1,2 जनाब थियुफिलुस, बड़े लोकेईं तैना गल्‍लां हेरी ज़ैना प्रभु-यीशुए कियोरी थी, ज़ैखन तै असन सेइं साथी थियो, ज़ेइसेरां तैनी अपनु सेवारू कम शुरू कियोरू थियूं। तैन मैन्हेईं होरि मैन्हन यीशुएरे बारे मां शिक्षा देइतां परमेशरेरी सेवा की। बड़े मैन्हेईं तैन केरि गल्‍लां शुन्तां यीशुएरे बारे मां इश्शे लेई इतिहासेरी किताब लिखी। 3 मीं एप्पू तैन सैरी गल्‍लां केरि बड़े रोड़ेच़ारे छानबीन की। एल्हेरेलेइ, मीं एन रोड़ू लग्गू, कि अवं भी तुश्शे लेई तैन गल्‍लां केरे बारे मां ठीक डंगे सेइं इतिहासेरी किताब लिखी। 4 अवं चाताईं कि तीं पतो लग्गे कि यीशुएरे बारे मां तैना गल्‍लां सच़्च़ी आन, ज़ैन केरे बारे मां तुसन शिक्षा मैल्होरी थी।

5 यहूदिया इलाके मां, ज़ैखन हेरोदेस राज़ो राज़ केरतो थियो, त तैखन जकर्याह नंव्वेरो अक यहूदी याजक* थियो। तै मैन्हु याजकां केरे टोली मां अबिय्याह नंव्वेरो टोली मरां थियो। तैसेरी कुआन्शारू नवं एलीशिबा थियूं। एलीशिबा हारूनेरे खानदेंनी मरां थी, (हारून इस्राएल लोकां केरो पेइलो याजक थियो)। 6 तैना दूईये प्रभु-परमेशरेरी नज़री मां धर्मी थियां ते कने परमेशरेरे सारे कानून ते सारे हुक्मन पुड़ बेइलज़ाम च़लनेबालां थियां। 7 पन तैन केरि कोई औलाद न थी, किजोकि एलीशिबा बाँझ थी, ते तैना दूईये बुढां थियां।

8 एक्‍की फेरे, जकर्याहेरी टोली यरूशलेम नगरेरे मन्दरे मां सेवारू कम केरि राओरे थी, तैखन तै प्रभु परमेशरेरी हज़ूरी मां अपनु याजकेरू कम लोगोरो थियो केरने। 9 याजकां केरे रीतरे मुताबिक तैनेईं परची छ़ेडतां जकर्याह च़ुनो कि तै प्रभु-परमेशरेरे मन्दरे मां गेइतां गुग्गल बाले। 10 ज़ैखन तै गुग्गल बालने लेवरो थियो, त तैखन मैन्हु केरि सारी भीड़ मन्दरेरे बेइर प्राथना केरि राओरी थी। 11 तैखन अचानक प्रभु-परमेशरेरो अक स्वर्गदूत गुग्गल बालनेरी ठारारे देइने पासे खड़े भोइतां जकर्याह लेइहोव। 12 ज़ैखन जकर्याहे स्वर्गदूत लाव, त तै घेमरोव ते बड़ो डेरि जेव। 13 पन स्वर्गदूते तैस सेइं ज़ोवं, "हे जकर्याह, न डर! ज़ैखन तीं प्राथना की, त परमेशरे तेरी प्राथना शुनी। एल्हेरेलेइ, तेरी कुआन्श एलीशिबाई मट्ठू भोनूए, ते तू तैसेरू नवं यूहन्ना रेखां। 14 तैसेरे ज़र्म भोने सेइं तू बड़ो खुश भोल्हो। त बड़े लोक भी खुश भोल्हे। 15 तै प्रभु-परमेशरेरी नज़री मां महान भोल्हो, ते तैनी कोन्ची भी किसमेरी नश्शे बाले चीज़ त कने शराब कधे न लोड़े पियोरी, ते तै अपनि अम्मरे पेटे मां भोते वक्तेरां परमेशरेरी पवित्र आत्मारी शेक्ति सेइं भरपूर भोल्हो। 16 तै इस्राएली लोकन मरां बड़े लोक परमेशरेरे पासे ज़ै तैन केरो प्रभु परमेशरे वापस तैस कां आनेलो, ज़ैना अपने पापां केरि वजाई सेइं परमेशरे करां दूर भोवरे थिये। 17 ते तै एरो मैन्हु भोल्हो ज़ैस पुड़ एलिय्याहेरी आत्मा ते कने शक्ति भोल्ही। तै परमेशरेरी बत तियार केरेलो, तैस अग्री-अग्री च़लेलो ताके हाज बव्वां केरो दिल औलादरे पासे ते परमेशर न मन्नेबाले लोकन धेर्मी लोकां केरे बत्तां केरे पासे बदलेलो, ताके ज़ैखन प्रभु एज्जे त लोक तियार भोन।"

