1 नबूकदनेस्सर राज़ेरी तरफां मुल्खे-मुल्खेरे ते कौमां-कौमां केरे लोकां केरे लेई, ते अलग-अलग भाषा केरनेबाले लोकां केरे लेई ज़ेत्रे भी इस धेरती पुड़ रहतन, तैन सेभन ई सन्देश मैल्हो, "कि तुश्शी तरक्‍की भोए! 2 मीं एन रोड़ू लग्गू, कि परमप्रधान परमेशरे मीं ज़ैना-ज़ैना निशान ते चमत्कार हरेवरेन, तैन बांदे केरीं। 3 तैसेरे हरेवरे निशान केत्रे बड़े ते तैसेरे चमत्कारेइं सेइं केत्री बड़ी शक्ति बांदी भोतीए! तैसेरी हुकूमत हमेशा तगर ते तैसेरू राज़ पीढ़ी-पीढ़ी तगर कायम रहते।

4 "अवं, नबूकदनेस्सर अपने घरे मां सुखे सेइं ते अपने मेहले मां बड़े आनन्दे सेइं रहतो थियो। 5 पन मीं एक्‍की राती एरू सुपनु लावं कि अवं तैस सेइं डेरि जेव; ते पलंघे पुड़ लेटतां ज़ैना खियाल मेरे मने मां आए ते ज़ैना गल्‍लां मीं लेही, तैन करां अवं डेरि जेवरो थियो। 6 तैखन मीं हुक्म दित्तो कि बाबेलेरे सारे पंडत लोक मेरे सुपनेरो मतलब ज़ोनेरे लेई मेरे सामने हाज़र किये गान। 7 तैखन जोष्टी, तांत्री, कसदी ते एजने बाले वक्तेरे बारे मां ज़ोनेबाले मेरे मेहले मां आए, ते मीं तैन सेइं अपनु सुपनु शुनावं, पन तैना मेरे सुपनेरो मतलब न ज़ोईं सखे। 8 आखरी मां दानिय्येल मेरे सामने अव, ज़ेसेरू नवं मेरे देबतेरी वजाई सेइं बेलतशस्सर रख्खू जेवरू थियूं, ते ज़ैस मां पवित्र ईश्वरां केरि आत्मा रहतीए; ते मीं तैस अपनु सुपनु एन ज़ोइतां शुनावं, 9 हे बेलतशस्सर तू त सेभी जोष्टी केरो प्रधानस, अवं ज़ानताईं कि तीं मां पवित्र ईश्वरां केरि आत्मा रहतीए, ते तेरे लेई कोन्ची भी भेतेरो मतलब ज़ोनो मुश्किल नईं; एल्हेरेलेइ ज़ैन सुपनु मीं लाहेरूए तैस मतलबे समेत मीं समझ़ा दे। 10 ज़ैन दर्शन मीं पलंघे पुड़ लाव तैन इन्ने, मीं हेरू, कि ज़मीनरे मझ़ाटे अक बुट लगोरोए; तैसेरी ऊँचाई बड़ी बड्डीए। 11 तै बुट बेडोइतां बड़ो मज़बूत भोव, ते तैसेरी ऊँचाई अम्बरे तगर पुज़्ज़ी, ते तै धेरतरे कूने-कूने पुड़ां लेइहोते। 12 तैसेरां पट्लां बड़ां खूबसूरतन, ते तैस मां बड़ो फल लगोरोए, एड़ी तगर कि तैस मां सेभी केरे लेई खूराके, ते जंगलेरे सेभी जानबरन तैस हैठ बिशनेरे लेई छाव मैलती थी, ते तैसेरे डालन पुड़ सब च़ुड़ोलू बिशतां थियां, ते सब प्राणी तैस करां खूराक खाते थिये।

