ते सोन्नू सब च़कराच़ूर भोइ जेवं, ते धुप्परे दिहाड़न मां खलाड़रे भूंसेरी ज़ेरि हवाई मां उडरी जेई, ते तैसारो कोई निशान न राव; ते तै घोड़ ज़ै मूरती पुड़ बज़्ज़ोरो थियो, ते तै बड़ो पहाड़ बेनतां सैरी धेरती पुड़ फैली जेव।

36 "हे राज़ा एन्ने तेरू सुपनु आहे; हुनी अस एसेरो मतलब तीं समझ़ातम। 37 हे राज़ां, तू महाराज़ोस, किजोकि सुर्गेरे परमेशरे तीं राज़, शक्ति ते शान-ओ-शोकत दित्तोरिए, 38 ते ज़ैड़ी भी मैन्हु आन, तैना सब, ते जंगली जानबर, ते अम्बरेरां च़ुड़ोलू सब तेरे कब्ज़े मां कियोरन; ते तू तैन सेभी केरो अधिकारी बनेवरोस। ई सोन्नेरी क्रोड़ी राज़ां तू आस। 39 तेरां बाद अक होरू राज़ एज्जेलू ज़ैन तीं करां निकड़ू भोल्हु; फिरी तैसेरां बाद ट्लेइयोवं राज़ एज्जेलू ज़ैन पितलरू भोल्हु ज़ैस मां सारी धरती एज्जेली। 40 ते च़ेवरोवं राज़ लोंहेरू ज़ेरू मज़बूत भोल्हु; लोंहे सेइं त सब चीज़ां चूर-चूर भोइ गैतिन ते पिहोई गैतिन; तेन्च़रे च़ेवरोवं राज़े मरां सब किछ चूर-चूर भोइतां पिहोई गालू। 41 ते तीं ज़ैना मूरतरे पव ते तैसारी एंगलोई लेही, ज़ैन किछ कुम्हारेरी मित्तरू ते लोंहेरू थियूं, एस सेइं तैन च़ेवरोवं राज़ बंटोरू भोल्हु; फिर भी तैस मां लोंहेरो ज़ेरो लेकड़ार भोल्हो, ज़ेन्च़रे तीं कुम्हारेरी मित्ती सेइं साथी लोंह भी मिलोरू सुपनु लाहेरू थियूं।✝ 42 ते ज़ेन्च़रे मूरतरे पव्वां केरि एंगलोई किछ लोंहेरी ते किछ मित्तरी थी, एसेरो मतलब एहे, कि तैन राज़ किछ त मज़बूत ते किछ कमज़ोर भोल्हु। 43 ते तीं ज़ैन लोंह कुम्हारेरी मित्ती सेइं मिलोरू लाव, एसेरो मतलब एहे कि तैस राज़ेरे लोक एक्‍की होरि मैन्हन सेइं मिलते त राले, पन ज़ेन्च़रे लोंह मित्ती सेइं मेल न रख्खे, तेन्च़रे तैना भी एक्‍की होरि सेइं मेल न रखेले। 44 ते तैन राज़ां केरे राज़ केरनेरे दिहाड़न मां सुर्गेरो परमेशर, अक एरू राज़ खड़ू केरेलो ज़ैन हमेशा तगर बनोरू रालू, ते न तैन कोन्ची होरि कौमरे हथ्थे मां कियूं गालू। बल्के तैन सेभी रियासतन चूर-चूर केरेलू, ते तैन केरो खातमो केरतां छ़डेलू; ते तैन राज़ हमेशा कायम रालू। 45 ज़ेन्च़रे तीं सुपनु लावं कि अक घोड़ बिना केन्चेरे कढने पहाड़े मरां बिछ़ड़ो, ते तैनी लोंह, पितल, मित्ती, चाँदी ते सोन्नू, चूर-चूर केरतां छ़डू, तैस्से तरीके सेइं महान परमेशरे राज़े पुड़ बांदू कियोरूए कि एसेरां बाद कुन-कुन भोनेबालूए। न सुपने मां ते न तैसेरे मतलबे मां कोई शक्‍के।"

46 इन शुन्तां नबूकदनेस्सर राज़े तुत्तरेरे भारे झुकतां दानिय्येले कां मथ्थो टेको, ते अपने लोकन हुक्म दित्तो कि तैस कां भेंट च़ाढ़ा, तैसेरे तुत्तरे अगर खुशबूदार चीज़ां बाला। 47 फिरी राज़े दानिय्येले सेइं ज़ोवं, "सच़ त एने कि तुश्शे लोकां केरो परमेशर सेभी ईश्वरां केरो परमेशरे, राज़ां केरो राज़ो ते भेतां केरो खोलने बालोए, एल्हेरेलेइ तू ऐह भेद बांदो केरि बटो।"

48 तैखन राज़े दानिय्येलेरो ओदो बधव ते तैस बड्डे-बड्डे तोफे दित्ते; ते ऐह हुक्म दित्तो कि दानिय्येल बाबेलेरे सेभी सूबन पुड़ हाकिम ते बाबेलेरे सेभी पंडतन पुड़ खास प्रधान बने। 49 तैखन दानिय्येलेरे बिनती केरने सेइं राज़े शद्रक, मेशक ते अबेदनगो बाबेलेरे सूबन पुड़ कम्मां केरेनेरे लेई अधिकारी ठहराए; पन दानिय्येल एप्पु राज़ेरे दरबारे मां हाज़र रातो थियो।