पलिश्ती मुल्खे मरां करारेरे सन्दूखेरी वापसी
1 यहोवारो सन्दूख पलिश्ती लोकां केरे मुल्खे मां सत महीन्न तगर राव। 2 तैखन पलिश्ती लोकेईं अपने याजक ते जैदूगिर कुजेइतां तैन पुछ़ू, "यहोवारे सन्दूखे सेइं अस कुन केरम? असन ज़ोथ कि कुन प्रायश्चित देइतां अस तैस तैसेरे जगाई पुड़ भेज़म?" 3 तैनेईं जुवाब दित्तो, "अगर तुस इस्राएली लोकां केरे देबतेरो सन्दूख तैड़ी भेज़ने चाथ, त तै एन्च़रे नईं भेज़नो; तैसेरो नुकसान भरनेरे लेई ज़रूर दोषबलि देइयथ। तैखन तुस ठीक भोल्हे, ते तुसन पतो च़लेलो कि तैसेरो क्रोध तुसन पुड़ेरां किजो दूर न भोव।" 4 पलिश्तेईं पुछ़ू, "अस तैसेरो नुकसान भरनेरे लेई को ज़ेरि दोषबलि देम?" तैनेईं जुवाब दित्तो, "पलिश्ती राज़ां केरि गिनतरे मुताबिक सोन्नेरी पंच़ गिलटी, ते सोन्नेरे पंच़ मूंशे; किजोकि तुसन लोकन ते तुश्शे राज़न अक्के रोगे। 5 ते तुस एपनी गिलटी ते अपने मुल्खेरो नाश केरनेबाले मूंशा केरि भी मूरती बनेइतां इस्राएलेरे देबतेरी महिमा केरा। भोइ सकते कि तै अपनो सज़ारो हथ तुसन पुड़ेरां ते तुश्शे देबतन ते मुल्खे पुड़ेरां दूर केरे। 6 तुस अपनो मन किजो एरहो सखत केरतथ ज़ेन्च़रे मिस्री लोकेईं ते फ़िरौने अपनो मन सखत कियोरो थियो? ज़ैखन तैनी तैन केरे सामने हैरान केरनेबालां कम्मां कियोरां थियां, तैखन तैनेईं इस्राएली लोक गाने न थिये दित्तोरे, ते कुन तैना च़ले न जे? 7 एल्हेरेलेइ हुनी तुस अक नंव्वी गड्डी बनाथ, ते एरी दूई दुद्ध देनेबाली बेछ़ी नेथ ज़ैन जुऊं न भोए दित्तोरू, ते तैन बेछ़न गेड्डी मां जोट्लतां तैन केरे बच्चन नेइतां गेवड़े मांजो वापस देथ। 8 तैखन यहोवारो सन्दूख नेइतां तैस गेड्डी पुड़ रखा, ते सोन्नेरी ज़ैना चीज़ां तुस तैसेरो नुकसान भरनेरे लेई दोषबेलरे लेई देथ तैन होरि सन्दूखे मां रेखतां तैस कां रखा। फिरी तैस भेज़ा कि तै एप्पु च़ली गाए। 9 पन हेरते राथ; अगर तै सन्दूख अपने मुल्खेरी बत्ती मांमेइं भोइतां बेतशेमेश6:9 बेतशेमेश मतलब दिहाड़ेरू घर नगरे जो गाए, त समझ़ा कि इश्शो ई बड्डो नुकसान तैसेरे वजाई सेइं भोवरोए अगर नईं, त अस समझ़ेले कि ई आफत असन पुड़ तैसेरी तरफां नईं, पन कुदरती एवरीए।"
