1 यीशुए अपने 12 चेले एप्पू कां कुजाए ते तैन शक्ति ते अधिकार दित्तो कि सैरी भूतन कढन ते बिमैरी दूर केरन। 2 ते यीशुए तैना परमेशरेरे राज़्ज़ेरो प्रचार केरनेरे लेई ते बिमार बझ़ानेरे लेई भेज़े। 3 तैनी तैन सेइं ज़ोवं, "बत्तां जो किछ न नेइयथ, न सोटी न झोलो न रोट्टी न पेइंसे ते न दूइयोवं लिगड़ां। 4 ज़ैस घरे मां गाथ त तैड़ी बिश्शी रेइयथ ज़ांतगर तुस तैस नगरे मरां न गाथ। 5 ते ज़ैस नगरेरे लोक तुसन कबूल न केरन त तैस नगरे मरां गांते बार अपने पव्वां केरि धूड़ ठुड़कथ, ताके तैन पुड़ गवाही भोए।" 6 बस्सा, तैना च़ले जे, ते ड्लाव्वें-ड्लाव्वें गेइतां परमेशरेरी खुशखबरी शुनाते, ते लोकन बिमैरन करां बज़्झ़ाते च़ले जे।

7 मुल्खेरो च़ेवरोवं हिस्से पुड़ हेरोदेस राज़ो राज़ केरतो थियो, तै एन सब शुन्तां डेरि जेव। किजोकि किछ ज़ोते थिये यूहन्ना मुड़दन मरां ज़ींतो भोवरोए। 8 ते किछ ज़ोते थिये एलिय्याह लेइहोरोए, ते किछ ज़ोते थिये नेबन मरां कोई ज़ींतो भोवरोए। 9 पन हेरोदेसे ज़ोवं, "यूहन्नारी क्रोड़ी त मीं कट्टेव्री थी, पन ऐह कौन आहे, ज़ेसेरे बारे मां एरी ज़ेरि गल्‍लां शुन्ने मां एजने लेवरिन?" ते हेरोदेस यीशु हेरनेरी इच्छा की।

10 फिरी प्रेरितेईं वापस एइतां ज़ैन किछ कियेरू थियूं, यीशु सेइं शुनावं, ते यीशु तैन अलग नेइतां बैतसैदा नव्वेंरे नगरे मां च़लो जेव। 11 ते बड़े लोक तैस पत्ती च़ले, ते यीशु बड़े खुशी सेइं तैन सेइं मिलो। ते तैन सेइं परमेशरेरे राज़्ज़ेरी गल्‍लां केरने लगो, ते ज़ैना बिमार ठीक भोनू चाते थिये, तैनी तैना बज़्झ़ाए। 12 ज़ैखन दिहाड़ी डुबने लगी त तैन 12 चेलेईं यीशु सेइं ज़ोवं, "एन लोकन भेज़ी छ़ड एना कोस्कोई ड्लाव्वन मां गेइतां बिश्शन ते रोट्टरो इंतज़ाम केरन। किजोकि असां गैर आबाद ठैरी आम।" 13 तैनी तैन सेइं ज़ोवं, "तुस्से एन किछ खाने जो देथ।" तैनेईं ज़ोवं, "असन कां पंच़ रोट्टी ते दूई मेछ़लीन करां जादे किछ भी नईं, पन असां गेइतां एन जेई रोट्टी मुल्‍ले घिन्तां आनतम, त इन भोइ बटते।" 14 (किजोकि तैन लगभग 5000 मड़द थिये।) यीशुए अपने चेलन सेइं ज़ोवं, "एन लोकन 50-50 मैन्हु केरि हुन्डी मां बिशाला।" 15 ते चेलेईं तैन्ने कियूं ते तैना तेन्च़रे बिशाले। 16 तैखन तैनी तैना पंच़ रोट्टी ते दूई मेछ़ली नी, ते अम्बरेरां तेकतां शुक्र कियूं, फिरी तैनी तैना रोट्टी ट्लोड़ी ते चेलन कां दित्ती, कि तैन बिशालोरे लोकन खांने जो देन। 17 सारे मैन्हु खेइतां रेज़्ज़ी जे। तैल्‍ला पत्ती, यीशुएरे चेलेईं बच़ोरे टुक्ड़न सेइं 12 टोकरी भेरि।

