1 एक्‍की दिहाड़ी शाऊलेरे मट्ठे योनाताने अपने बाजी सेइं बगैर किछ ज़ोने अपने हथियार छ़ूनेबाले जुवाने सेइं ज़ोवं, "एई, अस उड़ी पलिश्ती केरि चेवकरे पासे च़लम।" 2 तैस दिहाड़ी शाऊल त गिबा नगरेरी सरहद्दी पुड़ मिग्रोन नगरे मां अनारेरे बुट्टे हैठ बिशोरो थियो, ते तैस सेइं साथी लगभग 600 सिपाही थिये। 3 ते एली ज़ै शीलो नगरे मां यहोवारो याजक थियो, तैसेरू मट्ठू पीनहासेरू पोट्लड़ू, ते ईकाबोदेरे ढ्ला, अहीतूबेरू मट्ठू अहिय्याह भी एपोद लेइतां साथी थियूं। पन तैन सिपेहिन पतो न थियो कि योनातान च़लो जेवरोए। 4 तैन वैदन मां, ज़ैन मांमेइं भोइतां योनातान पलिश्ती लोकां केरि चौकी कां गानू चातो थियो, दूईये पासन अक-अक तिख्खी चट्टान थी; ते एक्‍की चट्टानरू नवं बोसेस*, ते होरि चट्टानरू नवं सेने* थियूं। 5 अक चट्टान त उत्तरेरे पासे मिकमाश नगरेरे सामने, ते होरि दक्षिणेरे गेबा नगरेरे सामने खड़ी थी।

6 तैखन योनाताने अपने हथियार छ़ूंने बाले जुवाने सेइं ज़ोवं, "एई, अस तैना खतनो न कियोरे लोकां केरि चौकी कां गाम; भोइ सकते यहोवा इश्शी मद्दत केरे; किजोकि यहोवा कोई रुकावट नईं, कि चाहे त हछे लोकां केरे ज़िरिये, चाहे थोड़े लोकां केरे ज़िरिये छुटकारो दे।" 7 तैसेरे हथियार छ़ूंने बाले तैस सेइं ज़ोवं, "ज़ैन किछ तीं ठीक लग्गे तैन केर तू अग्रोवं च़ल, अवं तेरी मेर्ज़रे मुताबिक तीं सेइं साथी रालो।" 8 योनाताने ज़ोवं, "शुन, अस तैन मैन्हन कां नेड़े गाम ताके तैन्न अस नज़री एज्जम। 9 अगर पलिश्ती असन सेइं इन ज़ोन, ‘इश्शे एजने तगर बिश्शोरे राथ,’ तैखन त अस तैस्से जगाई पुड़ खड़े रहमेले, ते तैन कां न च़ढ़मेले। 10 पन अगर तैना इन ज़ोन, ‘असन कां बा एज्जा,’ त अस एन ज़ैनतां च़ढ़मेले, कि यहोवा तैन इश्शे हथ्थे मां केरेलो। इश्शे लेई ईए निशान भोल्हो।" 11 तैखन तैना योनातान ते पलिश्ती सिपाही पलिश्ती केरि चेवकरे सामने आए, तैखन पलिश्ती ज़ोने लगे, "हेरा, इब्रि लोक तैन गत्तन मां ज़ैड़ी तैना छ़पोरे थिये निसोरेन।" 12 फिरी चेवकरे सिपैहेईं योनातान ते तैसेरे हथियार छ़ूंने बाले सेइं हक देइतां ज़ोवं, "असन कां एज्जा, तैखन अस तुसन किछ शिखालमेले।" तैखन योनाताने अपने हथियार छ़ूंने बाले सेइं ज़ोवं, "मीं पत्ती-पत्ती च़लो एई; किजोकि यहोवा तैन इस्राएली केरे हथ्थे मां केरेलो।" 