1 तैस दिहाड़े यीशु घरेरां निस्सो, ते गलील समुन्दरेरे बन्ने पुड़ गेइतां बिश्शो। 2 तैसेरे च़ेवरे पासन लोकां केरि एत्री भीड़ अकोट्ठी भोइ, ते तै एक्‍की किश्ती मां च़ढ़ो ते बिश्शी जेव, ताके तै सेब्भी लोकन परमेशरेरी गल्‍लां केरि शिक्षा देइ सके, ते सारे लोक बन्ने पुड़ खड़े राए। 3 तैखन तैनी तैन सेइं कहैनी केरे तरीके सेइं बेड़ि गल्‍लां ज़ोई, "एक्सां अक बीज़ बेनेबालो बीज़ बेने जो जेव। 4 बीज़ बेते बार किछ बीज़ बत्तेरे ड्लेखी बिछ़ड़ू त च़ुड़ोलेईं एइतां तैन बीज़ च़ुनू। 5 किछ बीज़ घोड़न बाली ज़मीनी पुड़ बिछ़ड़ू, ज़ैड़ी तैस डुग्घी मित्ती न मैल्हनेरे वजाई सेइं तैन लूशी उग्गू ते बूटो लगो। 6 पन ज़ैखन दिहाड़ो निस्सो, त तै निकड़ो बूटो फुक्‍कोई जेव। ज़ील न छ़डनेरे वजाई सेइं शुक्‍की जेव। 7 ते किछ बीज़ कंटां केरे झ़ैल्‍लन मां बिछ़ड़ू। ज़ैखन तैड़ी बूटो लगो, त कंटां केरे झ़ैल्‍लेईं भी बेडोइतां तै बूटो दबेइ छ़डो। 8 पन ज़ैन रोड़ी ज़मीनी मां बिछ़ड़ू, त तैस फल भी लगो केन्ची शौव गुणा केन्ची शठ गुणा, ते केन्ची ट्लही गुणा। 9 ज़ै कोई समझ़नू चाते, तै ध्याने सेइं शुने ते समझ़े।"

10 चेलेईं यीशु कां एइतां पुछ़ू, "तू लोकन सेइं कहैनी केरे तरीके सेइं गल्‍लां किजो केरतां?" 11 तैने जुवाब दित्तो, "तुसन त सुर्गेरे राज़्ज़ेरे भेदां केरि समझ़ दित्तोरीए" पन होरि लोकन नईं। 12 किजोकि ज़ैस कां परमेशरेरी मर्ज़ी समझ़नेरी इच्छा आए, तैस परमेशर जादे समझ़ देलो। पन ज़ैस कां परमेशरेरी मर्ज़ी समझ़नेरी इच्छा नईं, तैस करां, थोड़ी ज़ेरि समझ़, ज़ै तैस कां आए, तै भी नी गाली। 13 अवं तैन सेइं एल्हेरेलेइ कहैन्न मां गल्‍लां केरतां, कि तैन, तैना बार-बार शुनेले, पन मेरी गल न समझ़ेले। 14 तैन केरे बारे मां यशायाह नेबेरी भविष्यिवाणी पूरी भोतीए,

"तुस कन्नेईं सेइं त शुनेले पन समझ़ेले न, तुस एछ़्छ़न सेइं त लाएले पन पिशैनी न सकेले।"

15 "किजोकि एना लोकां केरे दिलन पुड़ चर्भी भेरोरीए,

ते एना कन्न सेइं उकड़ु शुन्तन, ते एनेईं अपनि एछ़्छ़ी तुमोरिन,

एरू न भोए कि तैना एछ़्छ़ेईं सेइं लहन,

ते कन्नेईं सेइं शुन्न ते दिले सेइं समझ़न,

ते मेरे पासे फिरन ते अवं तैन बज़्झ़ेइं।"

16 "पन तुश्शी एछ़्छ़ी धन आन, कि तुस लहतथ ते तुश्शे कन्न धन आन किजोकि तुस शुन्तन। 17 अवं तुसन सेइं सच़ ज़ोताईं, कि बड़े नेबी ते धेर्मी लोकेईं चाव कि ज़ैन गल्‍लां तुस हेरतथ तैना हेरन, पन न हेरी बेटि, ते ज़ैना गल्‍लां तुस शुन्तन शुन्न, पन न शुनी बेटि।"

