1 (किछ लोक पुछ़तन) यहूदी केरि कुन बडीयाई, या खतनेरो कुन फैइदो? 2 हर किसमे सेइं बड़ू किछ। पेइलू त इन कि सारू परमेशरेरू वचन तैन सौंफू। 3 अगर किछ यहूदी परमेशरे कां ईमानदार न निस्से त कुन भोवं? कुन तैन केरे ईमानदार न राने सेइं परमेशर तैन केरे लेई अपने वाधे पूरे केरने मां झूठो भोव? 4 नईं, कधे नईं! बल्के परमेशर हमेशा सच़ ज़ोते, ते हर अक मैन्हु झूठो भोव, ज़ेन्च़रे पवित्रशास्त्रे मां परमेशरेरे बारे मां लिखेरूए,

"ज़ैस सेइं तू एपनी गल्‍लन मां धर्मी भोस,

ते न्यायेरे वक्ते तीं ज़ींत मैल्हे।"

5 अगर इश्शां बुरां कम्मां परमेशरेरी धार्मिकता ठहराते, त अस कुन ज़ोम? कुन इन कि परमेशर क्रोध केरते ते असन सज़ाह देते। (इन अवं इन्सानेरी रीति पुड़ ज़ोताईं)। 6 नईं, कधे नईं! अगर परमेशर इश्शो यहूदी केरो न्याय रोड़े च़ारे न केरेलो, त तै किजो दुनियारो न्याय केरेलो?

7 किछ ज़ोतन, अगर मेरे झूठेरे वजाई सेइं परमेशरेरी सच़्च़ाई बांदी भोतीए ते तैसेरी महिमा भोतीए, त फिरी किजो पैपी केरो ज़ेरो मीं पुड़ हुक्म दित्तो गाते? 8 "एज्जा, अस बुराई केरम, कि इस सेइं भलियाई पैदा भोए?" पन असन पुड़ दोष भी लव गाते, ते केत्रे ज़ोतन, कि एन केरू भी एने ज़ोनू आहे। पन एरे ज़ेरेन पुड़ दोष लानो ठीक आहे।

9 त फिरी अस कुन ज़ोम? कुन अस यहूदी होरन करां रोड़ेम? नईं, कधी नईं; किजोकि असेईं यहूदी लोकन पुड़ ते गैर यहूदी लोकन पुड़ ई दोष लेवरोए, कि तैना सारे पापेरे कब्ज़े मां आन। 10 ज़ेन्च़रे पवित्रशास्त्रे मां लिखेरूए,

"कोई परमेशरेरे सामने धर्मी नईं, अक भी नईं।

11 कोई सच़्च़े समझ़दार नईं,

कोई परमेशरे तोपनेबालो नईं।

12 सारे परमेशरे करां दूर भोवरेन, सारे निकम्मे बनोरेन,

कोई भलियाई केरनेबालो नईं, अक भी नईं।

13 तैन केरू गल खुल्‍ली कब्रे,

तैनेईं अपने ऐशी सेइं धोखो दित्तो,

तैन केरे ओठन पुड़ सप्पां केरू ज़ेरहे।

14 ते तैन केरू भाषण लानती, ते ट्लिठे सेइं भेरतांए।

15 तैन केरे पव खून केरने लेई तेज़न।

16 तैना ज़ेरहां भी गातन तुबाही ते क्लेश तैन पत्ती गाते।

17 तैन न ज़ानन शैन्ति सेइं केन्च़रां ज़ीतन।

18 तैन मां परमेशरेरो डर बिलकुल भी नईं।"

19 अस ज़ानतम, कि मूसेरो कानून ज़ैन किछ ज़ोते, तैन्ने सेइं ज़ोते, ज़ैना तैस मनतन, एल्हेरेलेइ कि केन्ची कां कोई बहानो न भोए, ते सारी दुनिया परमेशरेरे सज़ाहरे लैईक भोए। 20 किजोकि मूसेरे कानूनेरे मुताबिक कम्मां केरने सेइं कोई मैन्हु परमेशरेरे सामने धर्मी नईं भोनो, एल्हेरेलेइ कि मूसेरे कानूने सेइं पिशान भोतीए कि अस पापी आम।

21 पन हुनी बगैर मूसेरो कानून मन्ने सेइं तै धार्मिकता बांदी भोवरीए ज़ै परमेशरेरे तरफां एइतीए, ज़ेसेरे बारे मां मूसेरे कानूने ते नेबी केरि किबातन मां लिखेरूए। 22 मतलब परमेशरेरी तै धार्मिकता ज़ै यीशु मसीह पुड़ विश्वास केरनेबालां केरे लेइए; किजोकि तैन मां किछ भेद भाव नईं। 23 एल्हेरेलेइ कि सेब्भेईं पाप कियो, ते तैस महिमा करां दूर आन ज़ै परमेशर देते। 24 पन परमेशरे अपने अनुग्रहे सेइं अस पापां केरि सज़ाही करां यीशु मसीहेरे ज़िरिये छुटाए ते मुफ्ते मां धर्मी ठहराए। 25 परमेशरे मसीहेरे खूनेरे वजाई सेइं अक एरो छुटकारो ठहराव, ज़ै विश्वास केरने सेइं फैइदामन्द भोते, कि ज़ैना पाप पेइले केरे, ते ज़ैना परमेशरे अपने बर्दाशती सेइं टाले; तैन केरे बारे मां तै अपनि धार्मिकता बांदी केरते। 26 बल्के इस्से वक्ते तैसेरी धार्मिकता बांदी भोए; कि ज़ैस सेइं तै एप्पू धर्मी ठहरे, ते ज़ै यीशु पुड़ विश्वास केरे, तैसेरो धर्मी ठहराने बालो भोए।

27 ते घमण्ड केरनू कोड़ि राव? तैसेरी त ठारे नईं। कोस कानूनेरे वजाई सेइं? कुन मूसेरो कानून मन्ने सेइं? नईं, बल्के विश्वासेरे वजाई सेइं। 28 एल्हेरेलेइ अस ज़ानतम, कि मैन्हु मूसेरो कानूनेरे मुताबिक कम्मां केरनेरे बगैर यीशु मसीह पुड़ विश्वास केरने सेइं धर्मी भोते। 29 कुन परमेशर सिर्फ यहूदी केरोए? कुन गैर कौमां केरो नईं? हाँ गैर कौमां केरो भी आहे। 30 किजोकि अक्‍के परमेशरे, ज़ै खतने बालन भी विश्वासे सेइं, ते ज़ैन केरो खतनो नईं भोवरो तैन भी विश्वासे सेइं धर्मी ठहरालो। 31 ते कुन अस विश्वासे सेइं मूसेरे कानूने रद केरतम? नईं, कधे नईं; बल्के मूसेरे कानूने बनोरू रखतम।