13 तैखन योनातान अपने हथ ते पव्वां केरि ताकती सेइं च़ेढ़ी जेव, ते तैसेरो हथियार छ़ूंने बालो भी तैस पत्ती-पत्ती च़ेढ़ी जेव। पलिश्ती योनातानेरे सामने बिछ़ड़ते जे, ते तैसेरे हथियार छ़ूंने बालो तैसेरे पत्ती-पत्ती तैन मारतो जेव। 14 ई पेइली लड़ाई ज़ै योनातान ते तैसेरे हथियार छ़ूंने बालन सेइं भोइ, तैस मां अधे बीघे ज़मीनी मां 20 सिपाही मेरि जे। 15 तैखन डेरन मां, ते मैइदाने पुड़, ते तैना सब लोकन डेरतां थर्क शुरू भोइ; ते चौकी बाले ते हमलो केरनेबाले भी कम्बने लगे; ते भुंज़ल भी अव; ते अचानक बड़ी धरती हिलने लगी। 16 बिन्यामीन प्रदेश गिबा नगरे मां शाऊलेरे पहरदारेईं पलिश्ती नशते हेरे। 17 तैखन शाऊले अपने साथी लोकन सेइं ज़ोवं, "अपनि गिनती केरतां हेरा कि असन मरां कौन च़ेलि जेवरोए।" तैनेईं गेनतां हेरू, कि योनातान ते तैसेरो हथियार छ़ूने बालो इड़ी नईं। 18 तैखन शाऊले अहिय्याह सेइं ज़ोवं, "परमेशरेरो सन्दूख इरां आन।" तैस मौके त परमेशरेरो सन्दूख इस्राएली लोकन कां थियो। 19 शाऊल याजके सेइं गल्‍लां केरि राहोरो थियो, ते पलिश्ती लोकां केरे डेरन मां शोर जादे बेधी जेई; तैखन शाऊले याजके सेइं ज़ोवं, "परमेशरे पुछ़नू बन्द केर।" 20 तैखन शाऊल ते तैसेरे सारे साथी सिपाही अकोट्ठे भोइतां लड़ैई मां जे; तैड़ी तैनेईं कुन हेरू, कि पलिश्ती सिपाही एक्‍की होरि पुड़ तलवार च़लेइ राहोरेन, ते पलिश्तन एप्पु मांमेइं बड़ो हंगामो मेच़ि राहोरोए। 21 ज़ैना इब्रि पेइले पलिश्ती केरे पासे थिये, ते तैन सेइं साथी च़ेवरे पासना डेरन मां जेवरे थिये, तैना भी शाऊल ते योनाताने सेइं साथी इस्राएली लोकन मां मिले। 22 एन्च़रां सेइं ज़ेत्रे इस्राएली सिपाही एप्रैमेरे पहाड़ी इलाके मां छ़ेप्पी जेवरे थिये, तैनेईं भी एन शुनू कि पलिश्ती नेश्शी जेवरेन, लड़ाई मां एइतां तैन केरो पीछो केरने मां लगे। 23 तैखन यहोवा तैस दिहाड़े इस्राएली लोकन छुटकारो दित्तो; ते लड़नेबाले बेतावेन नगरेरे पैरीं पासे तगर च़ले जे। 24 पन इस्राएली सिपाही तैस दिहाड़े तंग भोए, किजोकि शाऊले तैन लोकन कसम देइतां ज़ोवं, "लानती भोए तै, ज़ै ड्लवझ़ी तगर किछ खाए; एस्से तरीके सेइं अवं अपने दुश्मन सेइं बदलो नेही बटेलो।" ते तैन सिपेहिन मरां केन्चे भी रोट्टी न खाई। 25 ते सारे इस्राएली सिपाही जंगले मां पुज़्ज़े, तैड़ी ज़मीनी पुड़ माछ़ी पेरवरू मैल्हू, पन तैनेईं न खाऊं। 26 तैना डरोरे थिये, किजोकि तैनेईं कसम कियोरी थी कि तैना किछ न खाएले। 