1 यीशु फिरी आरामेरे दिहाड़े एक्‍की फरीसेरे घरे रोट्टी खाने जेव त बड़े फरीसी लोक ध्याने सेइं लोरे थिये तकने, ताके तैसेरी कोई गलती ट्लान। 2 तैड़ी अक बिमार मैन्हु थियो ज़ेसेरी ज़ंघां पैखड़ी शोजती थी ते पस-पाक च़लती थी, तै तैड़ी बिशोरो थियो। 3 यीशुए शास्त्री ते फरीसी लोकन पुछ़ू, "कि आरामेरे दिहाड़े कानूनेरे मुताबिक कोई बज़्झ़ानो जाइज़े की नईं?" 4 तैना च़ुप राए, तैखन यीशुए तैस बिमारे पुड़ अपनो हथ रख्खो ते तै बझ़ाव, ते घरजो भेज़ो। 5 ते फरीसन सेइं ज़ोवं, "तुसन मरां एरो कौने, ज़ेसेरू मट्ठू या दांत खड्डे मां खिरके ते आरामेरी दिहाड़ी भोए, ते तैस तैट्ठां बेइर न कढे?" 6 ते तैन लोकेईं यीशुएरी गल्‍लां केरो जुवाब न देइ बटो।

7 ज़ैखन यीशुए हेरू कि, ज़ैना लोक धाम ज़ोइतां रोट्टी खाने कुजोरेन केन्च़रे खास लोकां केरि ठार च़ुनतन, तैनी तैन अक मिसाल दित्ती। 8 "ज़ैखन तुसन कोई ड्लाहेरी धामी मां कुजाए। ज़ै तैनेईं खास मैन्हु केरे लेई ठार रख्खोरी भोए, तुस तैड़ी न बिशथ, भोइ सकते कि होरो कोई तुसन करां जादे खास मैन्हु कुजेवरो भोए। 9 ते तुसन दूईये ज़न्न कुजाने बालो तुसन कां एइतां ज़ोए, ऐह ठार होरि केरे लेइए ते तुसन शरमेइतां खड़े उठनू पे, ते सेब्भन करां पत्र बिशनू पे। 10 ज़ैखन भी कोई तुसन धाम ज़ोइतां कुजाए त सेब्भन करां पत्र बिश्शा, ताके ज़ैखन तेरो कुजाने बालो एज्जे ते ज़ोए, ‘दोस्त, अगर एइतां खास ठैरी बिश,’ त तैन लोकां केरे सामने तेरी केत्री बडीयाई भोनीए। 11 किजोकि ज़ै कोई अपनो आप बड्डो बनालो त तै निकड़ो बनाव गालो ते ज़ै कोई अपनो आप निकड़ो बनालो त तै बड्डो बनाव गालो।"

12 फिरी यीशुए, तैस फरीसी मैन्हु सेइं ज़ैनी तै कुजेवरो थियो ज़ोवं, "ज़ैखन तुस दीसेरी या रातरी धामी मां मैन्हन कुजाथ, त अपने दोस्तन या ढ्लान रिश्तेदारन या अपने अमीर पड़ोसन न कुजेइयथ। किजोकि तैना भी तीं कुजेइतां तेरू एवसान मुकेइ छ़डेले। 13 बल्के ज़ैखन तुस धाम देथ त टोन्टे, कानो, गरीब गुरबे, परदेशी कुजेइयथ। 14 ते परमेशर तुसन बरकत देलो, किजोकि तैन कां किछ भी नईं ज़ैस सेइं तैना तुश्शू एवसान मुकेइ बटन, ते तेरे एस एवसानेरो फल धेर्मी लोकन ज़ींते भोने सेइं साथी फैसलेरी दिहैड़ी मैल्हेलो।"

