1 शमूएल 10

1 तैखन शमूएले अक कुप्पी तेल नेइतां शाऊलेरे दोग्गे पुड़ उलटाव, ते तैस फुम्मड़ी देइतां ज़ोवं, "कुन एसेरी वजा ई नईं कि यहोवा अपने लोकन पुड़ प्रधान भोनेरे लेई तेरू अभिषेक कियोरूए? 2 अज़ ज़ैखन तू मीं करां च़लो गालो, तैखन राहेलरे कब्री कां ज़ै बिन्यामीन प्रदेशेरे सरहद्दी पुड़ सेलसह नगरे मांए, दूई मैन्हु तीं मैल्हेले, ते ज़ोले, ‘ज़ैना गधे तू तोप्पने जेवरो थियो तैना मैल्होरिन; ते शुन, तेरो बाजी गधां केरि फिक्र छ़ेडतां तुश्शे वजाई सेइं डेरतां ज़ोते, कि अवं अपने हेरोरे मट्ठेरे लेई कुन केरीं?’ 3 फिरी तैट्ठां अग्रोवं गेइतां ज़ैखन तू ताबोर नंव्वेरे ठारारे बंज़ेरे बुट्टे कां पुज़ेलो, तैखन तैड़ी ट्लाई मैन्हु परमेशरे जो बलिदान देनेरे लेई बेतेल नगरे जो गांते मैल्हेले, ज़ैन मां एक्‍की कां त छ़ेल्‍ली केरे ट्लाई बच्‍चे, ते होरि कां ट्लाई रोट्टी, ते ट्लेइयोवं कां एक्‍की मसकी मां दाछ़रो रस च़लेवरो भोल्हो। 4 तैना तेरो हाल चाल पुछ़ेले, ते तीं दूई रोट्टी देले, ते तू तैन्न करां नेइयां। 5 तैखन तू परमेशरेरे पहाड़े पुड़ पुज़ेलो ज़ैड़ी पलिश्ती केरि चौकीए; ते ज़ैखन तू तैड़ी नगरे मां दाखल भोस, तैखन नेबी केरि अक टोली पहाड़ेरी वेदी करां तीं ओस्ते मैल्हेली; ते तैन अग्री लोक सितार, डफली, बेंशोई, ते सैन्गी बज़ाते भोल्हे; ते तैना नबी नबूवत केरते भोनेन। 6 तैखन यहोवारो आत्मा तीं पुड़ अकदम एज्जेलो, ते तू भी तैन सेइं साथी नबूवत केरेलो, ते तू बेदलोइतां अलग मैन्हु भोइ गालो। 7 ते ज़ैखन इना निशान भोन, तैखन ज़ैन कम तीं सही लग्गे तैन केरां; किजोकि परमेशर तीं सेइं साथी रालो। 8 ते तू मीं करां पेइले गिलगाल नगरे मां गेइतां सत दिहाड़न तगर मेरो इंतज़ार केरां, अवं होमबलि ते मेलबलि च़ाढ़नेरे लेई तीं कां एज्जेलो, तैखन अवं तीं सेइं ज़ोइलो कि कुन-कुन केरनूए।"

9 ते ज़ेरि तैनी शमूएले करां गांनेरे लेई पिठ फेरी तेन्च़रे परमेशरे तैसेरो दिल बदलो; ते तैना सारे निशान तैस्से दिहाड़े पूरे भोए। 10 ज़ैखन शाऊल ते तैसेरो सेवक तैस पहाड़े कां नेड़े पुज़्ज़े, तैखन नेबी केरि अक टोली तैस मैल्ही; ते परमेशरेरो आत्मा शाऊले पुड़ अकदम अव, ते तैन केरे मझ़ाटे तै नबूवत केरने लगो। 11 ज़ैखन तैन सेभेइं ज़ैना तैस पेइले ज़ानते थिये इन लाऊं कि तै नेबन मां नबूवत केरने लगोरोए, तैखन एप्पु मांमेइं ज़ोने लगे, "कीशेरे मट्ठे इन कुन भोवं? कुन शाऊल भी नेबन मरां अक आहे?" 12 तैट्ठेरे एक्‍की मैन्हें ज़ोवं, "पन तैन केरो बाजी कौने?" एस गल्‍ली पुड़ ई कहावत च़लने लगी, "कुन शाऊल भी नेबन मां अक नबीए?" 13 ज़ैखन शाऊले नबूवत की, तैखन पहाड़ेरे वेदी पुड़ च़लो जेव।

