1 शमूएल 2

हन्नारी प्राथना

1 तैखन हन्ना प्राथना केरतां ज़ोवं,

"मेरो मन यहोवारे वजाई सेइं खुशे;

मेरी क्रोड़ी यहोवारे वजाई सेइं उच्‍ची भोवरीए।

हुनी मीं कां मेरे दुशमनां केरे लेई जुवाबे,

किजोकि अवं तेरे कियोरे छुटकारे सेइं खुश आईं।

2 यहोवारो ज़ेरो कोई पवित्र नईं,

किजोकि तेरे अलावा कोई अथ्थी नईं;

ते इश्शे परमेशरेरी ज़ेरि कोई चट्टान नईं।

3 बेड्डी-बेड्डी गल्‍लां न केरा,

ते घमण्डेरी गल्‍लां तुश्शे ऐशी मरां न निस्सन;

किजोकि यहोवा परमेशर सब किछ ज़ानते,

तै लोकां केरे कम्मां केरो न्याय केरते।

4 शक्तिशाली सिपेही केरे धनुष ट्लूटी जे,

ते ज़ैना कमज़ोर थिये तैना ताकतबर भोइ जे।

5 ज़ैन कां खानेरे लेई बड़ू किछ थियूं हुनी तैन्न रोट्टरे लेई मज़दूरी केरनी पेई,

ज़ैना नियन्ने थिये तैना फिरी रज़्ज़ने बाले भोए।

ज़ै बेऔलाद थी तैसेरे सत बच्‍चे भोए,

ते बड़े बच्‍चां केरि अम्मा उज़ड़ी जेई।

6 यहोवा प्राण नेते ते ज़िन्दगी देनेबालोए;

तैए पाताले मां ओसालते ते तैस मरां कढते भी।

7 यहोवा किछ लोकन गरीब बनाते ते किछ अमीर भी बनाते,

तैए लोकन बिछ़ोड़ते ते तैए खड़ो भी केरते।✝2:7 लूक. 2:7.

8 तै कंगाले धूड़ी पुड़ेरां खड़ो केरते;

ते गरीबे मांज़नरे ढेरे पुड़ेरां केढतां खड़ो केरते,

ताके तैन हुकूमत केरनेबालन सेइं साथी बिशाले,

ते तै तैन्न आदरारे तखतेरे अधिकारी बनाते।

किजोकि धेरतरे खम्भे यहोवारे आन,

ते तैनी तैन्न पुड़ दुनिया खड़ी कियोरीए।

9 तै अपने भक्तां केरे पव्वन सम्भैलतां रखेलो,

पन दुष्ट आंधरे मां च़ुपच़ाप राले;

किजोकि कोई मैन्हु अपने ताकतरे वजाई सेइं ज़ींती न सके।

10 ज़ैना यहोवा सेइं लड़तन तैना च़कराच़ूर भोल्हे;

तै तैन केरे खलाफ अम्बरे मां गरज़ेलो।

यहोवा पूरी दुनियारो न्याय केरेलो;

ते अपने अभिषिक्त राज़ेरी शक्ति बद्धाते,

ते तैसेरी इज़्ज़त बधालो।"

11 तैखन एल्काना रामाह नगरे मां अपने घरे जो च़लो जेव। ते शमूएल एली याजके सेइं साथी यहोवारी सेवा केरने लगो।