13 "मीं पलंघे पुड़ लेटतां दर्शन हेरते कुन लावं, कि अक पवित्र दूत सुर्गे मरां उतरतां अव। 14 तैनी बड़े ज़ोरे सेइं ज़ोवं, ‘एस बुट्टे केट्टी छ़डा, तैसेरे डाल केट्टी छ़डा, ते तैसेरां पट्लां ट्लेट्टी छ़ड्डा, ते तैसेरो फल छेकतां छ़डा, जानबर तैस हेठोरां नेश्शी गान, ते च़ुड़ोलू तैस पुड़ेरां उडरी गान। 15 तैनी स्वर्गदूते इन भी ज़ोवं, फिरी भी तैसेरू ढिक ज़ीलन सने ज़मीनी मां राने देथ, ते तैस लोंहेरी ते पितलरी शंगलेइं सेइं बेन्धतां सब्ज़ घासे मां राने देथ। तैस अम्बरेरी ओश पेली ते तै ज़मीनी पुड़ जानबरन सेइं साथी घास खातो राए। 16 तैसेरो मन बदले ते मैन्हेरो न राए, पन जानबरेरो ज़ेरो बेनि गाए; तैस हालती मां सत साल बीतेले। 17 ऐह हुक्म तैस दूतेरे फैसले सेइं, ते ऐह गल पवित्र स्वर्गदूत केरे वचने सेइं निस्सी, कि ज़ैना ज़ींतेन तैना बुझ़न कि परमप्रधान परमेशर मैन्हु केरे रियासती मां हुकूमत केरते, ते तै ज़ैस चाते तैस देते, ते तै निकड़े करां निकड़े मैन्हु भी तैस पुड़ राज़ केरनेबालो ठहराते।’"

18 मीं नबूकदनेस्सर राज़े एन सुपनु लावं। एल्हेरेलेइ हे बेलतशस्सर, तू एसेरो मतलब ज़ो, किजोकि मेरे रियासती मां कोई ज्ञानी एसेरो मतलब मीं न समझ़ेई सखे, पन तीं मां पवित्र ईश्वरां केरि आत्माए, एस वजाई सेइं तू एसेरो मतलब मीं समझ़ेई सखतस। 19 तैखन दानिय्येल ज़ेसेरू नवं बेलतशस्सर भी थियूं, एक्‍की सैइती डरो, ते सोचते-सोचते परेशान भोव। तैखन राज़ो ज़ोने लगो, "हे बेलतशस्सर एस सुपने सेइं तू परेशान न भो।" बेलतशस्सरे ज़ोवं, "हे मेरे मालिक, एन सुपनु तेरे बैरी लोकन पुड़, ते तैसेरो मतलब तेरे दुश्मन पुड़ एज्जे! 20 ज़ै बुट तीं लाव, ज़ै बड्डो ते मज़बूत भोव, ते ज़ेसेरी ऊँचाई अम्बरे तगर पुज़्ज़ी, ते ज़ै धेरतरे कूने-कूने तगर लेइहोतो थियो; 21 ज़ैसेरां पट्लां बड़ां खूबसूरत ते बड़े फल थिये, ते ज़ैस मां सेभी केरे लेई खूराक थी, ते ज़ैस हैठ जंगलेरे सारे जानबर रहते थिये, ते तैसेरे डालन पुड़ अम्बरेरी च़ुड़ोलू बिशतां थियां, 22 हे राज़ा, तै तू आस। तू महान ते सामर्थी भोइ जेव, ते तेरी आदर बधी ते अम्बरे तगर पुज़्ज़ी जेई, ते तेरू राज़ धेरतरे कूने-कूने तगर फैली जेव। 23 ते हे राज़ा, तीं ज़ै अक पवित्र दूत सुर्गेरां उतरते ते एन ज़ोतो लाहोरोए कि बुट्टे केट्टी छ़डा, ते तैसेरो नाश केरा, फिरी भी तैसेरे ढिक्‍के ज़ीलन समेत ज़मीनी मां राने देथ, ते तैस लोंहेरी ते पितलरी शंगलेइं सेइं बेन्धतां जंगलेरे सब्ज़ घासे मां राने देथ; तै अम्बरेरी ट्लेली सेइं सिज़तो राए, ते तैस जंगलेरे जानबरन सेइं साथी हिस्सो मैलतो रालो; ज़ांतगर सत साल न बीतन, तांतगर तैसेरी एरी हालत राए। 24 हे राज़ा, एसेरो मतलब ज़ै परमप्रधान परमेशरे थापोरोए तै राज़े पुड़ बीते, तै ई आहे, 25 तू मैन्हन मरां कढो गालो ते जंगलेरे जानबरन सेइं साथी रालो; तू दांतां केरो ज़ेरो घास खालो; ते अम्बरेरी ट्लेली सेइं तू सिज़तो रास, ते सत साल तीं पुड़ बीतेले, ज़ांतगर तू न बुझ़ेलो कि मैन्हन पुड़ राज़ परमप्रधान परमेशरे केरते, ते तै ज़ैस चाहे तैस्से देते। 26 ते तैस बुट्टेरू ढिक ज़ैन ज़ीलन समेत रानेरे लेई ज़ै हुक्म दित्तोरोए, तैसेरो मतलबे कि तेरू राज़ फिर भी बनेरू रालू, ते ज़ैखन तीं पतो लग्गेलो कि दुनियारो प्रभु सुर्गे मां राज़ केरते, तैखन फिरी तू राज़ केरि बटेलो। 27 एस वजाई सेइं हे राज़ा, मेरी राई खुशी सेइं मन, कि अगर तू पाप शैरतां धार्मिकता केरने लग्गस, ते अधर्म शैरतां गरीबन पुड़ दया केरने लग्गस, त भोइ सकते कि तू कामयाब बनोरो रास।"

