1 शमूएल 19

शाऊलेरो दाऊदे पुड़ हमलो

1 एक्‍की राती शाऊले अपने मट्ठे योनातान ते अपने सारे अधिकैरन सेइं दाऊदे मारनेरी चर्चा की। पन शाऊलेरू मट्ठू योनातान दाऊदे पुड़ बड़ू खुश थियूं। 2 योनाताने दाऊदे सेइं ज़ोवं, "मेरो बाजी तीं मारनो चाते; एल्हेरेलेइ तू झ़ेझ़ां खबरदार रेइयां, ते उडारे मां अलग ठैरी पुड़ छ़ेपतां बिश; 3 अवं उडारे मां ज़ैड़ी तू भोल्हो तैड़ी गेइतां अपने बाजी केरे नेड़े खड़ो भोइतां तैस सेइं तेरी चर्चा केरेलो; ते अगर मीं किछ पतो लग्गेलो त अवं तीं सेइं ज़ोइलो।" 4 योनाताने अपने बाजी शाऊले सेइं दाऊदेरी तारीफ़ केरतां ज़ोवं, "हे राज़ा, अपने दास दाऊदेरे खलाफ पाप न केर; किजोकि तैनी तेरे खलाफ कोई पाप नईं कियोरो, बल्के तैसेरे सारे कम्मन सेइं तेरी बड़ी मद्दत भोवरीए; 5 तैनी अपनि जान खतरे मां छ़ेडतां पलिश्ती गोलियत मारो, ते यहोवाए सारे इस्राएली केरि बड़ी ज़ीत कराई। एस हेरतां तू बड़ो खुश भोव; ते तू दाऊदे बगैर कोन्ची वजां मैरतां बेकसूरेरे खूनेरो पापी किजो बनतस?" 6 तैखन शाऊले योनातानेरी गल्‍लां मेनतां ई कसम खाई, "यहोवारे ज़िन्दगरी कसम, दाऊद मारो न गालो।" 7 बादे मां योनाताने दाऊद कुजेइतां इना सब गल्‍लां तैस सेइं ज़ोईं। फिरी योनाताने दाऊद शाऊले कां नियो, ते तै पेइलेरो ज़ेरो तैसेरी सेवा केरने लगो।

8 तैखन फिरी लड़ाई भोने लगी; ते दाऊद गेइतां पलिश्ती सेइं लड़ो, ते तैना बड़े मारे, ते तैना तैसेरे सामनेरां नेश्शी जे। 9 पन एक्सां ज़ैखन शाऊल घरे मां बिशोरो थियो; तैखन यहोवारे तरफां अक दुष्ट आत्मा शाऊले पुड़ अई ते दाऊद शाऊलेरे लेई सितार बज़ेई राहोरो थियो। 10 शाऊले चावं, कि दाऊदे एन्च़रे भाले सेइं बाहे कि भालो तैस डुबतां कंथी मां डुब्बी गाए; पन दाऊद शाऊलेरे सामनेरां एन्च़रे नश्शो कि भालो गेइतां कंथी मां डुब्बी जेव। ते दाऊद नश्शो, ते तैस राती बेंच़ी जेव।

11 तैखन शाऊले दाऊदेरे घरे सिपाही एल्हेरेलेइ भेज़े कि तैना तैसेरी ताकी मां रान, ते झ़ेझ़ां तैस मारन, पन दाऊदेरी लाड़ी मीकलां तैना लेइतां तै खबरदार कियो, "अगर तू इस राती अपने प्राण न बच़ालो, त झ़ेझ़ां मारो गानोस।" 12 तैखन मीकलां दाऊद दैरी मरां उसालो; ते तै नेशतां बेच़ी जेव। 13 तैखन मीकलां कुल देबतेरी मूरती नेइतां खट्टी पुड़ रख्खी, ते छ़ेल्‍ली केरि ज़ड़ां केरो शिरहानो बनेइतां तैसेरे शिरेइंते पुड़ रेखतां तै च़ादरी सेइं ढक्‍की। 14 ज़ैखन शाऊले फिरी दाऊदे ट्लानेरे लेई सिपाही भेज़े, तैखन मीकल ज़ोने लगी, "तै त बिमारे।" 15 तैखन शाऊले दूत दाऊदे हेरने भेज़े, ते ज़ोवं, "तैस खट्टी समेत मीं कां आनां कि अवं तैस मैरी।" 16 ज़ैखन दूत अन्तर जे, तैखन कुन हेरतन कि खट्टी पुड़ कुल देबतेरी मूरती, ते शिरेइंते पुड़ छ़ेल्‍ली केरि ज़ड़ां केरो शिरहानो आहे, 17 ते शाऊले मीकली पुछ़ू, "तीं मीं सेइं एरहो धोखो किजो कियो? तीं मेरो दुश्मन एन्च़रे किजो गाने दित्तो कि तै बेच़ी जेव?" मीकलां शाऊले सेइं ज़ोवं, "तैनी मीं सेइं ज़ोवं, मीं गाने दे; नईं त अवं तीं मारेलो।"

18 दाऊद नेशतां बेच़ी जेव, ते रामाह नगरे मां शमूएले कां पुज़तां ज़ैन किछ शाऊले तैस सेइं कियोरू थियूं सब तैस सेइं ज़ोइतां शुनावं। तैखन तै ते शमूएल गेइतां नबायोत नंव्वेरे ठैरी*19:18 नबायोत नंव्वेरे ठैरी नेबी केरे समाजे मां राने लगे। राने लगे। 19 ज़ैखन शाऊले ई खबर मैल्ही कि दाऊद रामाह नगरे मां नबायोते मांए, 20 तैखन शाऊले दाऊदे ट्लेइतां आन्नेरे लेई दूत भेज़े ते ज़ैखन शाऊलेरे दूतेइं नेबी केरो जथो नबूवत केरते ते शमूएल तैन केरो प्रधान बनोरोए, तैखन परमेशरेरो आत्मा शाऊलेरे दूतन पुड़ भी अव, ते तैना भी नबूवत केरने लगे। 21 ज़ैखन शाऊले इस गल्‍लरो पतो दित्तो तैखन तैने होरे किछ सिपाही भेज़े, ते तैना भी नबूवत केरने लगे। फिरी शाऊले ट्लेइयोवं बार किछ सिपाही भेज़े, ते तैना भी नबूवत केरने लगे। 22 आखरकार तै एप्पु रामाह नगरे जो च़लो, ते तैस बड्डे गढे पुड़ ज़ै सेकू नगरे मांए पुज़तां पुछ़ने लगो, "शमूएल ते दाऊद कोड़िए?" केन्चे ज़ोवं कि, "तै त रामाह नगरे मां नबायोते मांए।" 23 तैखन तै रामाह मां नबायोते जो च़लो; ते परमेशरेरो आत्मा तैस पुड़ भी अव, ते तै रामाह नगरे मां नेबी केरे ड्लाव्वें मां पुज़ने तगर नबूवत केरतो च़लो जेव। 24 ते तैनी भी अपना लिगड़ां खोल्‍लां, ते शमूएलेरे सामने नबूवत केरने लगो, ते ज़मीनी पुड़ बिछ़ड़तां रात दिहैड़ी नग्गो पेवरो राव। एस वजाई सेइं ई कहावत च़ली, "कुन शाऊल भी नबूवत केरनेबालन मरांए?"