एली याजकेरां मट्ठां

12 एली याजकेरां मट्ठां त लुच्‍चां थियां; तैनेईं यहोवा न पिशानो। 13 एलेरां मट्ठां याजक थियां, पन तैना लोकन सेइं एरहो बर्ताव केरते थिये, कि ज़ैखन कोई मैन्हु मेलबलि च़ाढ़तो थियो तैखन याजकेरो सेवक मास पकानेरे मौके अक नोकी बालो कंटो हथ्थे मां एन्हतां, 14 तैस कड़ाही, हाण्डी, हँडे या तशले मां छ़डतो थियो ते ज़ेत्रू मास कंटे मां लगतू थियूं तेत्रू याजके जो देतो थियो। एरू तैना याजक मट्ठां शीलो नगरे मां सारे इस्राएली आराधना केरनेबाले लोकन सेइं केरतां थियां ज़ैना तैड़ी एइते थिये। 15 कधे-कधे चर्भी फुकने करां पेइले भी याजकेरो सेवक एइतां मेलबलि च़ाढ़ने बाले सेइं ज़ोतो थियो, "ट्लाड़नेरे लेई याजके मास दे; तै तीं करां बनेवरू मास नईं, कच़्च़ू मास नेलो।" 16 ते अगर कोई बलि देनेबालो तैस सेइं ज़ोतो थियो, "पेइली चर्भी फुकोने दे, तैखन ज़ेत्रो मन चाहे तेत्रू नेथ।" तैखन तै ज़ोतो थियो, "नईं, हुन्ना दे; नईं त मीं थुसोड़तां नेनूए।" 17 एन्च़रे सेइं एली याजकेरे जुवान मट्ठां केरो पाप यहोवारी नज़री मां बड़ो बेधी जेवरो थियो। किजोकि तैना यहोवारी च़ढ़तलरी अनादर केरते न थिये।

शमूएलेरी सेवकाई

18 पन शमूएल ज़ैन हेजू निकड़ू मट्ठू थियूं सनेरो एरहो पवित्र एपोद*2:18 एपोद इड़ी एपोदेरो मतलब सनी एरहो कपड़ो ज़ै कमरी पुड़ लव गातो थियो। ज़ै मैन्हु सेवारू कम केरतो थियो। (हेरा, शमू. 2.28; 14.3; 21.9; 22.18; 2 शमू 6.14) लेइतां यहोवारी सेवा केरतो थियो। 19 ते तैसेरी अम्मा हर साल तैसेरे लेई अक निकड़ो ज़ेरो चोगो बनेइतां ज़ैखन अपने मुन्शे सेइं साथी हर सालेरी मेलबलि च़ाढ़ने एइती थी तैखन चोगो तैस जो आनती थी। 20 एली याजके एल्काना ते तैसेरी लैड़ी आशिर्वाद देइतां ज़ोवं, "यहोवा इस मट्ठेरे बदले ज़ैन तैसां यहोवा जो अर्पण कियोरूए तीं इस कौन्शी सेइं वंश दे;" तैसेरां बाद तैना अपने घरे जो च़ले जे। 21 यहोवा हन्ना पुड़ ध्यान दित्तू, ते तैस होरां ट्लाई मट्ठां ते दूई कुइयां भोइ। ते तैन केरू मट्ठू शमूएल परमेशरेरे हज़ूरी मां बेडोतू जेवं।