18 "हुनी तुस बीज़ बेनेबालेरी कहैनरो मतलब शुना। 19 बीज़ बेनेबालो तै आए, ज़ै परमेशरेरी गल्‍लां लोकन शुनाते। ज़ैना मैन्हु परमेशरेरी गल्‍लां शुन्तन, तैन मरां किछ लोक तैस बत्तेरे ज़ेरे आन, ज़ैड़ी बीज़ बिछ़ड़ते। तैना त परमेशरेरी गल्‍लां शुन्तन, पन शैतान अकदम एइतां तैन मैन्हु केरे दिले मरां परमेशरेरी गल्‍लां केढी छ़डते। 20 ते ज़ैन घोड़न बाली ज़मीनी मां बेवं, एना तैना आन, ज़ैना खुशी सेइं वचन शुन्तन ते कबूल केरतन। 21 पन एप्पू मां ज़ील न रखनेरे वजाई सेइं तैन थोड़े दिहाड़ी केरूए, ते ज़ैखन वचनेरे वजाई सेइं तैन पुड़ मुसीबत या ज़ुलम भोते त तैखने ठोकर खातन। 22 होरे किछ लोक ज़ैना परमेशरेरी गल्‍लां शुन्तन, तैना तैस कंटां केरे झ़ैल्‍लां केरे ज़मीनेरे ज़ेरे आन। पन दुनियारो फिक्र ते दौलतरे वजाई सेइं धोखो खातन, ते तैना बेफल रेइ गाते। 23 ज़ैन रोड़ि ज़मीनी मां बेवं, एन तैना लोकन ज़ैना वचन शुन्तन ते समझ़तन, ते तैस फल भी लगते कोन्ची शौव गुणा कोन्ची शठ गुणा, ते केन्ची ट्लही गुणा।"

24 यीशुए तैन अक होरि मिसाल देइतां ज़ोवं, "सुर्गेरू राज़ तैस मैन्हेरू ज़ेरूए ज़ैनी अपने ऊडारे मां रोड़ू बीज़ बेवं। 25 पन ज़ैखन लोक झ़ुलोरो थिये, त तैसेरे दुश्मने एइतां तैसेरे ऊडारे मां गेहुं केरे बीज़े मांमेइं जंगली बीज़ बेवं। 26 ज़ैखन पट्लां ते शिल्‍लां लगां लग्गने त तै जंगली डाल भी साथी लग्गो। 27 मालिकेरे नौकरेईं एइतां तैस सेइं ज़ोवं, ‘हे मालिक, कुन तीं अपने ऊडारे मां रोड़ू बीज़ न थियूं बेवरू, फिरी जंगली तैस मां कोट्ठां अव?’ 28 तैनी तैन सेइं ज़ोवं, एन केन्ची दुश्मनेरू कम्मे, नौकरेईं पुछ़ू कुन तू चातस, कि अस गेइतां तैन पुट्टी छ़डम? 29 पन तैनी ज़ोवं नन्ना, एरू न भोए कि तैस सेइं साथी तुस गेहुं भी पुटथ। 30 फसल लुन्ने तगर दूईये साथी बेडोने देथ, ते लुनते बार अवं एप्पू लुन्ने बालन सेइं ज़ोइलो, कि पेइले जंगली बीज़ लुन्तां अग्गी मां फुकनेरे लेई अकोट्ठू केरा, ते फिरी तुस गेहुं मेरे कोठारे मां जम्हां केरतां रखा।"

31 तैनी तैन अक होरि मिसाल देइतां ज़ोवं, "सुर्गेरू राज़ शेरीएरे बीज़ेरू ज़ेरू आहे, ज़ैन एक्‍के मैन्हे आनू ते अपने ऊडारे मां बेवं। 32 एन बीज़ सेब्भी बीज़न करां निक्‍कु भोते, पन ज़ैखन तैन बीज़ बेव गाते, त तैन उगतां सारे निक्‍के-निक्‍के बुट्टन केरां बड्डू भोते। ते एरो बुट बनते इड़ी तगर कि अम्बरेरां च़ुड़ोलू भी तैस पुड़ बिशतन।"

33 तैनी तैन अक होरि मिसाल देइतां ज़ोवं, "सुर्गेरू राज़ अम्लटेरू ज़ेरूए, ज़ैन केन्ची कुआन्शां आनू, ते हछे अट्टे मां मलाव ते सारू अट्टू खमीर बेनि ज़ोवं।"

34 एन सैरी गल्‍लां यीशुए तैन लोकन मिसाल देइतां शुनातो थियो, ते मिसाल देनेरे बगैर तै तैन किछ न थियो शुनातो। 35 ताके तैन वचन ज़ैन नेबे ज़ोवरो थियूं पूरू भोए,

"अवं कहैनी केरे लेई अपनि ज़बान खोल्‍लेलो,

ते तैना गल्‍लां ज़ोइलो ज़ैना दुनिया बन्ने करां पेइली छ़ेपोरी थी।"