28 एन सब किछ नबूकदनेस्सर राज़े पुड़ बितू। 29 बारहे महीने बीतनेरां बाद ज़ैखन तै बाबेलेरे मेहलेरे छती पुड़ हंठने फिरने लगोरो थियो, तैखन तै ज़ोने लगो, 30 "कुन इन बड़ू बाबेल नईं, ज़ै मीं अपने बलबूते पुड़ ते एपनी शेक्ति सेइं शाही मेहल भोनेरे लेई ते अपने शान-ओ-शोकतरे लेई बसाव?" 31 ऐह गल राज़ेरे ज़बाना हेजू निसोरी भी न थी, कि अम्बरेरां आवाज़ आई, "हे नबूकदनेस्सर राज़ा तेरे बारे मां ऐह हुक्म निसोरोए, कि राज़ तेरे हथ्थेरां छुटोरूए, 32 ते तू मैन्हन मरां कढो गालो, ते जंगली जानबरन सेइं साथी रालो; ते दांतां केरो ज़ेरो घास खालो ते सत साल तीं पुड़ एरे बीतेले, ज़ांतगर तू न समझ़ेलो कि परमप्रधान परमेशरे मैन्हन पुड़ हुकूमत केरते, ते तै ज़ैस चाते तैस्से देते।" 33 तैस्से वक्त इन वचन नबूकदनेस्सर राज़ेरे बारे मां पूरू भोवं। तै मैन्हन मरां कढो जेव ते दांतां केरो ज़ेरो घास खाने लगो, ते अम्बरेरी ट्लेली सेइं तै सिज़ने लगो, एड़ी तगर कि तैसेरे बाल उकाबेरे फंघां केरे ज़ेरे लम्मे ते नोहो च़ुड़ोलू केरे पंजां केरे ज़ेरे लम्मे भोइ जे।

34 तैन सत सालां केरे बीतने पुड़ मीं नबूकदनेस्सर राज़े सुर्गेरे पासे नज़र दित्ती, ते मेरी अक्ल फिरी ज़ेरि तां तेरही भोइ जेई; तैखन मीं परमप्रधान परमेशरेरी तारीफ़ की, ज़ै हमेशा ज़ींतोए तैसेरी तारीफ़ ते महिमा एन ज़ोइतां केरने लगो:

तैसेरी हुकूमत हमेशा तगरे

ते तैसेरू राज़ पीढ़ी-पीढ़ी तगर कायम रहते।

35 ज़मीनरे सब रानेबाले किछ भी नईं,

ते परमेशर सुर्गेरी सेना, ते धेरतरे रानेबालां केरे मझ़ाटे

अपने मेर्ज़रे मुताबिक कम केरते;

ते तैस कोई भी रोकतां ज़ोईं न सखे, "तीं एन कुन कियोरूए?"

36 तैस वक्त मेरी अक्ल फिरी ज़ेरि थी तेरही भोइ जेई, ते मेरे हुकूमतरी शान-ओ-शोकत फिरी बहाल भोइ जेई, ते मेरू ताज फिरी मीं मैल्हू, ते मेरे मंत्री ते मेरे प्रधान मीं सेइं मुलाकात केरने लगे, ते अवं दुबारो तखते पुड़ बिशालो, ते मेरी इज़्ज़त पेइले करां जादे भोइ जेई। 37 ते हुनी अवं नबूकदनेस्सर सुर्गेरे राज़े परमेशरेरी बडीयाई केरताईं, ते तैसेरी तारीफ़ ते महिमा केरताईं, किजोकि तैसेरां सब कम्मां सच़्च़ां, ते तैसेरो फैसलो धर्मेरो भोते, ते ज़ैना लोक घमण्डे सेइं च़लतन, तैन तै उन्ढे केरि सकते।