27 पन योनाताने अपनो बाजी सिपेहिन कसम देते न थियूं शुनोरू, एल्हेरेलेइ तैनी अपने हथ्थेरी सोटरी च़ुंच़ अग्रोवं केरतां गणेरे मैछ़ेरे कश्शे मां डोबी, ते माछ़ी खाव; तैखन तैस हिम्मत अई ते तैसेरी ताकत वापस अई। 28 तैखन अक सिपाही योनाताने सेइं ज़ोने लगो, "तेरे बाजे लोकन सखत कसम देइतां ज़ोवरूए, ‘लानती भोए तै, ज़ै अज़ किछ खाए।’" ते सिपाही थकोरे थिये। 29 योनाताने ज़ोवं, "मेरे बाजे लोकन दुख दित्तोरोए। हेरा, मीं इन माछ़ी थोड़ू ज़ेरू खाऊं, ते मीं हिम्मत अई। 30 अगर अज़ सिपाही अपने दुश्मना केरि लूटी सेइं ज़ै तैन मैल्होरीए एपनी मेर्ज़ी सेइं खाथे, त केत्रे पलिश्ती मारे जेवरे भोथे।"

31 तैस दिहाड़े तैना मिकमाश नगरे करां लेइतां अय्यालोने तगर पलिश्ती सिपेहिन मारते जे; ते इस्राएली सिपाही बड़े कमज़ोर भोए। 32 एल्हेरेलेइ इस्राएली सेना लूटी पुड़ ट्लुटी जे, ते भैड्डां-छ़ेल्‍ली, ते बेछ़ी-दांत, ते बछ़ड़ां नेइतां ज़मीनी पुड़ मैरतां तैन केरू मास खूने सने खाने लगे। 33 ज़ैखन एसेरी खबर शाऊले मैल्ही, कि लोक खूने समेत मास खेइतां यहोवारे खलाफ पाप केरने लगोरेन। तैखन तैनी तैन सेइं ज़ोवं, "तुस त धोखेबाज़ आथ; हुन्ना अक बड्डो घोड़ मीं कां घिसेइतां देथ।" 34 फिरी शाऊले ज़ोवं, "सिपेही केरे मझ़ाटे मां इरां उरां मुड़तां तैन सेइं ज़ोथ, ‘अपने-अपने दांत ते भैड्डां शाऊले कां नेथ, ते तैट्ठी बलि केरतां खाथ; ते खूने समेत खेइतां यहोवारे खलाफ पाप न केरा।’" तैखन सैरी सिपैहेईं तैस्से राती अपने-अपने दांत नेइतां गेइतां तैट्ठी बलि किये। 35 तैखन शाऊले यहोवारे लेई अक वेदी बनावाई; तै त पेइली वेदी आहे ज़ै तैनी यहोवारे लेई बनावाई।

36 फिरी शाऊले सिपेहिन सेइं ज़ोवं, "अस इस्से राती पलिश्ती केरो पीछो केरतां तैन झ़ेझ़ां तगर लुटते रहम; ते तैन मरां अक भी ज़ींतो न छ़डम।" तैनेईं ज़ोवं, "ज़ैन किछ तीं रोड़ू लग्गे तैन्ने केर।" पन याजके ज़ोवं, "अस इड़ी परमेशरे कां पुछ़मेले।" 37 तैखन शाऊले परमेशरे पुछ़ू, "कुन अवं पलिश्ती लोकां केरो पीछो केरीं? कुन तू तैन इस्राएलेरे हथ्थे मां केरेलो?" पन तैस दिहाड़े किछ जुवाब न मैल्हो। 38 तैखन शाऊले सिपाही कुजेइतां ज़ोवं, "हे इस्राएलेरे खास लोकव, इड़ी एइतां ज़ाना; ते हेरा कि अज़ पाप कोस किसमे सेइं भोवरोए। 39 किजोकि इस्राएले छुटानेबाले यहोवारे ज़िन्दगरी कसम, अगर तै पाप मेरे मट्ठे योनाताने करां भोवरो भोए, फिरी भी सच़्च़े तै मारो गालो।" पन लोकन मरां केन्चे भी तैस जुवाब न दित्तो। 