18 एक्‍की बार यीशु अकैल्‍लो प्राथना केरने लेवरेन थियो, ते चेले भी तैस सेइं थिये। यीशुए तैन पुछ़ू, "कि लोक मींजो कुन ज़ोतन?" 19 चेलेईं जुवाब दित्तो, "किछ ज़ोतन यूहन्ना बपतिस्मो देनेबालो, ते किछ ज़ोतन एलिय्याह, ते किछ ज़ोतन नेबन मरां कोई अक ज़ींतो भोवरोए।" 20 तैखन यीशुए चेलन पुछ़ू, "पन तुस मेरे बारे मां कुन सोचतथ कि अवं कौन आईं?" पतरसे जुवाब दित्तो, "तू परमेशरेरो मसीह आस।" 21 तैखन तैनी तैन खबरदार केरतां ज़ोवं, "कि ऐह गल केन्ची सेइं न ज़ोइयथ।"

22 यीशुए ज़ोवं, "मैन्हेरे मट्ठेरे लेई ज़रूरी आए, कि तै बड़ो दुख झ़ैल्‍ले, यहूदी लोकां केरे बुज़ुर्गन, प्रधान याजकन, ते शास्त्री तैस घटिया सेमझ़तां मारेले, ते तै ट्लेइयोवं दिहाड़े फिरी ज़ींतो भोल्हो।"

23 फिरी यीशुए तैन सेब्भन ज़ोवं, "अगर कोई मीं पत्ती एजनो चाए, त अपने आपेरो इन्कार केरे, ते रोज़ अपनु क्रूस छ़ूए ते मीं पत्ती च़ले। 24 किजोकि ज़ै कोई अपनि जान बच़ानी चाते तै तैस गुवालो, पन ज़ै मेरे लेई अपनि जान गुवालो त तै तैस बच़ालो। 25 मैन्हु अगर सारी दुनिया हासिल केरे, ते अपनि जानरो नुकसान केरे, या अपनो आप गुवाए, त तैस कुन फैइदो? 26 किजोकि अगर कोई मैन्हु मीं करां त कने मेरी गल्‍लन करां शरमाते, त मैन्हेरू मट्ठू यानी अवं भी तैस करां शरमालो। ज़ेइस अवं अपने बाजी केरि महिमा सेइं साथी त कने पवित्र स्वर्गदूतन सेइं साथी वापस एज्जेलो, त तेइस अवं तैस करां भी शरमालो।" 27 "अवं तुसन सेइं सच़ ज़ोताईं कि ज़ैना इड़ी खड़े आन, तैन मरां किछ मैन्हु एरे आन कि ज़ांतगर तैना परमेशरेरे राज़्ज़ेरी शक्ति न हेरेले, तांतगर तैना न मरेले।"