15 ट्लाहन्न मरां एक्‍के एन गल्‍लां शुन्तां यीशु सेइं ज़ोवं, "परमेशरेरे राज़्ज़ेरी धामी मां खाने बालो धन भोल्हो।" 16 यीशुए तैस जुवाब दित्तो, "केन्चे मैन्हे अक बड़ी धाम दित्ती ते बड़े लोक कुजाए। 17 ज़ैखन रोट्टी खानेरो वक्त अव त तैनी अपनो नौकर भेज़ो कि तैन लोकन ज़ैन जो ड्लाहेरी धाम बनोरी थी, ‘एज्जा, रोट्टी बनेवरीए।’ 18 पन धामी बालेईं सेब्भेईं मिलतां एतराज़ कियो ते पेइले मैन्हे ज़ोवं, ‘मीं ऊडार घिन्नेरू आहे, मीं तैस हेरने गानूए ते अवं तीं कां मिन्नत केरतां कि मीं राने दे।’ 19 त होरो ज़ोने लगो, ‘मीं पंच़ हल्‍लां दांत घिन्नोरेन ते अवं तैन लाने परखने च़लोरोईं। अवं तीं कां मिन्नत केरतां कि मीं राने दे।’ 20 अक होरो मैन्हु लगो ज़ोने, ‘मीं ड्लाह बनावरोए, एल्हेरेलेइ अवं न एज्जी बेटि।’ 21 तैखन नौकरे वापस एइतां एन सैरी गल्‍लां अपने मालिके शुनेईं, त मालिके बड़ी सरक अई, तैनी अपने नौकरे जो ज़ोवं, ‘इस नगरे मां गा ते लेंगे लुथे, गरीब गुरबे नग्गे, नियन्ने भत्ते, टोन्टे, कानो इरां कुजा।’ 22 नौकरे ज़ोवं, ‘हे मालिक ज़ैन तीं ज़ोवं, मीं तैन्ने कमाव, पन फिरी भी ठार खाली आहे।’ 23 मालिके नौकरे सेइं ज़ोवं, ‘बत्तरे आसे पासे ऊडारन मांमेइं गा ते लोक मजबूर केरतां आन, ताके मेरू घर भेरतां भोए। 24 किजोकि अवं तीं सेइं ज़ोताईं कि ज़ैन लोक पेइले कुजेवरे थिये, यानी खास ठैरारे लेई कुजेवरे थिये, तैन मरां कोई भी मेरी धामी मां रोट्टी न खेइ सकेलो।’"

25 बड़े लोक यीशु पत्ती च़लोरे थिये, यीशुए पत्रोवं तक्‍कू ते ज़ोवं। 26 "अगर कोई मीं कां एज्जे, ते अपने अम्मा बाजी, कुआन्श, बच्‍चन, ढ्लान ते बेइन्न ते अपने जानी करां जादे प्यार मीं सेइं न केरे त तै मेरो चेलो न भोइ सके। 27 ते ज़ै कोई मेरो चेलो भोनेरी वजाई सेइं दुख झ़ैल्‍लनेरे लेई त कने मरनेरे लेई तियार नईं, त तै मेरो चेलो न भोइसखे। 28 तुसन मरां एरो कोई भोए, ज़ै गुम्मट बनानू चाए, ते पेइले बिशतां हिसाब न केरे, कि पूरो केरनेरे लेई मीं कां खर्च़ो आहे कि नईं। 29 कधे एरू न भोए कि खाइ कटनेरे बाद तैस बनेइ न सके ते तकने बाले हसते रान। 30 ‘ते ज़ोन एनी मैन्हे बनानू त शुरू कियूं, पन बनेइ न बटो।’ 31 या फर्ज़ केरा कि कोई राज़ो होरि राज़े सेइं लड़ाई केरनेरे लेई सोची राहोरो भोए त कुन पेइले एन न सोचे कि 10000 फौजी जुवानन सेइं अवं 20000 फौजी जुवानन सेइं तैसेरो मुकाबलो केरि सकतां कि नईं? 32 अगर तै मुकाबलो न केरि सखे त तैस फौजी सेइं ज़ै दूरे, मैन्हु भेज़तां तैस सेइं मिलापेरी मिन्नत केरेलो। 33 एन्च़रे अगर ज़ै कोई तुसन मरां अपनु सब किछ न छ़डे त मेरो चेलो न भोइसखे।

34 "लून रोड़ी चीज़े, पन अगर लूनेरो लूनार मुक्‍की गाए त तैन कोस सेइं लूने बनाव गालू? 35 लोक तैस बेइरोवं शैरी देले, ज़ै कोई समझ़नू चाते, तै ध्याने सेइं शुने ते समझ़े।"