पलिश्तन मां दाऊद
1 तैसेरां बाद दाऊद सोचने लगो, "हुनी अवं कोन्ची न कोन्ची दिहाड़ी शाऊलेरे हथ्थे सेइं मारो गानोईं; हुनी मेरे लेई रोड़ू इन्ने कि अवं पलिश्ती केरे मुल्खे मां गेईं; तैखन शाऊल मेरे बारे मां उदास भोल्हो, ते मीं इस्राएलेरे कोन्ची हिस्से मां फिरी न तोपेलो, तैखन अवं तैसेरे हथ्थेरां बच़ेलो।" 2 तैखन दाऊद अपने 600 सिपाही साथी नेइतां च़लो जेव, ते गत नगरेरे राज़े माओकेरे मट्ठे आकीशे कां जेव। 3 दाऊद ते तैसेरे लोक अपने-अपने घराने समेत गत नगरे मां आकीश राज़े कां राने लगे। दाऊद त अपनि दूई कौन्शां सेइं साथी, यिज्रेल नगरेरी अहीनोअम, ते नाबालेरी विधवा कर्मेल नगरेरी अबीगैली सेइं साथी राव। 4 ज़ैखन शाऊले ई खबर मैल्ही कि दाऊद गत नगरे जो नशोरोए, तैखन तैनी तै फिरी कधी न तोप्पो।
5 एक्सां दाऊदे आकीश राज़े सेइं ज़ोवं, "अगर मीं पुड़ तेरे दयारी नज़र भोए, त अपने मुल्खेरे कोन्ची ड्लाव्वें मां मीं ठार दुवा ज़ैड़ी अवं रेईं; तेरो दास तीं सेइं साथी राजधैनी मां किजो राए?" 6 तैखन आकीशे तैस्से दिहाड़े सिकलग नगर दित्तू; एस वजाई सेइं सिकलग अज़्ज़ेरे दिहाड़े तगर यहूदारे राज़ां केरू बनोरूए।
7 पलिश्ती केरे इलाके मां रहते-रहते दाऊदे अक साल च़ेवर महीने बीती जे। 8 ते तैस दौरान दाऊदे अपने सिपेहिन समेत गेइतां गशूरी, गिर्जी, ते अमालेकी लोकन पुड़ हमले किये एना कौमां त पुराने ज़माने करां तैस मुल्खे मां रैती थी ज़ैन शूर नगरेरे बत्ती मां मिस्र मुल्खे तगरे। 9 ज़ैखन भी दाऊद ते तैसेरे सिपाही कोन्ची नगरे पुड़ हमलो केरते थिये, ते कौन्शां मड़द कोई भी ज़ींतो न छ़डो, ते भैड्डां-छ़ेल्ली, बेछ़ी-दांत, गधे, ऊँट, ते लिगड़ां घिन्तां वापस अव, ते आकीश राज़े कां जेव। 10 आकीशे पुछ़ू, "अज़ तीं हमलो त न कियो?" दाऊदे ज़ोवं, "हाँ, यहूदा यरहमेली ते केनी लोकां केरे दक्षिणेरे मुल्खे मां।" 11 दाऊदे कौन्शां मड़द कोई ज़ींतो न छ़डो कि तैन गत नगरे मां पुज़ान; तैनी सोचोरू थियूं, "एरहो न भोए कि तै इश्शू कम ज़ोइतां इन ज़ोए, कि दाऊदे एरू-एरू कियोरूए। बल्के ज़ेइसेरो देंतो तै पलिश्ती केरे मुल्खे मां रहते, तेइसेरू देंतू तैसेरू एन्ने कम्मे।" 12 तैखन आकीशे दाऊदे पुड़ विश्वास केरतां ज़ोवं, "ऐन अपने इस्राएली लोकां केरि नज़री मां बड़ू भिट्टू कम भोवरूए; एल्हेरेलेइ ई हमेशारे लेई मेरो दास बनोरो रालो।"