1 शमूएल 7

1 तैखन किर्यत्यारीम नगरेरे लोक गेइतां यहोवारो सन्दूख छ़ुइतां च़ले जे, ते अबीनादाबेरे घरे मां ज़ैन तैन केरे नगरेरे पहैड़ी पुड़ थियूं तैड़ी रख्खो, ते यहोवारे सन्दूखेरी रखवाली केरनेरे लेई अबीनादाबेरू मट्ठू एलीआजर पवित्र कियूं।

शमूएल नबी ते न्यायेरां कम्मां

2 किर्यत्यारीम नगरे मां सन्दूख रखोरे 20 साल भोए, ते तैस दौरान इस्राएलेरे सारे लोक दुखेरे मारे यहोवा करां मद्दत मगने लगे। 3 तैखन शमूएले सारे इस्राएली लोकन सेइं ज़ोवं, "अगर तुस अपने पूरे मने सेइं यहोवारे पासे एवरेथ, त बाकी देबतन ते अश्तोरेत देबरे मूरतन एप्पु करां दूर केरा, ते यहोवारे पासे अपनो मन लेइतां सिर्फ तैसेरी आराधना केरा, तैखन तै तुसन पलिश्ती केरे हथ्थे मरां छुटालो।" 4 तैखन इस्राएली लोकेईं बाल देबते ते अश्तोरेत देबरी मूरती दूर की, ते सिर्फ यहोवारी आराधना केरने लगे।

5 फिरी शमूएले तैन सेइं ज़ोवं, "सारे इस्राएली लोकन मिस्पा नगरे मां अकोट्ठे केरा, ते अवं तुश्शे लेई यहोवा कां प्राथना केरेलो।" 6 तैखन तैना मिस्पा नगरे मां अकोट्ठे भोए, ते पानी भेरतां यहोवारे सामने डोलू, ते तैस दिहाड़े बरत रख्खू, ते ई गल मन्नी, "कि असेईं यहोवारे खलाफ पाप कियोरोए।" एन्च़रे सेइं शमूएले मिस्पा नगरे मां इस्राएली लोकां केरो न्याय कियो। 7 ज़ैखन पलिश्ती लोकेईं शुनू कि इस्राएली लोक मिस्पा नगरे मां अकोट्ठे भेवरेन, तैखन तैन केरे राज़े इस्राएली लोकन सेइं जंग लड़नेरे लेई जे। एन शुन्तां इस्राएली लोक पलिश्ती लोकन करां डरे। 8 ते इस्राएली लोकेईं शमूएले सेइं ज़ोवं, "इश्शे लेई इश्शे परमेशर यहोवा कां प्राथना केरनी न शार, ज़ैस सेइं तै असन पलिश्ती लोकां केरे हथ्थे करां बच़ाए।" 9 तैखन शमूएले अक दुद्ध पीतू गबड़ू नेइतां पूरू होमबलि केरतां यहोवा जो च़ाढ़ू; ते शमूएले इस्राएली लोकां केरे लेई यहोवा कां प्राथना की, ते यहोवा तैसेरी प्राथनारो जुवाब दित्तो। 10 ते ज़ैस वक्ते शमूएल होमबलि च़ेढ़ी राहोरो थियो तैस वक्ते पलिश्ती लोक इस्राएली लोकन सेइं लड़ाई केरनेरे लेई नेड़े आए, तैखन तैस्से दिहाड़े यहोवाए पलिश्ती लोकन पुड़ अम्बर गुड़ेइतां तैना डरेई छ़डे; ते तैना इस्राएली लोकन करां हारे। 11 तैखन इस्राएली सिपैहेईं मिस्पा नगरे मरां निस्तां पलिश्ती लोक खदाड़े, ते तैन बेतकर वैदी करां बुन तगर मारते च़ले जे।

12 तैखन शमूएले अक घोड़ नेइतां मिस्पा ते शेन नगरां केरे मझ़ाटे खड़ो कियो, ते एन ज़ोइतां तैसेरू नवं एबेनेजेर*7:12 एबेनेजेर मतलब मद्दतरो घोड़। रख्खू, "इड़ी तगर यहोवा इश्शी मद्दत कियोरीए।" 13 एन्च़रे सेइं पलिश्ती लोक हारे, ते इस्राएली लोकां केरे मुल्खे मां फिरी न आए, ते शमूएलेरे ज़िन्दगी भर यहोवा पलिश्ती लोकां केरे खलाफ लड़तो राव। 14 ते एक्रोन ते गत नगरन तगर ज़ेत्रे नगर पलिश्ती लोकेईं इस्राएली लोकां केरे हथ्थेरां थुसोड़ोरे थिये, तैना फिरी इस्राएली लोकां केरे कब्ज़े मां आहे; ते तैन केरो मुल्ख भी इस्राएली लोकेईं पलिश्ती लोकां केरे कब्ज़े मरां छुटाव। ते इस्राएली लोकन ते एमोरी लोकन मां भी मेल मिलाप भोइ जेव।

15 ते शमूएल सैरी ज़िन्दगी इस्राएली लोकां केरो न्याय केरतो राव। 16 तै हर साल बेतेल ते गिलगाल ते मिस्पा नगरन मां गेइतां तैन सेभी ठारन मां इस्राएली लोकां केरो न्याय केरतो राव। 17 तैखन तै रामाह नगरे मां वापस अव ज़ैड़ी तैसेरू घर थियूं, ते तैड़ी भी इस्राएली लोकां केरो न्याय केरतो राव, ते तैड़ी तैनी यहोवारे लेई अक वेदी बनाई।