1 पन यीशु अपने चेलन सेइं साथी ज़ैतून पहाड़े पुड़ जेव। 2 होरसां तै झ़ेझ़ां-झ़ेझ़ां मन्दरेरे अंगने मां जेव, बड़े लोक तैस कां आए ते तै बिशतां तैन शिक्षा देने लगो। 3 तैखन शास्त्री ते फरीसी लोक एक्‍की कुआन्शी ज़ै बदमाशी मां ट्लेइयोरी थी, तै मझ़ाटे खड़ी केरतां यीशु सेइं ज़ोवं, 4 "हे गुरू, ई कुआन्श बदमाशी केरते वक्त ट्लावरीए। 5 मूसेरे कानूने मां मूसा असन हुक्म दित्तोरोए कि एरी ज़ेरि कुआन्शी घोड़ेईं बैइतां मारा, ते तू एस कुआन्शरे बारे मां कुन ज़ोतस, कि अस एस कुन केरम?" 6 तैनेईं यीशु परखनेरे लेई ऐह गल ज़ोई, ताके तैस पुड़ दोष लाने जो गल मैल्हे। पन यीशु उन्ढे लिकतां एंगलोई सेइं ज़मीनी पुड़ लिखने लव। 7 ज़ैखन तैना तैस पुछ़ते राए, त तैनी उबरे तेकतां तैन सेइं ज़ोवं, "तुसन मरां ज़ैनी पाप न भोए कियोरोए, तैए पेइलो घोड़े बाए।" 8 ते फिरी उन्ढे लिकतां एंगलोई सेइं ज़मीनी पुड़ लिखने लव। 9 पन तैना एना शुन्तां बड्डन करां निकड़न तगर सारे एक्‍की पत्ती अक तैट्ठां च़ले जे, ते यीशु अकैल्‍लो राव, ते तै कुआन्श मझ़ाटे खड़ी राई। 10 यीशुए उबरे तेकतां तैस पुछ़ू, "हे कुआन्श, तैना कोरहां जे? कुन केन्चे तीं पुड़ सज़ाहरो हुक्म न दित्तो?" 11 तैसां ज़ोवं, "हे प्रभु केन्चे नईं।" यीशुए ज़ोवं, "अवं भी तीं सज़ाहरो हुक्म न देईं। अपने घरे जो गा ते फिरी पत्ती पापेरी न ज़िन्दगी ज़ीयां।"

12 यीशुए फिरी लोकन सेइं ज़ोवं, "दुनियारी लौ अव्वें आईं, ज़ै मीं पत्ती एज्जेलो त तै आंधरे मां न च़लेलो, पन तै लौ हासिल केरेलो ज़ै ज़िन्दगरी देचे।" 13 फरीसी लोकेईं तैस सेइं ज़ोवं, "तू अपनि गवाही एप्पू देतस, तेरी गवाही सच़्च़ी नईं।" 14 यीशुए तैन जुवाब दित्तो, "भला अवं अपनि गवाही एप्पू देताईं फिरी भी मेरी गवाही सच़्च़ीए, किजोकि अवं ज़ानताईं कि अवं कोट्ठां एवरोईं ते कोरहां गाताईं? पन तुस न ज़ानथ कि अवं कोट्ठां एवरोईं ते कोरहां गाताईं। 15 तुस इन्सानेरी सोचरे मुताबिक न्याय केरतथ, अवं केन्चेरी न्याय न केरि। 16 ते अगर अवं न्याय केरि भी त मेरो न्याय सच़्च़ोए, किजोकि अवं अकैल्‍लो नईं, पन अवं ते मेरो बाजीए, ज़ैनी अवं भेज़ोरोईं। 17 मूसेरे कानूने मां भी लिखोरोए कि दूई ज़नां केरि गवाही मिलतां सच़्च़ी भोतीए। 18 अक त अवं अपनि गवाही देताईं, ते दूइयोवं गवाही मेरो बाजी देते ज़ैनी अवं भेज़ोरोईं।" 19 तैनेईं तैस पुछ़ू, "तेरो बाजी कोड़ि आहे?" यीशुए जुवाब दित्तो, "न तुस मीं ज़ानतथ न मेरे बाजी, अगर मीं ज़ानते त मेरे बाजी भी ज़ानते।" 20 एना गल्‍लां तैनी मन्दरेरे अंगने मां शिक्षा देते भण्डार घरे मां ज़ोई, ते केन्चे तै न ट्लाव, किजोकि तैसेरो वक्त हेजू न थियो एवरो।