18 जकर्याहे स्वर्गदूते पुछ़ू, "अवं केन्च़रे मेन्नी एन असन सेइं भोनूए, अवं त बुढो आईं ते मेरी कुआन्श भी बुढी भोरीए।" 19 स्वर्गदूते जुवाब दित्तो, "अवं जिब्राईल आईं अवं परमेशरे कां खड़ो भोताईं, अवं एल्हेरेलेइ भेज़ोरोईं, कि अवं तीं सेइं गल केरि ते तीं ऐह खुशखबरी शुनेई। 20 ते हेर ज़ांतगर एना गल्‍लां पूरी न भोन तेरी ज़बान बंद भोल्ही, ते तू गल न केरि सकेलो किजोकि तीं मेरी गल्‍लां केरू याकीन नईं कियेरू ज़ैना अपने वक्ते पुड़ पूरी भोनिन।" 21 ते ज़ैखन जकर्याह ते स्वर्गदूत मन्दरे मां गल्‍लां लगोरे थिये केरने त लोक मन्दरेरे बेइर अंगने मां जकर्याहे बलगने लेवरे थिये, तैना बड़े हैरान भोइजेइ कि जकर्याहे मन्दरे मां एत्रू च़िर किजो लाऊं। 22 ज़ैखन तै बेइर निस्सो, त तै कुजी न बटो ते तैन लोकेईं बुझ़ी छ़डू, कि एनी मन्दरे मां किछ दर्शन लाहेरूए किजोकि तै इशारो केरतो थियो, पन कुजी न थियो बटतो। 23 ज़ेइस यरूशलेम नगरेरे मन्दरे मां जकर्याहेरू एक्‍की हफतेरे याजकेरी सेवारू कम पूरू भोवं, त तै अपने घरे जो च़लो जेव।

24 किछ वक्तेरां बाद तैसेरी कुआन्श एलीशिबा दोज़ींतीए भोइ, ते तै पंच़ महीन्न तगर बेइर लोकन मां न जेई। तैसां ज़ोवं, 25 "प्रभुए मीं पुड़ दया केरतां केत्रू महान कम कियूं, ते अवं दोज़ींती भोइ, ते ज़ैस गल्‍लरे वजाई सेइं लोक मीं घटिया समझ़ते थिये, तै गल दूर की।"

26 एलीशिबारे दोज़ींती भोनेरे शेइयोवं महीने जिब्राईल स्वर्गदूत परमेशरेरी तरफां गलील इलाकेरे नासरत नगरे मां, 27 एक्‍की अड्लैई कुइये कां भेज़ो। तैसारी कुड़माइ दाऊदेरे खानदाने मरां एक्‍की मड़दे सेइं भोवरी थी ज़ेसेरू नवं यूसुफ थियूं, ते तैस कुइयरू नवं मरियम थियूं। 28 स्वर्गदूते तैस कां एइतां ज़ोवं, "आनन्द ते ज़ींत तेरी भोए, तीं पुड़ परमेशरेरी बड़ी दया भोवरीए, प्रभु तीं सेइं साथिये!" 29 मरियम स्वर्गदूतेरी गल शुन्तां परेशान भोइतां सोचने लगी एन केरहु नमस्कारे? 30 स्वर्गदूते तैस सेइं ज़ोवं "हे मरियम, डर न, किजोकि परमेशरेरो तीं पुड़ बड़ो अनुग्रह भोवरोए। 31 तू दोज़ींती भोल्ही तीं अक मट्ठू भोल्हु, ते तू तैसेरू नवं यीशु रेखां। 32 तैन महान भोल्हु ते तैस जो परमप्रधान परमेशरेरू मट्ठू ज़ोले, ते परमेशर तैस तैसेरे पूर्वज दाऊद राज़ेरू ज़ेरो राज़ो बनालो। 33 ते तै याकूबेरे खानदाने पुड़ हमेशा राज़ केरेलो, ते तैसेरू राज़ कधे खतम न भोल्हु।" 34 मरियमा स्वर्गदूते पुछ़ू, "एन केन्च़रे भोइ सकते? अवं त अड्लाई आईं।" 35 स्वर्गदूते जुवाब दित्तो, "पवित्र आत्मा तीं पुड़ उतरेलो, ते परमप्रधान परमेशरेरी शक्ति तीं पुड़ सैयो केरेली एल्हेरेलेइ तै बच्‍चो ज़ै ज़र्मएलो तै पवित्र भोल्हो तैस जो परमेशरेरू मट्ठू ज़ोले। 36 ते हेर तेरी रिश्तेदार एलीशिबाई भी बुढे बारे मट्ठू भोनेबालूए तैस जो लोक बाँझ ज़ोते थिये, तैस दोज़ींती शा महीने भोरेन। 37 किजोकि परमेशरेरे लेई किछ भी नामुमकिन नईं।" 38 मरियमा स्वर्गदूते जुवाब दित्तो, "अवं परमेशरेरी सेवा केरती ज़ैन तीं ज़ोवरूए तैन भोए।" तैखन स्वर्गदूत तैस करां च़लो जेव।