14 किछ वक्तेरां बाद शाऊलेरे चाचे तैस ते तैसेरे नौकरे पुछ़ू, "तुस कोरहां जेवरे थिये?" तैनी ज़ोवं, "अस त गधे तोप्पने जेवरे थिये; ते ज़ैखन असन कोन्च न मैल्ही, तैखन शमूएल नेबी कां पुछ़ने जे।" 15 शाऊलेरे चाचे पुछ़ू, "मीं सेइं ज़ो कि शमूएले तुसन सेइं कुन ज़ोवं?" 16 शाऊले अपने चाचे सेइं जुवाब दित्तो, "तैनी असन सेइं रोड़ेच़ारे ज़ोवं कि गेधी मैल्ही जेवरिन।" पन ज़ै गल शमूएले इस्राएलेरे राज़ो बन्नेरे बारे मां ज़ोवरी थी तै तैनी तैस सेइं न ज़ोई।

शाऊलेरू राज़ो बन्नू

17 किछ वक्तेरां बाद शमूएले इस्राएली लोक मिस्पा नगरे मां यहोवारे सामने कुजाए। 18 तैखन तैनी तैन सेइं ज़ोवं, "इस्राएलेरो परमेशर यहोवा इन ज़ोते, ‘मीं त इस्राएली लोक मिस्र मुल्खे मरां केढतां आने, ते तुस मिस्री लोकां केरे हथ्थे मरां, ते तैन सब राज़ां केरे हथ्थे मरां छुटाए, ज़ैना तुसन पुड़ ज़ुलम केरते थिये।’ 19 पन तुसेईं अज़ अपनो परमेशर घटिया समझ़ो, ज़ै सैरी मुसीबत ते दुखे करां तुसन छुटानेबालोए। ते तैस सेइं ज़ोवरूए, ‘इश्शे लेई राज़ो च़ुन।’ एल्हेरेलेइ हुनी तुस गोट्ले-गोट्लेरे मुताबिक ते हज़ार-हज़ार भोइतां यहोवारे सामने खड़े भोथ।"

20 तैखन शमूएले सारे इस्राएली गोट्लां नेड़े आनां, ते चिट्ठी बिन्यामीनेरे नंव्वे पुड़ निस्सी। 21 तैखन तैनी बिन्यामीनेरे गोट्लेरे कुलां केरे हिसाबे सेइं नेड़े आने, ते चिट्ठी मत्री कुलेरे नंव्वे पुड़ निस्सी; फिरी चिट्ठी कीशेरे मट्ठे शाऊलेरे नंव्वे पुड़ निस्सी। ते ज़ैखन तैनेईं तै तोप्पो, तैखन तै न मैल्हो। 22 तैखन तैनेईं फिरी यहोवा पुछ़ू, "कुन इड़ी कोई होरो एजनेबालोए?" यहोवा ज़ोवं, "शुना, तै सामाने मां छ़पोरोए।" 23 तैखन तैनेईं देवड़तां तै तैट्ठां आनो; ते तै लोकां केरे मझ़ाटे खड़ो भोव, ते तै लोकन करां लम्मो थियो ते बाकी लोक तैसेरे कंधे तगर पुज़ते थिये। 24 शमूएले सारे लोकन सेइं ज़ोवं, "कुन तुसेईं यहोवारो च़ुनोरो लाहोरोए कि सारे लोकन मां तैसेरो ज़ेरो कोई नईं?" तैखन सारे लोक ज़ोरे सेइं ज़ोने लगे, "राज़ेरी उमर लम्मी भोए।"✝10:24 प्रेरित. 13:21.

25 तैखन शमूएले लोकन सेइं राज़ेरे अधिकारेरे बारे मां ज़ोवं, ते तैन किताबी मां लिखतां यहोवारे सामने रख्खू। ते शमूएले सारे लोक अपने-अपने घरे भेज़े। 26 ते शाऊल गिबा नगरे मां अपने घरे जो च़लो जेव, ते तैस सेइं साथी अक दल भी जेव ज़ैन केरे मन परमेशरे उभारोरे थिये। 27 पन कही लुच्‍चे लोक ज़ोने लगे, "ई मैन्हु असन केन्च़रे बच़ालो?" ते तैनेईं तै घटिया समझ़ो, ते तैस कां तोफे न आने। फिरी तै शुन्तां भी अनशुनी केरतां च़ुप राव।