14 यीशुए तैन लेहितां ज़ोवं, "यरूशलेम नगरेरे मन्दरे मां गाथ ते अपनो आप याजकन हिराथ, ते सच़्च़े एरू भोवं कि गाते बार बत्तां तैन केरू कोढ़ साफ भोइ जेवं।" 15 पन तैन मरां अक कोढ़ी अपनु कोढ़ हेरतां कि, तैसेरू कोढ़ साफ भोवरूए खुशी भोइतां बड़े ज़ोरे सेइं परमेशरेरी तारीफ़ केरतो वापस यीशु कां अव, 16 ते यीशुएरे पव्वन पुड़ दोग रेखतां शुक्र लगो केरने। ऐह मैन्हु सामरी थियो। 17 यीशुए तैस पुछ़ू, "कुन तैन दश कोढ़ी केरू कोढ़ साफ नईं भोवरू? फिरी तैना कोरहां जे? 18 कुन एस गैर यहूदी मैन्हेरे अलावा तैन होरन एत्री हिम्मत न अई, कि गेइतां परमेशरेरी महिमा केरम?" 19 तैखन यीशुए तैस ज़ोवं, "खड़ो उठ ते च़लो गा तीं मीं पुड़ विश्वास कियो तांए तू बेज़्झ़ोस।"