40 तैखन तैनी सारे इस्राएली लोकन सेइं ज़ोवं, "तुस एक्‍की पासे राथ, ते अवं ते मेरू मट्ठू योनातान होरि पासे रहमेले।" लोकेईं शाऊले सेइं ज़ोवं, "ज़ैन किछ तीं रोड़ू लगते तैन्ने केर।" 41 तैखन शाऊले यहोवा कां प्राथना की, "हे इस्राएलेरे परमेशर, सच़्च़ी गल ज़ो।" तैखन चिट्ठी योनातान ते शाऊलेरे नंव्वे पुड़ निस्सी, ते सिपाही बेंच़ी जे। 42 फिरी शाऊले हुक्म दित्तो, "मेरे ते मेरे मट्ठे योनातानेरे नंव्वे पुड़ चिट्ठी छ़डा।" तैखन चिट्ठी योनातानेरे नंव्वे पुड़ निस्सी।

43 तैखन शाऊले योनाताने सेइं ज़ोवं, "मीं ज़ो, कि तीं कुन कियोरूए।" योनाताने ज़ोवं, "मीं अपने हथ्थेरी सोटरी च़ुंच़ी सेइं थोड़ू ज़ेरू माछ़ी च़खू। ते हेर, अवं मरनेरे लेई तियार आईं।" 44 शाऊले ज़ोवं, "परमेशर एरू केरे, बल्के एस करां भी जादे केरे; हे योनातान, तू सच़्च़े मारो गानोस।" 45 पन सिपैहेईं शाऊले सेइं ज़ोवं, "कुन योनातान मारो गालो, ज़ैनी इस्राएली केरो एत्रो बड्डो छुटकारो कियोरोए? एरू न भोए! यहोवारे ज़िन्दगरी कसम, तैसेरे दोग्गेरे अक बाल भी ज़मीनी पुड़ बिछ़ड़ो न गाए; किजोकि अज़्ज़ेरे दिहाड़े तैनी परमेशरे साथी भोइतां पलिश्ती हाराए।" तैखन सिपैहेईं योनातान बच़ेइ छ़डो, ते तै मारो न जेव। 46 तैखन शाऊल पलिश्ती केरो पीछो छ़ेडतां अव; ते पलिश्ती भी अपने इलाके जो च़ले जे। 47 ज़ैखन शाऊल इस्राएली लोकन पुड़ हुकूमत केरने लगो, तैखन तै मोआबी, अम्मोनी, एदोमी, ते पलिश्ती, अपने च़ेवरे पासेरे सारे दुश्मन्न सेइं, ते सोबारे राज़े सेइं लड़ो; ते ज़ैड़ी-ज़ैड़ी तै गातो जेव तैड़ी ज़ींत मैलती जेई। 48 फिरी तैनी बहदरी केरतां अमालेकी लोक ज़ींते, ते इस्राएली लोक लुटने बाले लोकां केरे हथ्थेरां छुटाए।

49 शाऊलेरां मट्ठां योनातान, यिश्वी, ते मल्कीशूअ थियां; ते तैसेरी दूई कुइयां केरां नवं इना थियां, बेडरू नवं मेरब, ते निकड़रू नवं मीकल थियूं। 50 ते शाऊलेरी कौन्शरू नवं अहीनोअम थियूं ज़ै अहीमासेरी कुई थी। तैसेरे प्रधान सेनापति अब्नेर थियो ज़ैन शाऊलेरे चाचे नेरेरू मट्ठू थियूं। 51 शाऊलेरो बाजी कीश थियो, ते अब्नेरो बाजी नेर अबीएलेरू मट्ठू थियूं।

52 शाऊलेरी ज़िन्दगी भर पलिश्ती सेइं लड़ाई राई; ज़ैखन भी शाऊले कोई बहादर या रोड़ो योद्धा लेइहोतो थियो तैखन तै तैस अपने सेनाई मां रखतो थियो।