21 यीशुए फिरी तैन सेइं ज़ोवं, "अवं ज़ानताईं कि तुस मीं तोपेले ते पाप केरते-केरते मरेले, ज़ैड़ी अवं गाताईं तैड़ी तुस न एज्जी बटथ।" 22 एस पुड़ यहूदी लीडरेईं ज़ोवं, "कुन एने अपनो आप मारनोए, ज़ैन ज़ोते कि ज़ैड़ी अवं गाताईं तैड़ी तुस न एज्जी बटतथ?" 23 यीशुए तैन सेइं ज़ोवं, "तुस इस दुनियाई मां ज़र्मोरेथ, अवं सुर्गेरां एवरोईं। तुस दुनियारेथ, अवं दुनियारो नईं। 24 एल्हेरेलेइ मीं तुसन सेइं ज़ोवरू थियूं, कि तुस अपने पापन मां मरेले, किजोकि अगर तुस विश्वास न केरेले कि अवं तैए आईं त अपने पापन मां मरेले।" 25 यहूदी लीडरेईं तैस सेइं ज़ोवं, "तू कौन आस?" यीशुए तैन सेइं ज़ोवं, "ज़ैन शुरू करां ज़ोतो एवरोईं, अवं तैए आईं। 26 तुश्शे बारे मां मीं बड़ू किछ ज़ोनूए ते फैसलो केरनोए, पन मेरो भेज़ने बालो सच़्च़ोए, ते ज़ैन मीं तैस करां शुनोरूए तैन दुनियारे लोकन सेइं ज़ोताईं।" 27 तैनेईं एन न समझ़ू कि असन सेइं बाजी केरे बारे मां कुन ज़ोने लगोरोए। 28 तैखन यीशुए ज़ोवं, "ज़ैखन तुस मैन्हेरे मट्ठे यानी मीं उच्‍चे पुड़ च़ाढ़ेले, त ज़ानेले कि अवं तैए आईं, अवं अपने आपे सेइं किछ न केरि, ज़ेन्च़रे मेरो बाजी मीं शिखालते तेन्च़रे तैना गल्‍लां केरताईं। 29 मेरो भेज़ने बालो मीं साथीए, तैनी अवं अकैल्‍लो नईं शारोरो किजोकि अवं हमेशा तैन कम केरताईं ज़ैस सेइं तै खुश भोते।" 30 बड़े लोकेईं यीशुएरी तैना गल्‍लां शुन्ते वक्त ज़ैना तै ज़ोईं राओरो थियो तैस पुड़ विश्वास कियो।

31 तैखन यीशुए तैन यहूदन सेइं ज़ैनेईं तैस पुड़ विश्वास कियोरो थियो ज़ोवं, "अगर तुस मेरे वचने मां बन्नेरे राले, त सच़्च़े मेरे चेले भोल्हे। 32 तुस सच़ ज़ानेले ते सच़ तुसन आज़ाद केरेलू।" 33 तैनेईं तैस जुवाब दित्तो, "अस त अब्राहमेरे औलादी मरां आम, ते कधी केन्चेरे गुलाम नईं भोवरे, फिरी तू केन्च़रे ज़ोतस कि तुस आज़ाद भोल्हे?" 34 यीशुए तैन जुवाब दित्तो, "अवं तुसन सेइं सच़-सच़ ज़ोताईं कि ज़ै कोई पाप केरते तै पापेरो गुलामे। 35 गुलाम हमेशा घरे न रेइ सके, मट्ठू हमेशा रहते। 36 एल्हेरेलेइ अगर मट्ठू तुसन आज़ाद केरे त सच़्च़े तुस आज़ाद भोल्हे। 37 अवं ज़ानताईं कि तुस अब्राहमेरे औलादी मरां आथ, फिरी भी मेरी शिक्षा तुस मन्नथ, एल्हेरेलेइ तुस मीं मारने चातथ। 38 अवं तैन्ने ज़ोताईं ज़ैन मीं लव, ज़ैखन अवं अपने बाजी सेइं साथी थियो, ते तुस तैन्ने केरतथ ज़ैन तुसेईं अपने बाजी करां शुनोरूए।"