एली याजकेरे घरानेरे खलाफ नबूवत

22 एली बड़ो बुढो भोइ जेवरो थियो, ते तैनी तैन सब किछ शुनू ज़ैन तैसेरां मट्ठां ज़ैन सारे इस्राएली लोकन सेइं केरतन। तैसेरां मट्ठां मिलापे बाले तेम्बेरे दारे पुड़ सेवा केरनेबैली कौन्शन सेइं कुकर्म भी केरतन। 23 तैखन एली याजके अपने मट्ठन सेइं ज़ोवं, "तुस एरां-एरां कम्मां किजो केरतथ? मीं इन सेभी लोकन करां तुश्शे कुकर्मेरी गल्‍लां शुनोरिन। 24 हे मेरे मट्ठव, एरू न केरा, किजोकि ज़ै खबर मेरे शुन्ने मां एइचे तै रोड़ी नईं; तुस त यहोवारे लोकन करां पाप करातथ। 25 अगर अक मैन्हु होरि मैन्हेरे खलाफ पाप केरे, तैखन त न्यायी तैसेरो न्याय केरेलो; पन अगर कोई मैन्हु यहोवारे खलाफ पाप केरे, त तैसेरे लेई कौन बिनती केरेलो?" फिरी भी तैनेईं अपने बाजी केरि झ़िड़क न मेन्नी; किजोकि यहोवा तैन मारनेरो इरादो कियोरो थियो। 26 तैन मट्ठू शमूएल बेडोतू जेवं ते यहोवा ते मैन्हु भी दूईये तैस सेइं खुशी रहते थिये। 27 एक्सां परमेशरेरो अक नबी एली कां गेइतां तैस सेइं ज़ोने लगो, "यहोवा इन ज़ोते, कि ज़ैखन तेरे पूर्वजेरो घरानो मिस्र मुल्खेरे फ़िरौन राज़ेरे गुलैमी मां थियो, तैखन कुन अवं तेरे पूर्वजे*2:27 पूर्वजे हारून ते तैसेरू टब्बर पुड़ बांदो न भोवं? 28 ते कुन मीं तेरो पूर्वज इस्राएलेरे सारे गोट्लन मरां एल्हेरेलेइ च़ुनोरो न थियो, कि मेरो याजक भोइतां मेरी वेदी कां बलिदान च़ाढ़े, ते गुग्गल बाले, ते मेरे सामने एपोद लाए? ते कुन मीं तेरे पूर्वजेरे घराने इस्राएली लोकां केरि सैरी च़ढ़तलां न थी दित्तोरीए? 29 एल्हेरेलेइ मेरी मेलबलि ते अन्नबलि ज़ैन मीं अपने भवने मां च़ाढ़नेरो हुक्म दित्तोरोए, तैन तुस लोक किजो पव्वन हैठ ढ्लन्च़तथ? ते तू किजो अपने मट्ठां केरि मीं करां जादे इज़्ज़त केरतस, कि तुस मेरे इस्राएली लोकां केरि रोड़ी करां रोड़ी च़ढ़तल खेइ खेइतां मोट्टे भोइ गाथ? 30 एल्हेरेलेइ इस्राएलेरो परमेशर यहोवा इन ज़ोते, कि मीं ज़ोवरू त थियूं, कि तेरो घरानो ते तेरे पूर्वजेरो घरानो मेरे सामने हमेशा च़लतो रालो; पन हुनी यहोवारू ज़ोनू इने, कि ऐह गल मीं करां दूर राए; किजोकि ज़ैना मेरी आदर केरेले अवं भी तैन केरि आदर केरेलो, ते ज़ैना मीं घटिया समझ़ेले तैना घटिया समझ़े गाले। 31 शुन, तैना दिहाड़े एइतन, कि अवं तेरी ताकत ते तेरे पूर्वजेरे घरानेरी*2:31 पूर्वजेरे घरानेरी तेरे गोट्लेरी ताकत नाश केरेलो, कि तेरे घराने मां कोई बुढो न भोइ बटेलो। 32 इस्राएली लोकां केरू केत्रू रोड़ू कि न भोए, फिरी भी तीं मेरे घरेरो दुख हेरनो पेलो, ते तेरे घराने मां कोई कधी बुढो न भोल्हो। 33 अवं तेरे कुले मरां सेभन करां अपने वेदरी सेवा न थुसोड़ेलो, पन फिरी भी तेरी एछ़्छ़ी तेकती रहेली, ते तेरो मन दुखी भोल्हो, ते तेरे घरेरे जुवान सारे एपनी जुवैनी मां मेरि गाले। 34 ते मेरी इस गल्‍लरो निशान तै आफत भोल्ही ज़ै होप्नी ते पीनहास नंव्वेरे तेरे दूईये मट्ठन पुड़ पेली; ज़ैना दूईये एक्सां मेरि गाले 35 ते अवं अपने लेई अक वफादार याजक ठहरेइलो, ज़ै मेरे दिले ते मनेरे इच्छयारे मुताबिक केरेलो, ते अवं तैसेरू घर बसेइलो ते आबाद केरेलो, ते तै मेरे अभिषिक्त राज़ेरे अग्री-अग्री हमेशा च़लतो फिरतो रालो। 36 ते एरू भोल्हु कि ज़ै कोई तेरे घराने मां बच़ेलो तै तैस कां नेड़े गेइतां एक्‍की निकड़े ज़ेरे टुक्ड़े चैंदरे*2:36 टुक्ड़े चैंदरे किछ पेइंसे या एक्‍की रोट्टरे लेई झुकतां ज़ोलो, याजकेरे कोन्ची कम्मे मां मीं रख, ज़ैस सेइं मीं अक टुक्ड़ो रोट्टी मैल्हे।"