1 फिरी शमूएले सारे इस्राएली लोकन सेइं ज़ोवं, "शुना, ज़ैन किछ तुसेईं मीं सेइं ज़ोवरू थियूं तैन मेनतां मीं अक राज़ो तुसन पुड़ ठहराव। 2 ते हुनी हेरा, तै राज़ो तुसन अग्री-अग्री च़लते; ते हुनी अवं भी बुढो भोवरोईं, ते मेरो दोग छ़ित्तो भोइ जेवरोए, ते मेरां मट्ठां तुसन सेइं साथी आन; ते अवं छोट्टी उमरी करां देंतो अज़ तगर तुश्शे सामने कम केरतो राहोरोइं। 3 अवं हज़ार आईं; एल्हेरेलेइ तुस यहोवारे सामने, ते तैसेरे अभिषेक कियोरे राज़ेरे सामने मीं पुड़ गवाही देथ, कि मीं केन्चेरो दांत नियोरोए? या केन्चेरो गधो नियोरोए? या कोन्ची पुड़ अंधेर कियोरीए? या कोई धोखो देइतां नुकसान पुज़वरोए? या केन्चेरे हथ्थे सेइं अपने लेई रिश्पत नेवरीए? ज़ोथ, तैन अवं तुसन वापस देइलो?" 4 इस्राएली लोकेईं जुवाब दित्तो, "नईं! न त असन पुड़ कोई ज़ुलम कियोरोए, ते न तीं केन्चेरे हथ्थे किछ नियोरूए।" 5 शमूएले इस्राएली लोकन सेइं ज़ोवं, "ज़ैन तैनी ज़ोवं अज़्ज़ेरे दिहाड़े यहोवा तैसेरो गवाहे, ते तैसेरो अभिषिक्त राज़ो भी एस गल्‍लरो गवाहे, कि मीं मां कोई दोष नईं निस्सोरो।" तैना ज़ोने लगे, "हाँ, तै गवाहे।"

6 फिरी शमूएल लोकन सेइं ज़ोने लगो, "यहोवा गवाहे। ज़ैनी मूसा ते हारून च़ुनतां तुश्शे बुज़ुर्ग मिस्र मुल्खे मरां केढतां आने तैए यहोवा आए। 7 एल्हेरेलेइ हुनी तुस खड़े भोइतां शुना, ते अवं यहोवारे सामने तैसेरे सारे धार्मिकतारां कम्मां केरे बारे मां, ज़ैना तैनी तुसन सेइं साथी ते तुश्शे बुज़ुर्गन सेइं कियोरन, तुसन याद करेइलो। 8 याकूब ते तैसेरू टब्बर मिस्र मुल्खे मां जेवं, ते तुश्शे बुज़ुर्गेईं यहोवा कां बिनती की; तैखन यहोवा मूसा ते हारून भेज़े, ते तैनेईं तुश्शे बुज़ुर्ग मिस्र मुल्खे मरां कढे, ते इस ठारी मां बसाए। 9 फिरी ज़ैखन तैनेईं अपनो परमेशर यहोवा बिसरी छ़डो, तैखन तैनी तैना हासोरेरो सेनापति सीसरा, ते पलिश्ती लोक ते मोआबेरे राज़ेरे अधीन किये; ते तैना तैन सेइं लड़े। 10 तैखन फिरी तुश्शे पूर्वजेईं यहोवा कां बिनती केरतां ज़ोवं, ‘असेईं यहोवा शारोरोए ते बाल देबते ते अश्तोरेत देबरे मूरतरी केरि पूज़ा केरतां बड़ो पाप कियोरोए; पन अगर हुनी तू असन इश्शे दुश्मना केरे हथ्थे मरां छुटास त अस तेरी आराधना केरमेले।’ 11 एल्हेरेलेइ यहोवा यरूब्बाल*, बदान, यिप्तह, ते शमूएल भेज़तां तुस ते तुश्शे च़ेवरे पासां केरे दुश्मना केरे हथ्थे मरां छुटाए; ते तुस निडर राने लगे। 