Lucas 7

एक्‍की सूबेदारेरो यीशु पुड़ विश्वास

1 ज़ैखन तैनी लोकन एपनी सब गल्‍लां शुनेई छ़ेडी, त तै कफरनहूम नगरे मां अव। 2 तैड़ी केन्ची सूबेदारेरो अक ट्लारो सेवक बिमार थियो ते मरने बालो थियो। 3 तैनी यीशुएरी मुशूरी शुन्तां यहूदी केरे किछ बुज़ुर्ग तैस कां मिन्नत केरनेरे लेई भेज़े, कि तै एइतां मेरो सेवक बज़्झ़ाए। 4 तैना यीशु कां आए ते तैस कां मिन्नत केरने लगे, "तै इस काबले, कि तू तैसेरेलेइ इन केरस। 5 किजोकि ते इश्शी कौमी सेइं बड़ी हमदरदी रखते, ते इश्शू प्राथना घर तैन्नी बनेवरूए।" 6 यीशु तैन सेइं साथी-साथी च़लो जेव, पन ज़ैखन तैस घरे नेड़े पुज़ो त सूबेदारे होरि दोस्तन सेइं समाद भेज़ो कि, "प्रभु तकलीफ न केर, किजोकि अवं एस काबल नईं कि तू मेरे घरे मां एज्जी सखत। 7 एस्से वजाई सेइं अवं भी अपनो आप तीं कां एजनेरे काबल न सेमझ़ी बल्के अपनि ज़बानी सेइं ज़ोस त मेरो नौकर बेज़्झ़ोइ सकते। 8 तै मैन्हु ज़ोने लगो कि अवं भी केन्चेरे अधिकारे मां कम केरताईं, ते सिपाही मेरे अधीन आन, ते ज़ैखन एक्‍की जो ज़ोतां कि ‘गा,’ त तै गाते, ते होरि जो ज़ोतां एई, त तै ‘एइते,’ ते अपने सेवके जो ज़ोताईं, ‘इन कम केर,’ त तै केरते।" 9 यीशु एन शुन्तां हैरान रेइ जेव, ते पत्रोवं लोकां केरे पासे लगो तकने ज़ैना तैस पत्पती एवरे थिये तैन जो ज़ोने लगो, "कि अवं तुसन सेइं सच़ ज़ोताईं कि मीं इस्राएल मुल्खे मां इस गैर यहूदी मैन्हेरो ज़ेरो मैन्हु नईं लवरो ज़ै मीं पुड़ एत्रो विश्वास केरे।" 10 ते ज़ैना लोक यीशु कां भेज़ोरे थिये वापस ज़ैखन घरे आए त तै सेवक बेज़्झ़ोरो लव।

विधवारू मट्ठू ज़ींतू केरनू

11 थोड़े च़िरेरां पत्ती एरू भोवं कि यीशु नाईन नव्वेंरे नगरे मां च़लो जेव, ते तैसेरे चेले ते होरे भी बड़े लोक तैन सेइं साथी थिये। 12 ज़ैखन तैना नगरेरे फाटके पुड़ नेड़े पुज़्ज़े, त हेरतन, कि अक मुड़दो बेइर जो च़लेवरोए, ते तैन अपनि अम्मरू अक्‍के मट्ठू थियूं, ते नगरेरे बड़े लोक तैस विधवा कुआन्शी सेइं साथी थिये। 13 एन लेहितां प्रभुए बड़ो तरस अव, ते तैस जो ज़ोवं, "लेरां न दे।" 14 फिरी यीशु नेड़े एइतां शिड़ी सेइं हथ लाव, ते छ़ूनेबाले रुके, ते यीशुए ज़ोवं, "हे जुवान, अवं तीं सेइं ज़ोतां, खड़ो उठ!" 15 तैखन मुड़दो उठो, ते गल्‍लां लगो केरने, ते यीशुए तै तैसेरी अम्मा सौंफतां छ़डू। 16 इन हेरतां सब लोक डेरि जे, ते परमेशरेरी तारीफ़ केरने लगे, "अक महान नबी असन मां एवरोए, ते परमेशरे अपने लोकन पुड़ अपनि सिद्धी नज़र रख्खोरीए। 17 एस्से गल्‍लरी वजाई सेइं ऐह खबर यहूदियारे ते आसे पासेरे सेब्भी मुल्खन मां फैली जेई।"

