1 फिरी यीशु पवित्र आत्मा सेइं भरपूर भोइतां यरदन दरियाए मरां वापस अव त 40 दिहाड़े पवित्र आत्मारे च़लाने सेइं सुनसान ठैरी जो च़लो जेव। 2 तैन 40 दिहाड़न मां शैतान तैस अज़मातो राव, तैन दिहैड़न मां तैनी किछ न खाव पीवं ते ज़ैखन तैना दिहाड़े पूरे भोए त तैस ढ्लुख लग्गी। 3 शैताने तैस जो ज़ोवं, "अगर तू परमेशरेरू मट्ठू आस त इन घोड़न जो ज़ो कि एना रोट्टी बन्न।" 4 यीशु तैस जुवाब दित्तो, "पवित्रशास्त्रे मां लिखेरूए, ‘मैन्हु सिर्फ रोट्टेइं सेइं ज़ींतो न राए।’ " 5 फिरी शैतान यीशुए एक्‍की उच्‍चे पहाड़े पुड़ घिन्तां जेव ते तैट्ठां एक्‍की पले मां तैस तैड़ी दुनियारां सारां राज़्ज़ां हिरां। 6 ते तैनी यीशु सेइं ज़ोवं, "एन सब किछ मेरे अधिकारे मांए, ते एसेरी सारी धन दौलत अवं तीं देलो एन मेरे सुपुर्दे। अवं ज़ैस चाताईं तैस देइ सकताईं। 7 बस अगर तू मीं कां मथ्थो टेकस त एन सब किछ तेरू भोल्हु।" 8 यीशुए तैस जुवाब दित्तो, "पवित्रशास्त्र मां लिखेरूए, ‘तू सिर्फ अपने प्रभु परमेशरे कां मथ्थो टेकतां ते सिर्फ तैसेरी भक्ति केरां।’ " 9 ते तैनी यीशु यरूशलेम नगरेरे मन्दरेरी उच्‍ची छ़म्पी पुड़ नेइतां खड़ो कियो ते तैस सेइं ज़ोवं, "अगर तू परमेशरेरू मट्ठू आस त अपनो आप इट्ठां उन्ढो बछ़ोड़। 10 किजोकि पवित्रशास्त्रे मां लिखेरूए, ‘तै तेरे लेई अपने स्वर्गदूतन हुक्म देलो ते तैना तेरी हिफाज़त केरेले।’ 11 ते ‘तैना तीं अपने हथ्थन पुड़ छ़ूले ताके एरू न भोए कि तेरे पव्वन घोड़न सेइं ठोकर लग्गे।’" 12 यीशुए तैस जुवाब दित्तो, "पवित्रशास्त्रे मां इन भी लिखेरूए तू अपने प्रभु परमेशरेरी अज़मैइश न केरां।" 13 ज़ैखन शैताने तैसेरी बड़े तरीकेईं अज़मैइश की, त किछ च़िरेरां बाद तैस करां च़लो जेव।

14 फिरी यीशु पवित्र आत्मारी शेक्ति सेइं भरपूर भोइतां गलील इलाके मां वापस अव, ते सारे इलाके मां तैसेरी मुशूरी भोइजेइ। 15 यीशु तैन केरे प्राथना घरन मां शिक्षा देतो राव, ते सब लोक तैसेरी तारीफ़ केरते थिये।

16 फिरी तै नासरत नगरे मां वापस अव ज़ैड़ी तै पलोरो थियो। अपने रीतरे मुताबिक आरामेरे दिहाड़े तै प्राथना घरे मां जेव ते वचन पढ़नेरे लेई खड़ो भोव। 17 ते तैस यशायाह नेबेरी किताब दित्ती ते तैनी खोलतां तैन वचन कढू ज़ैड़ी लिखोरू थियूं, कि,

18 "प्रभुएरी आत्मा मीं पुड़े,

एल्हेरेलेइ कि तैनी गरीबन खुशखबरी शुनानेरे लेई

मेरू अभिषेक कियोरूए,

तैनी अवं भेज़ोरोईं कि कैदन हथरां छ़ेड्डी (ज़ैना शैतानेरे कब्ज़े मां आन)

ते कांना केरि एछ़्छ़न ठीक भोनेरी खबर शुनेई,

ते ज़ैन पुड़ ज़ुलम भोते तैन लोकन आज़ाद केरि।

19 ते तैस वक्तेरो प्रचार केरि ज़ेइस परमेशर लोकन पुड़ दया केरेलो।"

