यूसुफ त तैसेरू टब्बर मिस्र मुल्खे मरां वापस एइते।
19 हेरोदेसेरी मौतरां पत्ती, ज़ैखन यूसुफ मिस्र मुल्खे मां थियो, त अचानक प्रभुएरो स्वर्गदूत तैस सुपने मां लेइहोव ते तैस सेइं ज़ोने लगो, 20 "उठ, बच्चो ते कने तैसेरी अम्मा साथी नेइतां इस्राएल मुल्खे जो वापस च़लो गा, किजोकि ज़ैना लोक बच्चे मारने चाते थिये, तैना मेरि जेवरेन।" 21 फिरी यूसुफ निड्लारां बींझ़ो, ते बच्चो ते तैसेरी अम्मा साथी एन्हतां इस्राएल मुल्खे जो वापस अव। 22 पन ज़ैखन यूसुफे एन शुनू कि अरखिलाउस अपने बाजी हेरोदेसेरी ठैरी यहूदिया इलाके पुड़ राज़ केरने लग्गोरो, त तै तैड़ी गाने करां डरो। एल्हेरेलेइ ज़ैखन यूसुफे सुपने मां परमेशरेरो बिस्तार मैल्हो, त तै गलील इलाके जो च़लो जेव। 23 ते तैड़ी पुज़तां तै नासरत नंव्वेरे नगरे मां राने लगो, ताके तैन वचन पूरू भोए, ज़ैन परमेशरे अपने नेबी केरे ज़िरिये ज़ोवरू थियूं। तैनेईं ज़ोवं, "तैस जो नासरी ज़ोले।"