12 ते ज़ैखन तुसेईं हेरू कि अम्मोनी केरो राज़ो नाहाश असन पुड़ चढ़ाई केरते, तैखन एसेरे अलावा तुश्शो परमेशर यहोवा तुश्शो राज़ो थियो फिरी भी तुसेईं मीं सेइं ज़ोवं, ‘नईं, असन पुड़ अक राज़ो हुकूमत केरेलो।’ 13 हुनी तै राज़ो हेरा ज़ै तुसेईं च़ुनोरोए, ते ज़ेसेरे लेई तुसेईं प्राथना कियोरी थी; हेरा, यहोवाए अक राज़ो तुसन पुड़ ठहरावरोए। 14 अगर तुस यहोवारो डर मन्नथ ते तैसेरी सेवा केरथ, ते तैसेरी गल्‍लां शुन्ते राथ, ते यहोवारो हुक्म शैरतां तैसेरी बगावत केरथ, ते तुस तै ज़ै तुसन पुड़ राज़ो बनोरोए दूईये अपने परमेशर यहोवा पत्ती-पत्ती च़लनेबाले बनोरे रेइयथ, तैखन त भलू भोल्हु; 15 पन अगर तुस यहोवारी गल्‍लां न मन्नथ, ते यहोवारो हुक्म टेलतां तैस सेइं बगावत केरथ, त यहोवा तुश्शे बुज़ुर्गां केरि ज़ेरि तुसन सज़ाह देलो। 16 एल्हेरेलेइ हुनी ज़ैड़ी तुस आथ तैड़ी खड़े राथ, ते इस बड्डे कम्मे हेरा ज़ैन यहोवा तुश्शी एछ़्छ़ी केरे सामने केरनेबालोए। 17 अज़ कुन गेहुं केरि कटाई नईं भोने लगोरी? अवं यहोवा कां प्राथना केरेलो, ते तै बिदलार गरज़ालो ते झ़ड़ी बखालो; तैखन तुस बुज़्झ़ी गाले, ते हेरी भी बटेले, कि तुसेईं राज़ो मेगतां यहोवारी नज़री मां बड़ी बुराई कियोरीए।" 18 तैखन शमूएले यहोवा कां प्राथना की, ते यहोवाए तैस दिहाड़े अम्बर गरज़ावं ते झ़ड़ी बखने लगी; ते सारे लोक यहोवा ते शमूएले करां बड़े डेरि जे।

19 ते सारे लोकेईं शमूएले सेइं ज़ोवं, "अपने दासां केरे लेई अपने परमेशर यहोवा कां प्राथना केर, कि अस मेरि न गाम; किजोकि असेईं अपने सारे पापन करां जादे ई बुराई कियोरीए कि राज़ेरी मांग की।" 20 शमूएले लोकन सेइं ज़ोवं, "डरा न; तुसेईं ई त सारी बुराई कियोरीए, पन हुनी यहोवा पत्ती च़लने करां फिरी न मुड़थ; पन अपने पूरे मने सेइं तैसेरी सेवा केरथ; 21 ते न मुड़थ; नईं त एरी बेकार मूरती केरे पत्ती च़लने लगथ ज़ैन सेइं न किछ फैइदो भोल्हो, ते न किछ छुटकारो भोइ सकेलो, किजोकि तैना सब बेकारन। 22 यहोवा त अपने बड्डे नंव्वेरे वजाई सेइं अपने लोकन न बिसरेलो, किजोकि यहोवाए तुस एपनी मेर्ज़ी सेइं अपने लोक बनाए। 23 फिरी ई गल मीं करां दूर भोए कि अवं तुश्शे लेई प्राथना केरनी छ़ेडतां यहोवारे खलाफ पापी भोइ; अवं त तुसन रोड़ी ते सिद्धी बत हिराताईं। 24 सिर्फ एत्रू भोए कि तुस लोक यहोवारो डर मन्ना, ते सच़्च़ैई सेइं अपने पूरे मने सेइं तैसेरी आराधना केरा; किजोकि इन त सोचा कि तैनी तुश्शे लेई केरहां बड्डां-बड्डां कम्मां कियोरन। 25 पन अगर तुस बुराई केरते राले, त तुस ते तुश्शो राज़ो दूईये नाश किये गाले।"