36 तैखन यीशु लोकन करां अलग भोइतां घरजो अव, ते तैसेरे चेलेईं तैस कां एइतां ज़ोवं, "तू असन उडारेरे जंगली बीज़ेरी कहैनरो मतलब समझ़ा।" 37 तैनी तैन जुवाब दित्तो, "रोड़ू बीज़ बेनेबालो मैन्हेरू मट्ठूए। 38 ऊडार ई दुनियाए, ते रोड़ू बीज़ राज़ हासिल केरनेबाले लोक, ते जंगली बीज़ शैतानेरे लोक आन। 39 ते तै दुश्मन ज़ैनी तैन बेवरू थियूं तै शैताने, लुन्नेरो मतलब इस दुनियारो अन्त भोनोए, ते लुन्ने बाले स्वर्गदूतन। 40 ज़ेन्च़रे जंगली बीज़ेरे गलेव अकोट्ठे केरतां अग्गी मां फुकतन, तेन्च़रे इस दुनियारो अन्त भोनोए। 41 मैन्हेरू मट्ठू अपने स्वर्गदूतन भेज़ेलू, ते तैन केरे राज़्ज़े मां ठोकरारी वजा ते बुरां कम्मां केरनेबालन अकोट्ठे केरेले। 42 ते तैन अग्गरे कुण्डे मां छ़डेले, ज़ैड़ी तैना लोक लेरां देते ते दंत च़ापते राले। 43 तेइस धर्मी लोक अपने बाजी केरे राज़्ज़े मां दिहाड़ेरे ज़ेरे चमकेले। ज़ै कोई समझ़नू चाते, तै ध्याने सेइं शुने ते समझ़े।"

44 "सुर्गेरू राज़ तैस दौलतरू ज़ेरूए, ज़ै एक्‍की ऊडारे मां दब्बोरी थी, ज़ै एक्‍की मैन्हे तोप्पी, ते तैस मैल्ही भी, ते फिरी तैने छ़ुपेइतां छ़डी ते खुशी सेइं अपनु सब किछ बेच़तां तैन ऊडार घिन्नू।

45 "सुर्गेरू राज़ तैस बुपैरेरू ज़ेरूए, ज़ै कीमती मोती तोपतो थियो। 46 ज़ैखन तैस अक कीमती मोती मैल्हो, त तैनी अपनु सब किछ बेच़तां तै मोती घिन्नो।

47 "सुर्गेरू राज़ तैस मेछ़ली केरे ज़ालेरू ज़ेरूए, ज़ैन समुन्दरे मां छ़डू ते तैस मां हर किसमेरी मेछ़ली लेग्गी। 48 ते ज़ैखन ज़ाल भेरोई जेवं त झिरेइं ज़ाल खिचतां कनारे पुड़ आनू, ते बिशतां रोड़ी-रोड़ी मेछ़ली टोकरन मां रेखी ते बुरी-बुरी मेछ़ली शैरी छ़ेडी। 49 दुनियारे अन्ते मां भी एरू भोनूए, स्वर्गदूतेईं एइतां दुष्ट लोक, धेर्मी लोकन करां अलग केरनेन। 50 ते तैना अग्गरी भेट्ठी मां छ़डनेन तैड़ी लेरां ते दंत च़ापने भोल्हे।

51 "कुन तुसेईं एन सैरी गल्‍लां सेमझ़ी?" तैनेईं ज़ोवं, "हाँ" असेईं सेमझ़ी। 52 फिरी यीशुए तैन सेइं ज़ोवं, "हर अक शास्त्री ज़ै सुर्गेरे राज़्ज़ेरो चेलो बनोरोए एक्‍की एरे मुकान मालिकेरो ज़ेरोहे, ज़ै अपने खज़ाने मरां नव्वीं ते पुरैनी चीज़ां कढते।"

53 ज़ैखन यीशुए एना सब कहैनी शुनेई त तै तैट्ठां अग्रोवं च़लो जेव। 54 ते अपने नगर मां एइतां तैट्ठेरे प्राथना घरे मां गेइतां शिक्षा देने लगो, ते लोक तैसेरी शिक्षा शुन्तां हैरान भोए ते ज़ोने लग्गे: "ए अक्ल समझ़ ते एना चमत्कार एस कोट्ठां हासिल भोए। 55 एन त तैस ट्लखानेरू मट्ठू आए ते एसेरे अम्मरू नवं मरियम ते एसेरे ढ्लां केरू नवं याकूब, यूसुफ, शमौन ते कने यहूदा आन, 56 ते एसेरी सब बेइनां इश्शे इड़ी रेइचन, फिरी एसमां ई काबलीत कोट्ठां आई?"

57 एन्च़रे तैन लोकेईं इन्कार कियो। पन यीशुए तैन सेइं ज़ोवं, "नबी अपने नगर मां ते अपने घरेरे अलावा होरि कोन्ची ठारी बेइज़्ज़त न भोए।" 58 ते तैने तैड़ी तैन केरे विश्वास न केरनेरे वजाई सेइं जादे चमत्कार न हिराए।