28 एन गल्‍लां केरे लगभग अठ दिहाड़ना बाद पतरस, ते यूहन्ना ते याकूब साथी नेइतां एक्‍की पहाड़े पुड़ प्राथना केरने च़ले जे। 29 ते ज़ैखन यीशु प्राथना लगोरो थियो केरने, त तैसेरी शकल बेदलोई जेई, ते तैसेरां लिगड़ां लौअरां ज़ेरां चमकने लगो। 30 ते हेरा, मूसा, ते एलिय्याह, इन्ना दूई मड़द तैस सेइं गल्‍लां केरने लग्गे। 31 इन्ना महिमा सेइं साथी लेइहोए, ते तैसेरे मरनेरी गलबात केरने लगोरे थिये, ज़ैन किछ यरूशलेम नगरे मां भोनेबालू थियूं। 32 पन पतरस ते तैसेरे सैथी केरि एछ़्छ़ी निड्ली सेइं गिरकी भोवरी थी, ज़ैखन तैना बींझ़े, त तैनेईं तैसेरी महिमा ते तैना दूई मड़द भी लाहे, ज़ैना तैस सेइं साथी खड़े थिये। 33 ज़ैखन तैना तैस करां च़ले, त पतरसे यीशु सेइं ज़ोवं, "हे गुरू, इश्शू इड़ी रानू रोड़ूए, कि असां ट्लाई डेरे बनाम, अक तेरे लेई, ते अक मूसेरे लेई, ते एलिय्याहेरे लेई।" तैस पतो न थियो, कि तै कुन लगोरो ज़ोने। 34 तै इन ज़ोई राओरो थियो, तैन पुड़ बिदलार घिरी जेई, ते ज़ैखन तैन केरे च़ेवरे पासन बिदलारी घिरी त तैना डेरि जे। 35 तैखन तैस बिदलारी मरां अक आवाज़ अई, "एन मेरू ट्लारू मट्ठू आहे। ध्याने सेइं एसेरी गल शुना!" 36 ते तैस आवाज़ी सेइं साथी तैनेईं यीशु अकैल्‍लो लाव, ते तैना च़ुप राए ते ज़ैन किछ लाहेरू थियूं, तैन केन्ची सेइं न ज़ोवं।

37 होरसां एरू भोवं कि ज़ैखन तैना पहाड़े पुड़ेरां उन्ढे एवरे थिये, त बड़े मैन्हु केरि भीड़ तैन कां आई। 38 ते हेरा, एक्‍की मैन्हे तैन लोकन मरां बड़े ज़ोरे सेइं हक देइतां ज़ोवं, "हे गुरू अवं तीं कां ज़ोवले हथ केरतां कि मेरे मट्ठे पुड़ दया केर; तैन मेरू अक्‍के मट्ठूए। 39 ते हेर, अक भूत तैस अपने कब्ज़े मां केरते, ते तैन अकदम चिन्डां मारते, ते कम्बने लगते, ते तैसेरे ऐशेरां शैम्फ निसचे, ते भूत तैस बड़े बुरे तरीके सेइं ज़खमी केरतां शारते। 40 ते मीं तेरे चेलन कां बिनती कियोरी थी, कि तैस कढन, पन तैना न केढी सके।" 41 यीशुए जुवाब दित्तो, "हे विश्वास न केरने बालाव ते ढीठ लोकव, अवं केइस तगर तुसन सेइं साथी रेइलो ते तुश्शी झ़ैल्‍लेलो? अपने मट्ठे इड़ी आन।" 42 तै मसां एवरो थियो, त भूते तैन मट्ठू मुरोड़तां शारू, पन यीशुए भूत झ़िड़कतां कढू, ते तैन मट्ठू बज़्झ़ेइतां तैसेरे बाजेरे हवाले कियूं।

43 ते सब लोक परमेशरेरी बेड़ि कुदरती हेरतां हैरान रेइजे, ते ज़ैखन सब लोक तैन कम्मां ज़ैन यीशु केरतो थियो हैरान रहते थिये। त तैनी अपने चेलन सेइं ज़ोवं। 44 "मेरी इन गल्‍लां रोड़ेच़ारे शुना किजोकि मैन्हेरू मट्ठू मैन्हु केरे हवाले भोनेबालूए।" 45 पन यीशुएरी ऐह गल चेलां केरि समझ़ी मां न आई, किजोकि तैन करां ऐह गल छ़पोरी थी। कि तैन न समझ़न, ते चेले एस बारे मां यीशु पुछ़ने करां डरते भी थिये।

