1 शमूएल 22

शाऊलेरे ज़िरिये याजक मारने

1 दाऊद गत नगरेरां च़लो, ते बेच़तां अदुल्‍लाम नगरेरी कुढी मां पुज़्ज़ो; एन शुन्तां तैसेरे ढ्ला, ते तैसेरे बाजेरू सारू टब्बर तैड़ी तैस कां जेवं। 2 ते ज़ेत्रे मुश्किली मां पेवरे थिये, ते ज़ेत्रे कर्ज़दार थिये, ते ज़ेत्रे उदास थिये तैना सारे तैस कां अकोट्ठे भोए; ते तै तैन केरो प्रधान भोव। ते लगभग 400 मैन्हु तैस सेइं साथी भोए।

3 तैट्ठां दाऊद मोआबेरे मिस्पे नगरे जो गेइतां मोआबेरे राज़े सेइं ज़ोवं, "मेरे अम्मा बाजी एप्पु कां तैखन तगर राने दे, ज़ैखन तगर अवं इन न सेमझ़ी कि परमेशर मेरे लेई कुन केरेलो।" 4 ते राज़े दाऊदे अज़ाज़त दित्ती ते तैन अपने अम्मा बाजी तैड़ी छ़डां, ते ज़ांतगर दाऊद तैस क़िले मां राव, तैखन तगर तैना मोआबेरे राज़े कां राए। 5 एक्सां गाद नव्वेंरे एक्‍की नेबे दाऊदे कां एइतां ज़ोवं, "इस क़िले मां न रा; च़ल, यहूदारे प्रदेशे मां गा।" ते दाऊद च़ेलतां हेरेत जंगले मां जेव।

6 एक्सां शाऊले शुनू कि दाऊद ते तैसेरे सिपेही केरो पतो लेग्गी जेवरोए तैस मौके शाऊल गिबा नगरेरे पहाड़े पुड़, एक्‍की झाऊ एरे बुट्टे हैठ बिशोरो थियो, हथ्थे मां अपनो भालो ट्लेइतां बिश्शो, ते तैसेरे सब अधिकारी तैसेरे आसे-पासे खड़े थिये। 7 तैखन शाऊल अपने अधिकैरन सेइं ज़ोने लगो, "हे बिन्यामीनी लोकव, शुना; कुन यिशैरू मट्ठू तुसन सेभन ऊडारां ते दाछ़री बागां देलू? कुन तै तुसन सेभन हज़ारां केरो सेनापति ते शौवां केरो सेनापति बनालो? 8 तुसेईं सेभेइं मेरे खलाफ किजो साज़िश कियोरीए? ते ज़ैखन मेरे मट्ठे यिशैरे मट्ठे सेइं करार कियोरो थियो, तैखन केन्चे मीं पुड़ बांदू न कियूं; ते तुसन मरां केन्चे मेरे लेई गमगीन भोइतां मीं सेइं न ज़ोवं, कि मेरे मट्ठे मेरो सेवके मेरे खलाफ एन्च़रे घात लानेरे लेई भड़कव, ज़ेरू अज़्ज़ेरे दिहाड़े आहे।" 9 तैखन एदोमी दोएगे, ज़ै शाऊलेरे अधिकैरन सेइं साथी खड़ो थियो, जुवाब देइतां ज़ोवं, "मीं त यिशैरे मट्ठे नोब नगरे मां अहीतूबेरां मट्ठां अहीमेलेके कां एइतू लावं, 10 ते अहीमेलेके दाऊदेरे लेई यहोवा पुछ़ू, ते तैस खानेरी चीज़ां दित्ती, ते पलिश्ती गोलियतेरी तलवार भी दित्ती।"

11 इन शुन्तां शाऊल राज़े अहीतूबेरे मट्ठे अहीमेलेक याजक ते तैसेरे बाजी केरे सारे टब्बरे जो, मतलब नोब नगरे मां रानेबाले याजक कुजाए; ते ज़ैखन तैना सभे शाऊल राज़े कां आए, 12 तैखन शाऊले ज़ोवं, "हे अहीतूबेरां मट्ठां, शुन," तैने ज़ोवं, "हे मालिक, कुन हुक्मे?" 13 शाऊले तैस पुछ़ू, "कुन वजाए कि तीं ते यिशैरे मट्ठे दूइयेईं मेरे खलाफ साज़िश कियोरीए? तीं तैस रोट्टी ते तलवार दित्ती, ते तैसेरे लेई परमेशरे पुछ़ू भी, ज़ैस सेइं तै मेरे खलाफ खड़ो भोए, ते एन्च़रे घात लाए ज़ेरू अज़्ज़ेरे दिहाड़े?" 14 अहीमेलेके, राज़े जुवाब दित्तो "तेरे सारे सेवकन मरां दाऊदेरे बराबर भरोसेरे काबल कौने? तै त राज़ेरो ज़माइये, ते तेरे राज़दरबारे मां हाज़र भोइयां केरते, ते तेरे घराने मां आदरारे काबले। 15 कुन मीं अज़्ज़े तैसेरे लेई परमेशरे करां पुछ़नू शुरू कियोरूए? तै मीं करां दूर राए! राज़ो न अपने दासे पुड़ एरहो कोई दोष लाए, न मेरे बाजी केरे सारे घराने पुड़, किजोकि तेरो दास इन सब गल्‍लां केरे बारे मां किछ भी न ज़ाने।" 16 पन राज़े तैस सेइं ज़ोवं, "हे अहीमेलेक, तू ते तेरे बाजेरो सारो घरानो ज़रूर मारो गालो।" 17 फिरी राज़े तैन सिपेहिन ज़ैना तैसेरे आसे-पासे खड़े थिये हुक्म दित्तो, "बेदलोथ ते यहोवारे याजकन मारा; किजोकि तैनेईं भी दाऊदेरी मद्दत कियोरीए, ते तैसेरू नश्शनू शुन्तां भी मीं पतो न दित्तो।" पन राज़ेरे सिपाही यहोवारे याजक लोकन मारनेरे लेई हथ अग्रोवं केरनो न थिये चाते। 18 तैखन राज़े, दोएगे सेइं ज़ोवं, "तू मुड़तां याजकन मार।" तैखन एदोमी दोएगे फिरतां याजक मारे, ते तैस दिहाड़े सने सेइं बनोरे एपोद लगोरे 85 याजक मारे। 19 ते याजकां केरो नगर नोब तैनी कौन्शां मड़द, ते बाल-बच्‍चन, ते दुद्ध पीते बच्‍चे, ते दांत, गधे, ते भैड्डां-छ़ेल्‍ली भी तलवारी सेइं मारे।

20 पन अहीतूबेरे मट्ठे अहीमेलेकेरू मट्ठू बेच़ी जेव, ज़ेसेरू नवं एब्यातार थियूं। ते तैन दाऊदे कांजो नश्शू। 21 तैखन एब्यातारे दाऊदे सेइं ज़ोवं, कि शाऊले यहोवारे याजक मारोरेन। 22 ते दाऊदे एब्यातारे सेइं ज़ोवं, "ज़ैस दिहाड़े एदोमी दोएग नोब नगरे मां थियो, तैस्से दिहाड़े मीं समझ़ोरू थियूं, कि तै ज़रूर शाऊले सेइं ज़ोलो। कि तेरे सारे घराने मारे गानेरी वजा अव्वें आईं। 23 एल्हेरेलेइ तू मीं सेइं साथी निडर रा; ज़ै मीं मारनो चाते तैए तीं भी मारनो चाते; पन मीं सेइं साथी राने सेइं तेरी जान बच़ेली।"