39 तैनेईं तैस जुवाब दित्तो, "इश्शो पूर्वज त अब्राहमे।" यीशुए तैन सेइं ज़ोवं, "अगर तुस अब्राहमेरे औलादी मरां भोथे त अब्राहमेरां ज़ेरां कम्मां केरेथ। 40 पन हुन्ना तुस मीं मारनो चातथ, किजोकि मीं तुसन तैना सेच़्च़ी गल्‍लां ज़ोई ज़ैना मीं परमेशरे करां शुनी, एरू त अब्राहमे न थियूं कियोरू। 41 तुस अपने बाजेरां ज़ेरां कम्मां केरतथ।" तैनेईं तैस सेइं ज़ोवं, "अस बदमाशी सेइं नईं ज़र्मोरे, इश्शो अक्‍के बाजीए, ते तै परमेशरे।" 42 यीशुए तैन सेइं ज़ोवं, "अगर परमेशर तुश्शो बाजी भोथो, त तुस मीं सेइं प्यार केरेथ, किजोकि अवं परमेशरेरे करां एवरोईं, अवं अपने तरफां नईं एवरो, बल्के तैनी भेज़ोरोईं। 43 तुस मेरी गल्‍लां किजो न समझ़थ? एल्हेरेलेइ कि तुस मेरी शिक्षा मन्नी न चाथ। 44 तुस अपने बाजी शैतानेरेथ, ते तैसेरी मर्ज़ी पूरी केरनि चातथ। तै त शुरू करां खूनी आहे ते सच़्च़े पुड़ बनोरो न राव, किजोकि सच़ तैस मां अथ्थी नईं। ज़ैखन तै झूठ ज़ोते त अपने स्भावेरे मुताबिक ज़ोते, किजोकि तै झूठो बल्के झूठेरो बाजीए। 45 पन अवं सच़ ज़ोताईं तांए तुस मेरो विश्वास न केरथ। 46 तुसन मरां मीं कौन पापेरो दोष लाते? अगर अवं सच़ ज़ोताईं त फिरी मेरो विश्वास की न केरथ? 47 ज़ै परमेशरेरे तरफां भोते तै परमेशरेरी गल्‍लां केरते, ते तुस एल्हेरेलेइ न शुनथ किजोकि तुस परमेशरेरे तरफां नईं।"

48 एना शुन्तां यहूदेईं तैस सेइं ज़ोवं, "कुन अस ठीक न थिये ज़ोते, कि तू सामरी मैन्हु आस, ते तीं मां भूते!" 49 यीशुए जुवाब दित्तो, "मीं मां भूत नईं, पन अवं अपने बाजेरी इज़्ज़त केरताईं, ते तुस मेरी निरादर केरतथ। 50 पन अवं अपनि बडीयाई न चैई, हाँ अक्‍के ज़ै चाते कि लोक मेरी बडीयाई केरन, ते तै आदालत केरनेबालो भी आहे। 51 अवं तुसन सेइं सच़-सच़ ज़ोताईं कि ज़ै कोई मैन्हु मेरे वचने पुड़ च़ले तै कधे न मरेलो।" 52 यहूदेईं तैस सेइं ज़ोवं, "हुनी त असेईं बुझ़ू, कि तीं मां भूते, अब्राहम ते नबी भी मरे, ते तू ज़ोतस, अगर कोई मेरे वचने पुड़ च़ले त तै कधी न मरेलो। 53 इश्शो पूर्वज अब्राहम मरो, कुन तू तैस करां भी बड्डो आस? ते नबी भी मरे, तू अपने बारे मां कुन सोचतस कि तू कौन आस?" 54 यीशुए जुवाब दित्तो, "अगर अवं अपनि बडीयाई केरि त मेरी बडीयाई किछ भी नईं। पन मेरी बडीयाई केरनेबालो मेरो बाजीए, ज़ैस तुस ज़ोतथ कि तै तुश्शो परमेशरे। 55 तुसेईं त तै न ज़ानो, पन अवं तैस ज़ानताईं, अगर अवं ज़ोईं कि तैस न ज़ैनी, त तुश्शो ज़ेरो झूठो भोइ। पन अवं तैस ज़ानताईं ते तैसेरे वचने पुड़ च़लताईं। 56 तुश्शो पूर्वज अब्राहम मेरी दिहाड़ी हेरनेरे उमीदी पुड़ बड़ी खुश थियो, ते तैनी हेरी, ते खुश भोव।" 57 यहूदेईं तैस सेइं ज़ोवं, "हेजू तू 50 सालां केरो भी नईं भोवरो फिरी भी तीं अब्राहम लाहोरोए?" 58 यीशुए तैन सेइं ज़ोवं, "अवं तुसन सेइं सच़-सच़ ज़ोताईं कि अब्राहम पैदा भोने करां पेइलो, अवं आईं।" 59 तैखन तैनेईं तैस मारनेरे लेई घोड़ सल्‍ले, पन यीशु छ़ेपतां मन्दरे मरां निस्सी जेव।