10 पलिश्ती लोकेईं एन्च़रे कियूं; ते दुद्ध देने बैली बेछ़ी नेइतां तैस गेड्डी मां जोट्ली, ते तैन केरे बच्चे गेवड़े मां ढेपतां छ़डे। 11 ते यहोवारो सन्दूख, ते सामानेरो सन्दूख, ज़ैस मां सोन्नेरे मूंशे ते एपनी गिलटी केरि मूरती गेड्डी पुड़ रेखी। 12 तैखन बेछ़ी बेतशेमेश नगरेरे सिद्धी बत्तां च़ेलि; तैना सड़कां-सड़कां डांडां मैरती च़ेलि जेई, ते न देइने पासे न बांए पासे मुड़ी; ते पलिश्ती लोकां केरे राज़े तैन केरे पत्ती-पत्ती बेतशेमेश नगरेरे नेड़े पुज़्ज़े। 13 ते बेतशेमेश नगरेरे लोक वैदी मां गेहुं केट्टी राहोरे थिये। ते ज़ैखन तैनेईं एछ़्छ़ी खेड़ि केरतां सन्दूख लाव, त तैखन तैना तैस लेइतां खुशी भोए। 14 गड्डी बेतशेमेश नगरेरे रानेबाले यहोशूएरे उडारे मां गेइतां रुकी जेई, तैड़ी अक बड्डो घोड़ थियो। तैखन तैनेईं गेड्डरी लेकड़ी च़ीरी ते बेछ़ी केरि होमबलि केरतां यहोवा जो च़ाढ़ी। 15 ते लेवी लोकेईं यहोवारो सन्दूख ते तै होरो सन्दूख ज़ै साथी थियो, ज़ैस मां सोन्नेरी चीज़ां थी, उसालो तै तैस बड्डे घोड़ पुड़ रख्खो; ते बेतशेमेश नगरेरे लोकेईं तैस्से दिहाड़े यहोवारे लेई होमबलि ते मेलबलि च़ाढ़ी। 16 एन हेरतां पलिश्ती लोकां केरे पंच़े राज़ेईं तैस्से दिहाड़ी एक्रोन नगरे जो वापस जे।
17 सोन्नेरी गिलटी ज़ैना पलिश्ती लोकेईं यहोवारो नुकसान भरनेरे लेई दोषबलि केरतां दित्तोरी थी तैन मरां अक त अश्दोद नगरेरे तरफां, ते अक गाज़ा नगरेरे तरफां, ते अक अश्कलोन नगरेरे तरफां, ते अक गत नगरेरे तरफां, ते अक एक्रोन नगरेरे तरफां दित्ती जेवरी थी। 18 ते तैना सोन्नेरे मूंशे, शहरपनाह बाले नगर, बगैर शहरपनाहेरां ड्लाव्वां, बल्के ज़ैस बड्डे घोड़े पुड़ यहोवारो सन्दूख रख्खो जेवरो थियो तैड़ी पलिश्ती लोकां केरे पंच़े राज़ां केरे अधिकारे तगर सारे ड्लाव्वां केरि गिनतरे मुताबिक दित्ते जे। तै घोड़ अज़ तगर बेतशेमेश नगरेरे यहोशूएरे उडारे मां आहे।
19 फिरी बेतशेमेश नगरेरे किछ लोकेईं यहोवारो सन्दूख नेड़े लिकतां तकोरो थियो एल्हेरेलेइ परमेशरे तैन मरां 70 मैन्हु मारे; ते तैट्ठेरे लोकेईं एल्हेरेलेइ मातम कियो कि यहोवा बड़े लोक मारोरेन।
करारेरो सन्दूख किर्यत्यारीम नगरे मां
20 तैस वक्ते बेतशेमेश नगरेरे लोक एक्की होरि सेइं ज़ोने लगे, "इस पवित्र यहोवा परमेशरेरे सामने कौन खड़ो रेई सकते? ते अस तैसेरे सन्दूखे एप्पु करां कोरहां भेज़म?" 21 तैखन तैनेईं किर्यत्यारीम6:21 किर्यत्यारीम मतलब लेकड़रू नगर नगरेरे रानेबालन कां एन ज़ोनेरे लेई दूत भेज़े, "पलिश्ती लोकेईं यहोवारो सन्दूख वापस पुज़व। एल्हेरेलेइ तुस एइतां तैस अपने नगरे जो नेथ।"