39 किछ दिहाड़न पत्ती मरियम तियार भोइतां अकदम यहूदियारे इलाकेरे एक्‍की पहाड़ी नगरे मां जेई। 40 ते जकर्याहेरे घरे मां गेइतां एलीशिबा जो नमस्कार कियूं। 41 ज़ैखन एलीशिबा मरियमरू नमस्कार शुनू त बच्‍चो तैसारे पेटे मां उछ़ड़ने लगो ते एलीशिबा पवित्र आत्माई सेइं भेरोई जेई। 42 ते बड़े ज़ोरे सेइं ज़ोने लगी, "तू कुआन्शन मां धन आस ते ज़ै बच्‍चो तीं ज़ांनोए तै भी धने! 43 ते मेरे लेई बड़ी इज़्ज़तरी गल आहे कि, मेरे प्रभुएरी अम्मा मीं कां आई! 44 किजोकि हेर ज़ेरि तेरे नमस्कारेरी आवाज़ मीं शुनी त बच्‍चे खुशी सेइं मेरे पेटे मां छालां लगो मारने। 45 तू धन आस तीं तैन गल्‍लन पुड़ विश्वास कियो ज़ैना प्रभुए तीं सेइं ज़ोई कि, तैना पूरी भोल्ही।"

46 ते मरियमा ज़ोवं,

"अवं प्रभुएरी तारीफ़ केरती।

47 ते मेरी आत्मा मेरे मुक्ति देनेबाले

परमेशरे सेइं खुशी भोइ।

48 किजोकि तैनी अपनि सेवा केरने बैलरी गिरोरी हालती पुड़ नज़र की,

अज़्ज़ेरां देइतां हर ज़मानेरे लोक

मींजो धन ज़ोले।

49 किजोकि परमेशरे मेरे लेई बड़ां-बड़ां

कम्मां कियोरन ते तैसेरू नवं पवित्र भोए।

50 तैसेरी दया तैस करां डरने बालन

पुड़ पीढ़ी-पीढ़ी तगर राचे।

51 तैनी अपने शेक्ति सेइं बड्डां-बड्डां कम्मां कियोरन

तैनी घमण्डी तितर-बितर किये।

52 तैनी राज़े राज़ केरने करां रोके,

ते तैनी नम्र लोकन आदर दित्ती।

53 तैनी नियन्ने रोड़ी-रोड़ी चीज़ेइं सेइं रज़ांने

ते धन दौलती बाले खाली हथेइं भेज़े।

54 तैनी अपने वाधे ज़ैना तैनी इश्शे दादन-पड़दादन सेइं कियोरे थिये याद किये, तैनी अपनि सेवा केरनेबाले इस्राएली लोकां केरि मद्दत की,

55 तैनी हमेशारे लेई अब्राहमे पुड़ ते तैसेरी

औलादी पुड़ दया केरनि याद रख्खी।"

