1 शेइ दिहाड़ना बाद, यीशु अपने चेले पतरस, याकूब त तैसेरे ढ्ला यूहन्ना सेइं साथी एक्‍की पहाड़े पुड़ जेव, ज़ैड़ी कोई भी न थियो। 2 तैड़ी तैन केरे सामने तैसेरी शकल बेदलोई जेई, तैसेरू तुत्तर दिहाड़ेरू ज़ेरू चमकने लगू ते तैसेरां लिगड़ां लौअरां ज़ेरां छ़ित्तां भोआं। 3 तैखन तैनेईं मूसा ते एलिय्याह नबी यीशु सेइं गल्‍लां केरते लाए।

4 पतरसे यीशु सेइं ज़ोवं, "हे प्रभु इश्शू इड़ी रानू रोड़ूए, अगर तू चातस त अस ट्लाई डेरे बनाम, अक तेरे लेई ते अक मूसेरे लेई ते अक एलिय्याहेरे लेई।" 5 तै ऐह गल ज़ोई राहोरो थियो, अक बड़ी चमकती बिदलार तैन पुड़ एइतां रुकी, ते तैस बिदलारी मरां ई आवाज़ आई, "एन मेरू ट्लारू मट्ठूए, ज़ैस पुड़ अवं खुश आईं, एसेरी शुना।" 6 चेले एन शुन्तां तुत्तरेरे भारे बिछ़ड़े ते बड़े डेरि जे। 7 पन यीशुए एइतां तैन सेइं हथ लाव, ते ज़ोवं, "उठा, डरा नन्ना।" 8 ज़ैखन तैनेईं च़ेवरे पासन तक्‍कू, त यीशुएरे अलावा होरो कोई न लाव।

9 ज़ैखन तैना तैस पहाड़े पुड़ेरां उन्ढे एवरे थिये, त यीशुए तैन ई हुक्म दित्तो, ज़ैन किछ तुसेईं लाहेरूए, "ज़ांतगर मैन्हेरू मट्ठू मुड़दन मरां ज़ींतू न भोए तांतगर केन्ची सेइं न ज़ोइयथ।" 10 तैसेरे चेलेईं तैस पुछ़ू, "शास्त्री किजो ज़ोतन कि मसीहेरे एजनेरां पेइले, एलिय्याह नेबेरू दुनियाई मां एजनू ज़रूरी आए?" 11 तैनी जुवाब दित्तो, "एलिय्याह ज़रूर एज्जेलो ते सब किछ बहाल केरेलो। 12 पन अवं तुसन सेइं ज़ोताईं कि ‘एलिय्याह’ त पेइले एवरोए, पन लोकेईं तै न पिशानो, पन ज़ैन चाऊ तैस सेइं तैन्ने कियूं, एन्च़रे मैन्हेरू मट्ठू भी तैन केरे हथ्थन सेइं दुख भोगेलू।" 13 तैखन चेलेईं बुझ़ू कि असन सेइं यूहन्ना बपतिस्मो देनेबालेरे बारे मां ज़ोने लगोरोए।

14 ज़ैखन तैना हछे मैन्हु केरि बड़ी भीड़ी कां पुज़े, त अक मैन्हु तैस कां अव, ते ज़ैधू केरे भारे बिशतां ज़ोने लगो। 15 "हे प्रभु मेरे मट्ठे पुड़ दया केर, तैस मिरगरी वजाई सेइं दौवरे एइतन, ते तैस बड़ो दुखे, ते बार-बार अग्गी मां ते बार-बार पैनी मांजो खिरकते। 16 मीं तैन तेरे चेलन कां आनोरू थियूं, पन तैनेईं तैन ठीक न केरि बटु।" 17 यीशुए ज़ोवं, "हे विश्वास न केरनेबाले ते ढीठ लोकव, अवं केइस तगर तुसन सेइं साथी भोनोईं, केइस तगर तुश्शी झ़ैलतो रेइलो? तैस मीं कां आनां।" 18 तैखन यीशुए तैन भूत झ़िड़कू, ते तैस पुड़ां सैयो निस्सी जेव, ते तैन मट्ठू तैखने ठीक भोइ ज़ोवं।

19 तैखन चेलेईं अकैल्‍ले ज़ेरे यीशु कां गेइतां पुछ़ू, "अस तैस मट्ठे मरां भूतेरो सायो की न केढी सके?" 20 तैनी तैन सेइं ज़ोवं, "अपने घट विश्वासेरे वजाई सेइं, अवं तुसन सेइं सच़ ज़ोताईं, अगर तुश्शो विश्वास शेरीएरे गलेवे ज़ेत्रो भी भोए, त तुस उस पहाड़े जो ज़ोले कि, ‘इट्ठां निस्तां उड़ी गा,’ त तैन गालू, ते तुश्शे लेई कोई भी गल असुखती न भोल्ही। 21 पन इस किसमेरां भूतां प्राथना ते बरते बगैर न निस्सन।"

22 ज़ैखन तैना गलीले मां थी, त यीशुए तैन सेइं ज़ोवं, "मैन्हेरू मट्ठू भी मैन्हु केरे हवाले कियूं गालू। 23 तैना तैस मारेले, ते तैन ट्लेइयोवं दिहाड़े फिरी ज़ींतो भोल्हु।" चेले एन शुन्तां बड़े परेशान भोए।

24 ज़ैखन तैना कफरनहूम नगरे मां पुज़्ज़े, त प्राथना घरेरे लेई चुंगी घिन्ने बाले पतरसे कां एइतां पुछ़ू, "कुन तुश्शो गुरू प्राथना घरेरी चुंगी न दे?" 25 तैनी जुवाब दित्तो, "हाँ देते।" ज़ैखन पतरस घरे मां पुज़ो त यीशुए तैसेरे पुछ़नेरे पेइले तैस सेइं ज़ोवं, "हे शमौन तू कुन समझ़तस? दुनियारे राज़े कोन लोकन करां चुंगी घिन्तन अपने बच्‍चन करां या होरि लोकन करां?" 26 पतरसे तैस सेइं ज़ोवं, "होरन करां।" यीशुए तैस सेइं ज़ोवं, "त मट्ठां बरी भोइ जेआं। 27 फिरी भी एल्हेरेलेइ कि अस तैन ठोकर न देम, तू समुन्दरे पुड़ गेइतां कंटो लेइतां मेछ़ली ट्लेइयां, ते ज़ै मछ़ली पेइली लग्गेली, तैसारू आशी खोल्‍लां, ते तीं अक सिक्‍को मैलनोए, ते तै सिक्‍को नेइतां मेरी ते अपनि चुंगी देइयां।"