20 फिरी तैनी तै किताब बंद केरतां सेवके कां वापस देइतां बिश्शी जेव। ज़ेत्रे प्राथना घरे मां थिये सब तैसेरां तकते थिये। 21 ते तै तैन सेइं ज़ोने लगो, "अज़ पवित्रशास्त्रेरू तैन वचन तुश्शे सामने पूरू भोवं।" 22 ते सब तैसेरी तारीफ़ केरने लगे, ते तैसेरी गल्‍लन पुड़ बड़ो अनुग्रह थियो, ज़ैना गल्‍लां तैसेरे ऐशेरां निसती थी, ते लोक हैरान भोइतां ज़ोने लगे, "कुन एन यूसुफेरू मट्ठू नईं?" 23 यीशु तैन सेइं ज़ोने लगो, "ए कहावत तुस मीं पुड़ ज़रूर ज़ोले, ‘कि हे बेईद जी अपनो आप त ठीक केर, ज़ैन किछ असेईं कफरनहूम नगर मां केरतू शुनेरूए, तैन इड़ी अपने नगरे मां भी केर।’ " 24 ते तैनी इन भी ज़ोवं, "अवं तुसन सेइं सच़ ज़ोताईं, कि कोई नबी अपने मुल्खे मां कबूल न कियो गाए। 25 अवं तुसन सेइं सच़ ज़ोताईं कि एलिय्याह नेबेरे वक्ते मां ज़ैखन सड़े ट्लाई साल अम्बर बंद भोवं (यानी झ़ड़ी न भोइ) ते इड़ी तगर कि सैरी मुल्खे मां बड़ो काल पेई जेव ते तैस वक्ते बेड़ि विधवा कुआन्शां इस्राएले मुल्खे मां थी। 26 पन एलिय्याह नबी, तैन मरां केन्ची कां नईं पन सैदा नगरेरे नेड़े सारफत नगरे मां एक्‍की विधवा कां भेज़ो, ज़ै यहूदी न थी। 27 ते एलीशा नेबेरे ज़माने मां इस्राएलेरे मुल्खे मां बड़े कोढ़ी थिये पन तैन मरां कोई भी कोढ़े करां साफ न थियो भोवरो, पन सिर्फ अक सीरियारो रानेबालो नामान कोढ़े करां साफ भोवरो थियो, ज़ै गैर कौमी मरां थियो।" 28 ज़ेत्रे लोक प्राथना घरे मां थिये एना गल्‍लां शुन्तां सरकी सेइं लाल-लाल भोइ जे। 29 ते खड़े उट्ठतां तैस नगरे करां बेइर निस्से ते तै तैस पहाड़ेरी च़ोटी पुड़ घिन्तां जे ज़ैस पुड़ तैन केरू नगर आबाद थियूं, ताके तैस तैट्ठां उन्ढे बछ़ोड़तां मारन। 30 पन यीशु तैन मरां निस्तां च़लो जेव।

31 फिरी तै गलील इलाकेरे कफरनहूम नगरे मांजो जेव। ते आरामेरे दिहाड़े तैन शिक्षा देने लग्गोरो थियो। 32 ते लोक तैसेरी शिक्षा शुन्तां हैरान रहते थिये किजोकि तैसेरी शिक्षा बड़े अधिकारे सेइं थी। 33 प्राथना घरे मां अक मैन्हु थियो, ज़ैस पुड़ भूतेरो सायो थियो। तै बड़े ज़ोरे सेइं चिन्डां मारने लगो। 34 "हे नासरत नगरेरे यीशु! असन तीं सेइं कुन कम? कुन तू असन नाश केरनेरे लेई एवरोस? अवं ज़ानताईं कि तू कौन आस, तू परमेशरेरू पवित्र मट्ठू आस!" 35 यीशुए तैस झ़िड़क देइतां ज़ोवं, "च़ुप रा, एस मैन्हु मरां निस्सी गा!" तैखन भूते तै मैन्हु ज़मीनी पुड़ शैरी दित्तो, ते तैस मरां निस्सी जेव। 36 एन हेरतां सारे लोक बड़े हैरान भोए ते एप्पू मांमेइं ज़ोने लगे, "ऐह कुन गल आहे! तै अधिकारे ते शेक्ति सेइं भूतन हुक्म देते ते तैना तैस मरां निस्सी गातन।" 37 ते सारे मुल्खेरे मां च़ेवरे पासन तैसेरी खबर फैली जेई।

38 फिरी तै प्राथना घरे मरां उट्ठतां शमौनेरे घरे जेव ते शमौनेरी शिखी बड़ो भुखार थियो, ते लोकेईं तैसारे बारे मां यीशु सेइं ज़ोवं। 39 तै खड़ो भोइतां तैसारे पासे फिरो ते बिमारी झ़िड़की, ते तैसारो सारो भुखार उतरी जेव ते तै खड़ी भोइ, ते तैन केरि सेवा केरने लगी। 40 ज़ैखन दिहाड़ी लाई डुबने त लोकेईं तैना सब लोक ज़ैन मां किसमां-किसमां केरि बिमैरी थी तैस कां आने, ते यीशुए तैन पुड़ हथ रेखतां तैना सब बज़्झ़ाए। 41 भूतां भी चिन्डां मारतां थियां, ते ज़ोतां थियां, "तू परमेशरेरू मट्ठूस!" ते बड़े लोकन मरां भूतां केरो सैयो निस्सी जेव, ते तै तैन झ़िड़कतो थियो, ते तैन गल भी न थियो देतो केरने, किजोकि तैना भूतां ज़ानतां थियां कि ऐह मसीह आहे।

42 ज़ैखन झ़ेझ़ भोइ त यीशु उट्ठतां बेइर एक्‍की सुनसान ठैरी मां जेव, ते पुतोरां सारे लोक तैस तोपते-तोपते तैस कां पुज़्ज़े ते रोकने लगे कि तू असन करां न गा। 43 पन यीशुए तैन सेइं ज़ोवं, "मीं होरि नगरन मां भी परमेशरेरे राज़्ज़ेरी खुशखबरी शुनानी ज़रूरीए किजोकि अवं एल्हेरेलेइ भेज़ोरोईं।" 44 ते तै यहूदिया इलाकेरे प्राथना घरन मां प्रचार केरतो राव।