1 शमूएल 8

इस्राएली लोक राज़ो मगतन

1 ज़ैखन शमूएल बुढो भोव, तैखन तैनी अपना मट्ठां इस्राएली लोकन पुड़ न्यायी ठहराए। 2 तैसेरे बड्डे मट्ठेरू नवं योएल, ते होरि मट्ठेरू नवं अबिय्याह थियूं; एना बेर्शेबा नगरे मां न्याय केरते थिये। 3 पन तैसेरां मट्ठां तैसेरी बत्ती पुड़ न च़लां, मतलब तैना लालच़े मां एइतां रिश्पत नेते ते न्याय बिगाड़ते थिये।

4 तैखन सारे इस्राएली बुज़ुर्ग लोक अकोट्ठे भोइतां रामाह नगरे मां शमूएले कां गेइतां, 5 तैस सेइं ज़ोने लगे, "शुन, तू त हुनी बुढो भोइ जेवरोस, ते तेरां मट्ठां तेरी बत्ती पुड़ न च़लन; हुनी इश्शो न्याय केरनेरे लेई बाकी कौमां केरो ज़ेरो इश्शे लेई अक राज़ो ठहरा।"✝8:5 प्रेरित. 13:21. 6 पन ज़ै गल तैनेईं ज़ोई, "असन पुड़ न्याय केरनेरे लेई अक राज़ो ठहरा," ऐह गल शमूएले बुरी लग्गी। ते शमूएले यहोवा कां प्राथना की। 7 ते यहोवा शमूएले सेइं ज़ोवं, "तैना लोक ज़ैन किछ तीं सेइं ज़ोन तैन मेन्नां; किजोकि तैनेईं तेरो नईं बल्के मेरो इन्कार कियोरोए, कि अवं तैन केरो राज़ो न रेईं। 8 ज़ेरां-ज़ेरां कम्मां तैना तैस दिहाड़े करां, ज़ैखन मीं तैना मिस्र मुल्खे मरां केढतां आनोरे थिये, अज़्ज़ेरे दिहाड़े तगर केरते एवरेन, कि मीं शैरतां बाकी देबतां केरि पूज़ा केरते राए, ते तेरहु तैना तीं सेइं भी केरतन। 9 एल्हेरेलेइ हुनी तू तैन केरि गल मन्न; फिरी तू तैन रोड़ेच़ारे खबरदार केर, ते तैन एन ज़ो कि ज़ै राज़ो तैन पुड़ हुकूमत केरेलो तैसेरो बर्ताव केरहो भोल्हो।"

10 शमूएले तैन लोकन ज़ैना तैस करां राज़ो चाते थिये यहोवारी सैरी गल्‍लां शुनेई। 11 तैनी ज़ोवं, "ज़ै राज़ो तुसन पुड़ हुकूमत केरेलो तैसेरो ई तरीको भोल्हो, कि तै तुश्शे मट्ठन ज़बरदस्ती नेइतां अपने रथां च़लानेबाले ते घोड़े च़लानेबाले रखेलो, ते तैना तैसेरे रथ्थन अग्री-अग्री दौड़ेलां; 12 फिरी तै तैन्न हज़ार-हज़ार ते पज़ा-पज़ान पुड़ प्रधान बनालो, ते किछन करां तै अपना ऊडारां लुवालो, ते अपने ऊडारां केरी फसल कटालो, ते अपने लेई लड़ैइयरे हथियार ते रथ्थां केरू सामान बनावालो। 13 फिरी तै तुश्शी कुइयन नेइतां तैन करां इत्र लुवालो ते रसोई मां रोट्टी बनावालो। 14 फिरी तै तुश्शे ऊडारन ते दाछ़री बाग ते ज़ैतूनेरी बागन मरां ज़ै रोड़े करां रोड़ी भोल्ही तै नेइतां अपने अधिकैरन देलो। 15 फिरी तै तुश्शू बीज़ ते दाछ़री बागां केरो दशोवं हिस्सो नेइतां अपने हाकिमन ते सेवकन देलो। 16 फिरी तै तुश्शे नौकर नौकरानी नेलो, ते तुश्शे रोड़े करां रोड़े जुवान, ते तुश्शे गधे भी नेइतां अपने कम्मे मां लाएलो। 17 तै तुश्शी भैड्डां-छ़ेल्‍ली केरो भी दशोवं हिस्सो नेलो; एन्च़रां सेइं तुस लोक तैसेरे गुलाम बेनि गाले। 18 ते तैस दिहाड़े तुस अपने तैस च़ुनोरे राज़ेरी वजाई सेइं प्राथनाई मां बिनती केरेले, पन यहोवा तैस मौके तुसन जुवाब न देलो।"

19 पन फिरी भी तैन लोकेईं शमूएलेरी गल न शुनी; ते ज़ोने लगे, "नईं! अस सच़्च़े अपने लेई राज़ो चातम, 20 ज़ैस सेइं असां बाकी कौमां केरे ज़ेरे भोइ गाम, ते इश्शो राज़ो इश्शो न्याय केरे, ते असन अग्री-अग्री च़ेलतां इश्शी तरफां लड़ाई लड़े।" 21 लोकां केरि इना सब गल्‍लां शुन्तां शमूएले यहोवारे कन्ने तगर पुज़ेई। 22 यहोवा शमूएले सेइं ज़ोवं, "तैन केरि गल मेनतां तैन केरे लेई राज़ो ठहरा।" तैखन शमूएले इस्राएली मैन्हन सेइं ज़ोवं, "तुस हुनी अपने-अपने नगरे जो च़ले गाथ।"