यूहन्ना बपतिस्मो देनेबालेरो सवाल

18 ते यूहन्ना तैसेरे चेलेईं एन सैरी गल्‍लां केरि खबर दित्ती। 19 तैखन यूहन्ना एन शुन्तां दूई चेले कुजेइतां यीशु कां पुछ़ने भेज़े कि, "एजनेबालो तू आस, या असां होरि बलगम?" 20 तैनेईं यीशु कां एइतां पुछ़ू, "असां यूहन्ना बपतिस्मो देनेबाले तीं कां पुछ़ने भेज़ोरेम, कि एजनेबालो तू आस, या असां होरि बलगम?" 21 तैखन यीशुए बड़े लोक बिमैरन ते तकलीफ, ते भूतन करां छुटाए, ते बड़े काने लोकन एछ़्छ़न लौ दित्ती। 22 यीशु तैन ज़ोवं, "ज़ैन किछ तुसेईं लाहेरूए ते शुनेरूए गेइतां यूहन्ना सेइं ज़ोथ, कि काने लातन, ते टोन्टे च़लतन, ते कोढ़ी केरू कोढ़ साफ भोते, ते टोंऊने शुन्तन, ते मुड़दे ज़ींते भोतन, ते गरीबन खुशखबरी शुनाई गाचे। 23 परमेशर तैस बरकत देते, ज़ै मीं पुड़ शक न केरे।"

24 ज़ैखन यूहन्नारे बिस्तार देनेबाले लोक वापस च़ले जे, त यीशु यूहन्नारे बारे मां गवाही देने लगो, "तुस जंगले मां कुन हेरने जेवरे थिये? कुन हवाई सेइं हिलते निरैठरे डाल? 25 त फिरी तुस होरू कुन हेरने जेवरे थिये? कुन रोड़ां लग्गोरां लिगड़न बालो मैन्हु? हेरा, ज़ैना मगां लिगड़ां लाने बाले मैन्हु, ते ज़ैना एश केरनेबाले लोक भोतन। तैना राज़ मेहलन मां रहतन, 26 त फिरी तुस होरू कुन हेरने जेवरे थिये? कुन कोई नबी? हाँ, अवं तुसन सेइं ज़ोताईं, नेबी करां बड्डे। 27 ऐह तैए, ज़ेसेरे बारे मां लिखेरूए,

‘हेर, अवं अपनो बिस्तार देनेबालो तीं अग्री-अग्री भेज़ताईं, ज़ै तेरी बत अग्रोवं तियार केरेलो।’ "

28 यीशुए ज़ोवं, "अवं तुसन सेइं सच़ ज़ोताईं, कि ज़ै कुआन्शन करां ज़र्मोरोए, तैन मां यूहन्ना बपतिस्मो देनेबाले करां बड्डो कोई नईं। पन ज़ै परमेशरेरे राज़्ज़े मां निकड़ोए, तै यूहन्ना करां बड्डोए।" 29 ज़ैखन तैन लोकेईं एन गल्‍लां शुनी त धड़त नेनेबालेईं भी यूहन्ना बपतिस्मो देनेबाले करां बपतिस्मो नेइतां परमेशर धर्मी मन्नो। 30 पन फरीसी लोकेईं ते शास्त्री लोकेईं तैस करां बपतिस्मो न नेइतां परमेशरेरी मर्ज़ी अपने बारे मां टाली।

31 "बस्सा, अवं इस ज़मानेरे लोकां केरि मिसाल केस सेइं देईं, तैना केसेरे ज़ेरेन? 32 तैना तैन मट्ठां केरे ज़ेरेन ज़ैना बज़ारे मां बिशोरां एक्‍की होरि जो हक देइतां ज़ोतन, ‘असेईं तुश्शे लेई बेंशोई बज़ाई, ते तुस न नच़्च़े, असेईं शोग मनाव, पन तुसेईं लेरां न दित्ती!’ 33 किजोकि यूहन्ना बपतिस्मो देनेबालो न रोट्टी खातो अव, न शराब पीतो अव, ते तुस ज़ोतथ, कि एस पुड़ भूतेरो सैयो आहे। 34 मैन्हेरू मट्ठू खातू पीतू अव, ते तुस ज़ोतथ, ‘हेरा, तै पेटू ते शराबी मैन्हु, कने धड़त नेनेबाले ते पापी लोकां केरो दोस्त।’ 35 पन अक्ल अपने सेब्भी मट्ठन करां जादे सच़्च़ी साबत भोइ।"

