1 शमूएल 21

दाऊद ते पवित्र रोट्टी

1 दाऊद तैट्ठां च़ेलतां नोब नगरे मां अहीमेलेक याजके कां अव; ते अहीमेलेक दाऊदे सेइं मिलनेरे लेई थरकतो निस्सो, ते तैस पुछ़ू, "कुन वजा आहे कि तू अकैल्‍लो आस, ते तीं साथी कोई नईं?" 2 दाऊदे अहीमेलेक याजके सेइं ज़ोवं, "राज़े मीं अक कम केरनेरो हुक्म देइतां मीं सेइं ज़ोवं, ‘ज़ैस कम्मेरे लेई अवं तीं भेज़ताईं, ते ज़ै हुक्म अवं तीं देताईं, तै कोन्ची पुड़ बांदू न लोड़े भोवरो।’ ते मीं सिपेहिन फलाने जगाई पुड़ गांनेरे लेई ज़ोवरूए। 3 हुनी तीं कां खानेरे लेई कुने? पंच़ रोट्टी, या ज़ैन किछ मैल्हे तैस मीं दे।" 4 याजके दाऊदे सेइं ज़ोवं, "मीं कां आम रोट्टी त नईं, सिर्फ पवित्र रोट्टिन*21:4 पवित्र रोट्टिन मतलब ज़ैना रोट्टी परमेशरेरे जो हर आरामेरे दिहाड़े च़ैढ़ी गैती थी। इनां रोट्टी सिर्फ याजक खेइ सकते थी। (लैव्य. 24:5-9) ज़ैना यहोवा जो च़ैढ़ोरिन, एत्रू भोए कि तैना जुवान कौन्शन करां अलग राहोरे भोन।" 5 दाऊदे याजके जुवाब देइतां तैस सेइं ज़ोवं, "सच़्च़े कि अस ट्लाई दिहाड़ां केरे देंते कौन्शन करां अलग आम; फिरी ज़ैखन अवं आम सफरेरे लेई निसताइं, तैखन सिपाही अपनो आप पवित्र रखतन। त अज़ भी तैना ज़रूर पवित्र भोल्हे।" 6 तैखन याजके तैस पवित्र रोट्टी दित्ती। किजोकि होरी रोट्टी तैड़ी न थी, सिर्फ च़ैढ़ोरी रोट्टी थी ज़ैना यहोवारे सामनेरां सल्‍ली जेवरी थी, कि तैसेरे सल्‍लनेरे दिहाड़े सज़री रोट्टी रखी गाए।

7 तैस्से दिहाड़े तैड़ी दोएग नव्वेंरो शाऊलेरो अधिकारी यहोवारे सामने हाज़र थियो; तै एदोमी ते शाऊलेरे पुहालां केरो प्रधान थियो।

8 फिरी दाऊदे अहीमेलेके पुछ़ू, "कुन इड़ी तीं कां कोई भालो या तलवार नईं? किजोकि मीं राज़ेरे कम्मेरी लूशी थी कि मीं न अपनि तलवार साथी आनी, ते न अपनो कोई हथियार साथी आनो।" 9 याजके ज़ोवं, "हाँ, पलिश्ती गोलियत ज़ै तीं एला वैदी मां मारोरो थियो, तैसेरी तलवार कपड़े मां पलैटोरी एपोदे पत्तर रख्खोरीए; अगर तू तैस नेनी चास त ने, तैसेरे अलावा इड़ी होरो कोई हथियार नईं।" दाऊदे ज़ोवं, "तैसेरी ज़ेरि होरि कोई तलवार नईं; तैए मीं दे।"

दाऊद गत नगरेरे पासे नशते

10 तैस्से दिहाड़े दाऊद तैट्ठां च़लो, ते तैस्से दिहाड़े शाऊले करां डेरतां ते नेशतां गत नगरेरे राज़े आकीशे कां जेव। 11 ते आकीश राज़ेरे अधिकैरेईं तैस सेइं ज़ोवं, "कुन तै तैस मुल्खेरो राज़ो दाऊद नईं? कुन इस्राएली कौन्शेइं तैसेरे लेई नच़ते-नच़ते एक्‍की होरि सेइं साथी इन गीत न थियूं ज़ोवरू,

‘शाऊले हज़ारेईं दुश्मन,

ते दाऊदे लखेइं दुश्मन मारे?’"

12 दाऊदे इना गल्‍लां शुनी, ते गत नगरेरे राज़े आकीशे करां बड़ो डेरि जेव। 13 तैखन तैनी तैन केरे सामने होरि चाल च़ली, ते तैन केरे सामने पागल ज़ेरो बेनि जेवं; ते फाटकेरे दारन पुड़ लकीरां देने, ते एपनी ढ्लेजां एपनी दैढ़ी उन्ढी बिछ़ोड़ने लगो। 14 तैखन आकीशे अपने अधिकैरन सेइं ज़ोवं, "हेरा, तै मैन्हु त पागले; तुसेईं तै मीं कां किजो आनो? 15 कुन मीं कां पागलां केरि किछ कमीए, कि तुसेईं तै मेरे सामने पागलपन केरनेरे लेई आनोरोए? कुन अवं एरे मैन्हु अपने मेहले मां रेखी?"