56 मरियम कोई ट्लाई महीन्न तगर एलीशिबा सेइं साथी राई ते फिरी अपने घरजो आई।

57 एलीशिबारो गल्हे बिशनेरो वक्त एज्जी अव ते तैस मट्ठू भोवं। 58 तैसारे आसे पासेरे रिश्तेदारेईं एन शुनू कि परमेशरे तैस पुड़ बड़ी दया कियोरिये ते तैस सेइं साथी खुशी मनाई। 59 अठोवं दिहाड़े तैना मट्ठेरो खतनो केरने आए, ते तैना तैसेरू नवं तैसेरे बाजी केरे नव्वें पुड़ जकर्याह रखनू चाते थिये। 60 पन तैसेरी अम्मा ज़ोने लगी, "नईं एसेरू नवं यूहन्ना भोल्हु।" 61 किछ तैस जो ज़ोने लगे, "तुश्शी खानदेंनी मां कोई भी एस नव्वेंरो नईं।" 62 तैखन तैन लोकेईं जकर्याहेरे पासे इशारे सेइं पुछ़ू कि तू मट्ठेरू नवं कुन रखनू चातस? 63 ते तैनी पटारी मग्गी ते तैस पुड़ लिखू, "एसेरू नवं यूहन्ना आहे," ते सब लोक हैरान रेइजे। 64 तैखने तैसेरी ज़िभ खुल्‍ली ते जकर्याह गल्‍लां लगो केरने ते परमेशरेरी तारीफ़ केरने लगो। 65 ते आसे-पासेरे लोक एस तमाशे हेरतां हैरान रेइजे, ते यहूदियारे इलाकेरे एक्‍की पहाड़ी नगरे मां एस गल्‍लरी चर्चा भोने लगी। 66 ते शुन्ने बाले अपने-अपने मन्न मां सोचते थिये, "एन मट्ठू बड्डू भोइतां केरहु भोनूए?" किजोकि परमेशरेरी शक्ति अज़्ज़ेरी देंतीं एस सेइं साथीए?

67 तैखन तैसेरो बाजी जकर्याह पवित्र आत्माई सेइं भेरोव ते भविष्यिवाणी केरने लगो।

68 "प्रभु इस्राएलेरो परमेशर धन भोए,

किजोकि तैनी एइतां अपने लोकन मुक्ति दित्तोरिये।

69 ते तैसेरे दास दाऊदेरे घराने मरां इश्शे लेई अक मुक्ति देनेबालो भेज़ोरोए।

70 (बड़े पेइले ज़ेन्च़रे पवित्र नेबी केरे ज़िरिये ज़ोवरू थियूं,

ज़ैन शुरू करां देंते एवरूए।)

71 असां अपने दुश्मन करां ते बैर रखनेबालन करां मुक्ति हासिल केरम।

72 ते तै इश्शे दादे पड़दादन पुड़ दया केरे

ते अपनो पवित्र करार याद केर।

73 तै करार ज़ै तीं इश्शे पूर्वज

अब्राहमे सेइं कियोरो थियो।

74 कि तै असन हिम्मत देलो,

कि असां अपने दुश्मन करां बगैर केन्ची भी डरे सेइं बेंच़ी सखम।

75 ते अपनि ज़िन्दगी तैस सोंफम ते सारी ज़िन्दगी पवित्रेइ ते धार्मिकता ज़ींम।

76 ते हे बच्‍चां तू नबी भोल्हो

किजोकि तू परमेशरेरे अग्री-अग्री च़ेलतां

लोकन तियार केरेलो कि परमेशर एजनोए।

77 तै अपने लोकन तैन केरे पाप माफ़ केरनेरे ज़िरिये मुक्तरे बारे मां ज्ञान देलो।

78 ते इश्शे परमेशरेरी दया एरी भोल्ही

ज़ेन्च़रे दिहाड़ो लौ देते तेन्च़रे मसीह सुर्गेरां एज्जेलो।

79 ताके तैन केरे लेई ज़ैना पापे मां ज़ीतन ते हमेशारे मौतरे खतरे मां रातन लौ दे,

ते तै असन बत हिराए ताके अस सुखे सेइं ज़िन्दगी ज़ींम।"

80 तैन मट्ठू यानी यूहन्ना बेडोतो जेव ते आत्माई मां बद्धतू जेव ते इस्राएलेरे लोकन प्रचार केरने तगर सुनसान ठैरन मां राव।