एक्‍की फरीसी मैन्हेरे घरे पापी कुआन्शी माफ़ी

36 फिरी केन्चे फरीसे यीशु कां मिन्नत की, कि मीं सेइं साथी रोट्टी खा, बस्सा, तै तैस सेइं साथी तैसेरे घरे जेव, ते तैस सेइं साथी रोट्टी खांने लगो। 37 त हेरा, अक बदचलन कुआन्श ज़ै तैस नगरेरी थी एन बुझ़तां कि यीशु फरीसेरे घरे रोट्टी खांने बिशोरोए, संगमरमरेरे एक्‍की भांडे मां इत्र आनो। 38 ते यीशुएरे पव्वन कां नेड़े लेरां देंती खड़ी भोइ, ते तैसेरे पव एंखेइं सेइं सेले ते अपने दोग्गेरे बालेईं सेइं पोंछ़ने लगी ते तैसेरे पव्वन फुम्मड़ी देने लगी कने पव्वन पुड़ इत्र लाव। 39 ज़ैनी फरीसे यीशु कुजेवरो थियो, तैनी एन लाव, त ज़ोने लगो, "अगर ऐह मैन्हु नबी भोथो त बुझ़ेथो कि ज़ै कुआन्श तैस कांए तै कौने ते ऐह केरि कुआन्शे? किजोकि ऐह बदचलने।" 40 यीशु तैसेरे इन खियाल ज़ैंनतां तैस सेइं ज़ोवं, "हे शमौन, मीं तीं सेइं किछ ज़ोनूए।" फरीसे ज़ोवं, "हे गुरू ज़ो।" 41 यीशुए तैस सेइं मिसाल देइतां ज़ोवं "केन्ची शोहुकारेरो केन्ची दूई ज़न्न कां कर्ज़ो थियो, एक्‍की कां 500 दीनार,*7:41 शौव दीनार, शौव दिहैड़ी केरि मज़दूरी। ते होरि कां 50 दीनार थिये। 42 ज़ैखन तैन कां देने जो किछ न रावं, त तैनी शोहुकारे दूईने कर्ज़ो माफ़ कमाव। बस्सा, कौन तैन मरां जादे शोहुकारे सेइं प्यार केरेलो?" 43 शमौने जुवाब दित्तो, "मेरे समझ़ी सेइं त ज़ेसेरो जादे कर्ज़ो माफ़ कियो।" यीशुए ज़ोवं, "तीं ठीक फैसलो कियो।" 44 यीशु तैस कुआन्शरे पासे तेकतां शमौने ज़ोवं, "कुन तू इस कुआन्शरां तकतस? अवं तेरे घरे अव, तीं मीं (रीतरे मुताबिक) पव धोने जो पानी न दित्तू, पन इसां मेरे पव एंखेइं सेइं पव धोए ते अपने दोग्गेरे बालेईं सेइं पौंछ़े।" 45 तीं मीं (रीतरे मुताबिक) फुम्मड़ी न दित्ती, पन एसां ज़ैखनेरो अवं इड़ी एवरोईं मेरे पव्वन फुम्मड़ी देनी न उडैई। 46 तीं मेरे दोग्गे पुड़ तेल न मल्‍लो, पन एसां मेरे पव्वन पुड़ इत्र मल्‍लो। 47 "एल्हेरेलेइ अवं तीं सेइं ज़ोताईं कि, एसारे जादे पाप ज़ैना एसां कियोरे थिये, माफ़ भोए, किजोकि एसां जादे प्यार कियो, पन ज़ेसेरे थोड़े पाप माफ़ भोतन तै थोड़ो प्यार केरते।" 48 यीशुए तैस कुआन्शी जो ज़ोवं, "गा तेरे पाप माफ़ भोए।" 49 एस गल्‍ली पुड़ ज़ैना तैस सेइं साथी रोट्टी खांने बिश्शोरे थिये, अपने-अपने मने मां सोचने लगे, "ऐह कौने ज़ै पाप भी माफ़ केरते, पाप त सिर्फ परमेशर माफ़ केरते?" 50 पन यीशुए तैस कुआन्शी सेइं ज़ोवं, "परमेशरे तू एल्हेरेलेइ बच़ाई कि तीं मीं पुड़ विश्वास कियो, हुनी तू खुशी सेइं गा।"