1 एन गल्‍लन पत्ती यहूदी केरू अक तिहार भोवं, ते यीशु यरूशलेम नगरे जो जेव। 2 यरूशलेम नगरे मां भैड्डां केरे फाटक कां अक हावदे, ज़ैस जो इब्रानी भाषाई मां बैतहसदा ज़ोतन, तैसेरां पंच़ अंगना थियां। 3 एन मां बड़े बिमार, काने, टोन्टे, नीपाते (पानी हीलनेरे इंतज़ारे मां) भोते थिये। 4 (किजोकि वक्ते पुड़ परमेशरेरो स्वर्गदूत हावदे पुड़ एइतां पानी हिलातो थियो, ते पानी हिलनेरां पत्ती ज़ै कोई पेइलो हावदे मां गातो थियो तै ठीक भोतो थियो, चाए तैसेरी कोई भी बिमारी किना भोए)। 5 तैड़ी अक मैन्हु थियो, ज़ै 38 सालां केरो बिमार थियो। 6 यीशुए तै तैड़ी बिशोरो लाव ते एन ज़ैनतां कि ऐह बड़ो च़रोकनो इस हालती मांए, ते तैस पुछ़ू, "कुन तू ठीक भोनू चातस?" 7 तैने बिमारे जुवाब दित्तो, "हे प्रभु, मीं कां कोई मैन्हु नईं, कि ज़ताली पानी हिलावं गाए त मीं कोई हावदे मां गाने लेई मेरी मद्दत केरे, मेरे पुज़ते-पुज़ते तांतगर होरो कोई गाते।" 8 यीशुए तैस सेइं ज़ोवं, "उठ अपनि खट सल्‍ल ते च़ल फिर।" 9 तै मैन्हु तैखने ठीक भोव, ते अपनि खट छ़ुइतां च़लने फिरने लगो।

10 तै आरामेरी दिहाड़ी थी एल्हेरेलेइ यहूदी लीडर तैस सेइं ज़ै ठीक भोवरो थियो, ज़ोने लग्गे, "अज़ त आरामेरी दिहाड़ी आहे, तीं खट छ़ूनी जाइज़ नईं।" 11 तैने तैन जुवाब दित्तो, "ज़ैने अव ठीक कियो, तैने मीं सेइं ज़ोवं, ‘अपनि खट छ़ू ते च़ल फिर।’" 12 तैनेईं तैस पुछ़ू, "तै कौन मैन्हुए ज़ैने तीं सेइं ज़ोवं, ‘खट छ़ुइतां च़ल फिर?’" 13 ज़ै ठीक भोवरो थियो तै न थियो ज़ानतो कि तै कौन आहे, किजोकि तैस ठैरी भीड़ भोनेरे वजाई सेइं यीशु तैस ठैरारां होरि पासे च़ुपच़ारे च़लो जेवरो थियो। 14 एन गल्‍लन पत्ती यीशु तै मन्दरेरे अंगने मां मैल्हो, यीशुए तैस सेइं ज़ोवं, "तक, तू ठीक भोवरोस, फिरी पाप न करां, एरू न भोए कि, एस करां बड्डी आफत एज्जे।" 15 तैने मैन्हे यहूदी लीडरन सेइं ज़ोवं, कि ज़ैने अवं ठीक कियोरोईं तै यीशुए। 16 एल्हेरेलेइ यहूदी लीडर यीशु सताने लाए, किजोकि तै एरां ज़ेरां कम्मां आरामेरे दिहाड़े केरतो थियो। 17 एस पुड़ यीशुए तैन सेइं ज़ोवं, "मेरो बाजी यानी परमेशर हमेशा कम केरते, मीं भी कम कियोरू लोड़े।" 18 एस वजाई सेइं यहूदी लीडर मनां जादे तैस मारनेरी कोशिश केरने लगे, किजोकि तै न सिर्फ आरामेरे दिहाड़ेरो हुक्म ट्लोड़तो थियो बल्के परमेशरे अपनो बाजी ज़ोतो थियो ते अपनो आप परमेशरेरे बराबर बनातो थियो।

19 यीशुए तैन सेइं ज़ोवं, "अवं तुसन सेइं सच़-सच़ ज़ोताईं, मट्ठू यानी अवं एप्पू किछ न केरि बेटि, सिर्फ तैन ज़ैन बाजी परमेशरे करां केरतू लहताईं, किजोकि ज़ैना-ज़ैना कम्मां बाजी करां केरतो लहते तैन मट्ठू भी तैस्से तरीके सेइं केरते। 20 किजोकि बाजी, मट्ठे सेइं प्यार केरते, ते ज़ैना-ज़ैना कम्मां तै एप्पू केरते, तैना सब मट्ठे भी हिराते, ते तैन एस करां भी बड्डां कम्मां हिरालू, ताके तुस हैरान भोथ। 21 किजोकि ज़ेन्च़रे बाजी मुड़दन ज़ींतो केरते, तेन्च़रे मट्ठू भी ज़ैस चाते तैस ज़ींतो केरते। 22 बाजी केन्चेरो न्याय न केरे, पन तैने न्याय केरनेरू सारू कम मट्ठे दित्तेरूए। 23 कि सब लोक ज़ेन्च़रे बाजेरी आदर केरतन तेन्च़रे मट्ठेरी भी आदर केरन, ज़ै मट्ठेरी आदर न केरे, तै बाजी केरि ज़ैने तैन भेज़ोरूए तैसेरी आदर न केरे। 24 अवं तुसन सेइं सच़ ज़ोताईं ज़ै मेरू वचन शुन्तां मेरे भेज़ने बाले पुड़ विश्वास केरते, हमेशारी ज़िन्दगी तैसेरीए, ते तैस पुड़ सज़ाहरो हुक्म न भोए, बल्के तै मौतरां पार भोइतां हमेशारे ज़िन्दगी मां दाखल भोते।"

