Oséias 11

इस्राएलेरे लेई परमेशरेरो प्यार

1 यहोवा ज़ोते, "ज़ैखन इस्राएल बच्‍चो थियो, तैखन मीं तैस सेइं प्यार कियो, ते अपनु मट्ठू मीं मिस्र मुल्खे मरां कुजव।✝11:1 मत. 2:15. 2 पन ज़ेत्रो अवं तैन कुजातो थियो, तैना तेत्रे दूर नशते थिये; तैना बाल देबतेरे लेई बलिदाना च़ाढ़ते, ते घड़ाई कियोरी मूरती केरे लेई गुग्गल बालते जे।

3 "मीं एप्रैमे*11:3 एप्रैमे मतलब इस्राएली लोक च़लनू शिखालोरू थियूं, ते तैस कुम्मे मां छ़ुइतां फिरातो थियो, पन तैना लोक न थिये ज़ानते कि अवं तैन केरो बझ़ाने बालोईं। 4 अवं तैन्न इन्सान सेमझ़तां प्यारेरी डोरी सेइं खिचतो थियो, ते ज़ेन्च़रे कोई दांतेरे मेट्टू पुड़ जुऊं खोलतां तैसेरे सामने खानेरे लेई रख्खू, तेन्च़रे मीं तैन सेइं कियूं।

5 "तै मिस्र मुल्खे मां वापस न गेइ सकेलो; अश्शूर ही तैसेरो राज़ो भोल्हो, किजोकि तैनी मेरे पासे फिरने करां इन्कार कियोरोए। 6 तलवार तैन केरे नगरन मां च़लेली, ते तैन केरे नगरां केरे फाटकन पूरे तरीके सेइं नाश केरेली; ते इन तैन योजना केरि वजाई सेइं भोल्हु। 7 मेरे लोक मीं करां दूर भोने मां लगोरे रहतन; अगर तैना तैन परमप्रधान परमेशरेरे पासे कुजातन, फिरी भी तैन मरां कोई मेरी महिमा न केरे। 8 हे एप्रैम, अवं तीं किजो शैरी? हे इस्राएल, अवं केन्च़रे तीं दुश्मनेरे हवाले केरीं? अवं केन्च़रे तीं अदमा नगरेरो ज़ेरो शैरी, ते सबोयीम नगरेरो ज़ेरो केरी? मेरो मन दयाई सेइं भेरि जेवरोए। 9 अवं अपने क्रोधे भड़कने न देइलो, ते न अवं फिरी एप्रैमे नाश केरेलो; किजोकि अवं इन्सान नईं परमेशर आईं, अवं तेरे दरमियान रानेबालो पवित्र परमेशर आईं; अवं क्रोध केरतां न एज्जेलो। 10 तैना यहोवा पत्पती च़लेले; तै त शेरेरो ज़ेरो गरज़ेलो। ते तेरां मट्ठां पश्चिम पासेरां थरकतां एज्जेलां। 11 तैना मिस्र मुल्खे मरां च़ुड़ोलू केरे ज़ेरे, ते अश्शूर मुल्खे मरां कबूतरां केरे ज़ेरे थरकते एज्जेले; ते अवं तैन तैन्ना केरे घरन मां बसेइलो, यहोवा एन ज़ोते। 12 यहोवा ज़ोते, एप्रैमे झूठे सेइं ते इस्राएली लोकेईं अवं धोखे सेइं घेरतां रखोरोइं; ते यहूदा हुना तगर पवित्र ते वफादार परमेशरेरे पासे सच़्च़ो बनोरो रहते।"