João 9

ज़र्मनेरे काने लौ देनी

1 फिरी यीशुए अपने चेलन सेइं साथी च़लोरो थियो, ते तैनेईं अक मैन्हु लाव, ज़ै ज़र्मनेरो कानो थियो। 2 तैसेरे चेलेईं तैस पुछ़ू, "हे गुरू, केने पाप कियो कि ऐह कानो ज़र्मो, एने मैन्हे या एसेरे अम्मा बाजे?" 3 यीशुए जुवाब दित्तो, "न एने पाप कियो, न एसेरे अम्मा-बाजेईं, पन तै एल्हेरेलेइ कानो ज़र्मो ताके परमेशरेरे चमत्कार एसमां लेइहोन। 4 ज़ैने अवं भेज़ोरोईं, असेईं तैसेरू कम लूशी केरनू ज़रूरीए, ज़ैन कम तैनी असन दित्तोरूए, तै रात एजने बालीए ज़ैस मां कोई भी कम न केरि सके। 5 ज़ांतगर अवं दुनियाई मां आई, अवं दुनियारी लौ आई।" 6 एन ज़ोइतां तैनी ज़मीनी पुड़ थुकू, ते तैस थुक्‍के सेइं मित्ती सन्नी, ते तै मित्ती कानेरे एछ़्छ़न पुड़ लाई। 7 ते तैस सेइं ज़ोवं, "गा शीलोह नंव्वेरे हावदे मां अपनु तुत्तर धो" (शीलोह मतलब भेज़ोरो) तैनी गेइतां धोवं, ते लहंतो वापस अव।