25 "अवं तुसन सेइं सच़-सच़ ज़ोताईं, कि तै वक्त एजनेबालोए, बल्के हुन्नाए ज़ैस मां मुड़दे परमेशरेरे मट्ठेरी यानी मेरी आवाज़ शुनेले, ते ज़ैना शुनेले तैना हमेशा ज़ीएले। 26 किजोकि ज़ेन्च़रे बाजी अपने आपे मां ज़िन्दगी रखते तेन्च़रे तैने मट्ठे भी ऐह अधिकार दित्तोरोए, कि अपने आपे मां ज़िन्दगी रख्खे एल्हेरेलेइ तैन मैन्हेरू मट्ठूए। 27 बल्के बाजी परमेशरे तैस सैरी लोकां केरि आदालत केरनेरो भी अधिकार दित्तोरोए, एल्हेरेलेइ कि तैन यानी अवं मैन्हेरू मट्ठू आईं। 28 एसमां हैरान न भोथ, किजोकि तै वक्त एइते कि ज़ेत्रे कब्रन मां आन तैसेरी आवाज़ शुन्तां ज़ींते भोनेन। 29 ज़ैनेईं भलियाई कियोरीए हमेशारे ज़िन्दगरी लेई ज़ींते भोनेन ज़ैनेईं बुरी ज़िन्दगी ज़ीयोरीए तैना सज़ाहरे लेई ज़ींते भोनेन।"

30 "अवं अपने आपे सेइं किछ न केरि बेटि, ज़ेन्च़रे मेरो बाजी मीं ज़ोते तेन्च़रे अवं लोकां केरि आदालत केरताईं, ते मेरी आदालत सच़्च़ीए, किजोकि अवं अपने मेर्ज़ी सेइं नईं पन अपने भेज़ने बालेरी मर्ज़ी चाताईं। 31 अगर अवं अपनि गवाही एप्पू देईं, त मेरी गवाही सच़्च़ी नईं। 32 अक होरो आहे, यानी मेरो बाजी ज़ै मेरी गवाही देते, ते अवं ज़ानताईं ज़ै गवाही तै मेरे बारे मां देते तै सच़्च़ीए। 33 तुसेईं मैन्हु यूहन्ना कां मेरे बारे मां पुछ़ने भेज़े, ते तैनी सच़्च़ेरी गवाही दित्तोरीए। 34 पन अवं अपने लेई मैन्हेरी गवाही न चैई, पन यूहन्ना ज़ै गवाही दित्ती तैसेरे बारे मां मीं एल्हेरेलेइ ज़ोवं ताके तुसन मुक्ति मैल्हे। 35 तै त बलतो ते चमकतो दीयेरो ज़ेरो थियो, पन तुसन थोड़े च़िरेरे लेई तैसेरी लौई मां खुश भोनू रोड़ू लग्गू। 36 पन मीं कां ज़ै गवाहीए तै यूहन्नारी गवाही करां भी बड्डीए। किजोकि ज़ैन कम बाजे मीं केरनेरे लेई दित्तेरू मतलब इन्ना कम्मां ज़ैना अवं केरताईं, तैना मेरी गवाही देतन कि बाजे अवं भेज़ोरोईं। 37 ते बाजी ज़ैने अवं भेज़ोरोईं तैने मेरी गवाही दित्तोरीए, तुसेईं न कधी तैसेरी आवाज़ शुनोरीए, ते न तै आमने सामने लाहोरोए। 38 तुसेईं तैसेरी शिक्षा अपने मने मां नईं रख्खोरी, किजोकि तुसेईं मीं पुड़ विश्वास न कियो, कि अवं परमेशरे भेज़ोरोईं। 39 तुस पवित्रशास्त्रे मां एन पढ़तथ, किजोकि तुस सोचतथ कि हमेशारी ज़िन्दगी तैस मां मैलतीए, तै ईए, ज़ै मेरे बारे मां गवाही देते। 40 फिरी भी तुस हमेशारे ज़िन्दगी हासिल केरनेरे लेई मीं कां न एजनू चाथ। 41 अवं मैन्हन करां तारीफ़ न चैई। 42 पन अवं तुसन ज़ानताईं तुश्शे दिले मां परमेशरेरे लेई प्यार नईं। 43 अवं अपने बाजेरे अधिकारे सेइं एवरोईं, ते तुस मेरी गल न मन्नथ। अगर होरो कोई अपने अधिकारे सेइं एज्जे, त तैसेरी गल मन्नेले। 44 तुस मीं पुड़ विश्वास न केरि बटथ, किजोकि तुस एक्‍की होरि करां तारीफ़ चातथ, ते तुस तै तारीफ़ न चाथ ज़ै सिर्फ परमेशरेरे तरफांए। 45 इन न समझ़ा कि अवं बाजेरे सामने तुसन पुड़ दोष लेइलो, तुसन पुड़ दोष लानेबालोए त मूसोए, ज़ैस पुड़ तुसेईं भरोसो रखोरोए। 46 किजोकि अगर तुसेईं मूसेरो विश्वास कियोरो भोथो, त मेरो भी विश्वास केरेथे, किजोकि तैने मेरे बारे मां लिखेरूए। 47 तुस त तैसेरे कानूनेरे गल्‍लन पुड़ विश्वास न केरथ, ते फिरी तुस किजो मेरी गल्‍लन पुड़ विश्वास केरेले?"