यीशु अपने चेलन ते होरि लोकन ज़ोते शास्त्री ते फरीसी लोकन करां खबरदार राथ।
1 तैखन यीशुए बड़े लोकन सेइं ते अपने चेलन सेइं एन ज़ोवं। 2 "शास्त्री ते फरीसी लोक मूसेरो कानून समझ़ाने बालेन। 3 एल्हेरेलेइ ज़ैन किछ तैना तुसन ज़ोतन तैन तुस केरा ते मन्ना, पन तैन केरां ज़ेरां कम्मां न केरा, किजोकि तैना ज़ोने त ज़ोतन पन केरन नन्ना। 4 तैना अपने मेर्ज़ी सेइं कानून बनातन ज़ैना लोकां केरे लेई मन्ने मुश्किल भोतन, पन एप्पू अपने कानूने मन्नेरी कोशिश भी न केरन। 5 तैना ज़ैन किछ केरतन सिर्फ मैन्हन हिरानेरे लेई केरतन, तैना अपने कुपाए ते पैखड़न पुड़ पवित्रशास्त्रेरे वचन लिखतां बड्डे-बड्डे जन्त्रां केरे ज़ेरे बन्धतन, ते अपने चोगन पुड़ लम्मो गुच्छे लातन (ताके लोक समझ़न तैना बड़े धर्मी आन)। 6 तैना धामन मां खास ठैरी बिशनू चातन, ते प्राथना घरे मां खास कुर्सन पुड़ बिशनू चातन। 7 ते तैना चातन कि लोक तैन्न जो बज़ारन मां नमस्कार ज़ोन, ते तैन्न जो गुरू ज़ोन।