46 फिरी चेलन एप्पू मांमेइं बड़ी बेंस भोइ, कि असन मां बड्डो कौन आहे? 47 यीशु तैन केरि दिलेरी गल्‍लां बुझ़तां निकड़ो बच्‍चो आनो ते तै एप्पू कां खड़ू कियो। 48 ते अपने चेलन सेइं ज़ोवं, "ज़ै इस बच्‍चे मेरे नंव्वे सेइं कबूल केरते, तै मीं कबूल केरते, ते ज़ै मीं कबूल केरते, तै मेरे भेज़ने बाले कबूल केरते। किजोकि ज़ै तुसन मां निकड़े करां निकड़ोए तै सेब्भन करां बड्डोए।"

49 तैखन यूहन्ना यीशु सेइं ज़ोवं, "हे गुरू, असेईं अक मैन्हु तेरे नंव्वे सेइं भूतां केरो सैयो कढतो लाव, ते असेईं तैस ठाकू किजोकि तै असन सेइं साथी मिलतां तीं पत्ती न च़ले।" 50 पन यीशुए जुवाब दित्तो, "तैस न ठाका, किजोकि ज़ै तुश्शे खलाफ नईं तै तुश्शो पासे।"

51 ज़ैखन यीशुएरे उबरे नेनेरे दिहाड़े पूरे भोने पुड़ थी त तैनी पक्‍के च़ारे यरूशलेम नगरेरे पासे गानेरो खियाल कियो। 52 ते एप्पू करां अग्री-अग्री किछ बिस्तार देनेबाले लोक भेज़े। ते लोक सामरी लोकां केरे एक्‍की ड्लाव्वें मां जे ताके यीशुएरे एजनेरी ठार तियारी केरन। 53 पन लोकेईं तै एजने न दित्तो, किजोकि तै यरूशलेम नगरे जो च़लोरो थियो। 54 एन हेरतां तैसेरे चेले याकूब ते यूहन्ना ज़ोने लगे, "हे प्रभु, कुन तू चातस, कि अस हुक्म देम, अम्बरेरां अग बखेनतां एन लोकन भस्म केरे?" 55 पन तैनी बेदलोइतां तक्‍कू, ते तैना झ़िड़के (ते ज़ोवं, "तुस न ज़ानथ कि तुस कौस आत्मारे आथ। 56 किजोकि मैन्हेरू मट्ठू लोकां केरे प्राणन नाश केरने लेई नईं बल्के बच़ाने एवरोए)" तैखन तैना होरि ड्लोंव्वेरे पासे च़ले जे।

57 ज़ैखन तैना बत्तां च़लोरे थिये, त केन्चे तैस सेइं ज़ोवं, "तू ज़ैड़ी-ज़ैड़ी भी गालो, अवं तीं पत्ती च़लेलो।" 58 यीशुए तैस सेइं ज़ोवं, "लौई केरि कुढां ते अम्बरेरे च़ुड़ोलू केरे आल्हे भोतन, पन मैन्हेरे मट्ठे यानी मीं कां कोई ठार नईं ज़ैड़ी अवं झ़ुल्‍ली सेखी।" 59 फिरी यीशु एक्‍की होरि जो ज़ोवं, "मीं पत्ती च़ल," पन तैनी मैन्हे ज़ोवं, "हे प्रभु मीं घरे गानेरी अज़ाज़त दे, मेरे बाजेरे मरनेरां बाद अवं तैस देबतां एज्जेलो ते फिरी तीं पत्ती च़लेलो।" 60 यीशुए तैस जो ज़ोवं, "ज़ैना लोक आत्मिक तरीके सेइं मर्रेन तैन अपने मैन्हु मरने बलगने दे, पन तू गा ते परमेशरेरे राज़्ज़ेरे बारे मां लोकन मां प्रचार केर।" 61 एक्‍के होरे भी ज़ोवं, "हे प्रभु अवं तीं पत्ती च़लेलो, पन पेइले मीं भेज़ कि अवं अपने घरेबालन ज़ोईं।" 62 यीशुए तैस सेइं ज़ोवं, "ज़ै कोई हल्‍ली पुड़ हथ रेखतां पत्रोवं फिरतां तकते, तै परमेशरेरे राज़्ज़ेरे काबल नईं।"