1 शमूएल 31

शाऊल ते तैसेरे मट्ठां केरि मौत

1 इस दौरान पलिश्ती त इस्राएली लोकन सेइं लड़े; ते इस्राएली सिपाही पलिश्ती सिपेही केरे सामनेरां नश्शे, ते गिलबो पहाड़े पुड़ मारे जे। 2 ते पलिश्ती शाऊल ते तैसेरे मट्ठन पत्ती लगोरे राए; ते पलिश्ती सेना शाऊलेरां मट्ठां योनातान, अबीनादाब, ते मल्कीशूअ मारां। 3 शाऊले सेइं बड़ी भारी लड़ाई भोइ राहोरी थी, ते पलिश्ती तीर च़लाने बालेईं तै तीर च़लेइतां बड़ो ज़खमी कियो। 4 तैखन शाऊले अपने हथियार च़लानेबाले सेइं ज़ोवं, "अपनि तलवार खिचतां मीं मार, एरू न भोए कि तैना ज़ैन केरो खतनो न भोवरो एइतां मीं मारन, ते मेरो मज़ाक बनान।" पन तैसेरे हथियार च़लानेबाले बड़े डेरतां एन केरने करां इन्कार कियो। तैखन शाऊल अपनि तलवार खड़ी केरतां तैस पुड़ बिछ़ड़ी जेव। 5 एन हेरतां कि शाऊल मेरि जेव, तैसेरो हथियार च़लानेबालो भी तेन्च़रे एपनी तलवारी पुड़ एप्पु बिछ़ड़तां तैस सेइं साथी तैसेरे ड्लेखी मेरि जेव। 6 शाऊल ते तैसेरां ट्लाईए मट्ठां, ते तैसेरो हथियार च़लानेबालो, ते तैसेरे सारे सिपाही तैस्से दिहाड़े साथी मेरि जे। 7 एन हेरतां इस्राएली सिपाही नेश्शी जे, कि शाऊल ते तैसेरां मट्ठां मेरि जेआं, तैस यिज्रेल वैदरे होरि पासेबाले ते यरदन दरियारे पूरबेरे पासे रानेबाले इस्राएली लोकेईं शुनू त अपने-अपने नगरन शैरतां नेश्शी जे; ते पलिश्ती एइतां तैन मां राने लगे।

8 दूइयोवं दिहाड़े ज़ैखन पलिश्ती मारोरे इस्राएली सिपेही केरो माल लुटने आए, तैखन तैन शाऊल ते तैसेरां ट्लाईए मट्ठां केरि लाशां गिलबो पहाड़े पुड़ मैल्ही। 9 तैखन तैनेईं शाऊलेरी क्रोड़ी कट्टी, ते हथियार लुट्टे, ते पलिश्ती केरे मुल्खेरे सैरी जगान इन ज़ोनेरे लेई मैन्हु भेज़े, कि तैन केरे मूरती केरे मन्दरे ते आम मैन्हन ई रोड़ी खबर शुनाते गान। 10 तैखन तैनेईं तैसेरे हथियार त अश्तोरेत देबरे मन्दरे मां रख्खे, ते तैसेरी लाश बेतशान नगरेरे दिवारी पुड़ रख्खी। 11 ज़ैखन गिलाद प्रदेशेरे याबेश नगरेरे रानेबालेईं शुनू कि पलिश्ती सेना शाऊले सेइं कुन-कुन कियूं, 12 तैखन सब बहादर सिपाही च़ले, ते रातो-रात गेइतां शाऊल ते तैसेरे मट्ठां केरि लाशां बेतशान नगरेरी शहरपनाह पुड़ेरां याबेश नगरे मां एन्हीं, ते तैड़ी फुक्‍की 13 तैखन तैनेईं तैन केरि हेड्डी नेइतां याबेशेरे झाऊ बुट्टे हैठ देब्बी, ते सत दिहाड़न तगर तैन केरे लेई दुख हिरानेरे लेई बरत रख्खू।