जकर्याह 1

मन फिरानेरी पुकार

1 फारस मुल्खेरे दारा राज़ेरी हुकूमतरे दूइयोवं सालेरे अठोवं महीने मां जकर्याह नेबी सेइं ज़ैन बेरेक्याहेरू मट्ठू ते इद्दोएरू पोट्लड़ू थियूं यहोवा इन ज़ोवं,✝1:1 एज. 4:24;5:1. 2 यहोवा तुश्शे लोकां केरे दादे-पड़दादन पुड़ बड़ो क्रोधे भोवरो थियो। 3 एल्हेरेलेइ तू इन लोकन सेइं ज़ो, "सेना केरो यहोवा इन ज़ोते; तुसां मेरे पासे फिरा, सेना केरो यहोवा एन ज़ोते: तैखन अवं तुश्शे पासे फिरेलो, सेना केरो यहोवा एन ज़ोते।✝1:3 याक. 4:8;होश. 6:1. 4 अपने दादे-पड़दादां केरे ज़ेरे न बना, तैन सेइं त पुराने ज़मानेरे नबी ज़ोरे-ज़ोरे सेइं ज़ोते थिये, सेना केरो यहोवा एन ज़ोते; एपनी बुरी बत्ती करां, ते अपने बुरे कम्मन करां फिरी गाथ, पन तैनेईं न त तैन केरू ज़ोनू शुनू, ते न मेरे पासे ध्यान दित्तू, यहोवा एन ज़ोते।✝1:4 यिर्म. 7:24;17:23;29:19. 5 तुश्शे दादे-पड़दादे कोड़ि राए? नबी कुन हमेशा ज़ींते रहतन? 6 पन मेरे वचन ते मेरे हुक्म ज़ैना मीं अपने दास नेबन दित्तोरे थिये, कुन तैना गल्‍लां तुश्शे दादे-पड़दादन पुड़ पूरी नईं भोवरी? तैखन तैनेईं मन फिराव ते ज़ोने लगे, सेना केरो यहोवा इश्शो चाल चलन ते इश्शे कम्मां केरे मुताबिक असन सेइं सलूख केरनेरो इरादो कियोरो थियो, तेरहो तैनी असन बदलो भी दित्तोरोए।"✝1:6 विल. 2:17.

घोड़ां केरू दर्शन

7 दारा राज़ेरी हुकूमतरे दूइयोवं सालेरे शबात नंव्वेरे यारोवं महीनेरे च़ौबियोवं दिहाड़े जकर्याह नबी ज़ैन बेरेक्याहेरू मट्ठू ते इद्दोएरू पोट्लड़ू थियूं, यहोवा तैस सेइं इन ज़ोवं, 8 "मीं राती सुपने मां कुन लावं कि अक मैन्हु लाल घोड़े पुड़ च़ेढ़तां मींधरे बुट्टां केरे मझ़ाटे खड़ो थियो ज़ैना बुनीयें ठारन मां आन, ते तैस पत्पती लाल ते तोसे ते छ़ित्ते घोड़े भी खड़ेन।✝1:8 प्रका. 6:4. 9 तैखन मीं पुछ़ू, ‘हे मेरे प्रभु एना कौन आन?’ तैखन ज़ै दूत मीं सेइं गल्‍लां लगोरो थियो केरने, तैनी मीं जुवाब दित्तो, ‘अवं तीं हरेइलो कि एना कौन आन।’ 10 फिरी ज़ै मैन्हु मींधरे बुट्टां केरे मझ़ाटे खड़ो थियो, तैनी ज़ोवं, ‘एना तैना आन, ज़ैना यहोवा धेरती पुड़ सैर केरने मतलब घुमनेरे लेई भेज़ोरेन।’ 11 तैखन तैनेईं यहोवारे तैस दूते सेइं ज़ै मैन्हु मींधरे बुट्टां केरे मझ़ाटे खड़ो थियो, ‘असेईं धेरती पुड़ सैर की, ते कुन लावं कि सैरी धेरती पुड़ शान्ति ते चैने।’

यहोवा सिय्योने तसल्‍ली देलो

12 "तैखन यहोवारे दूते प्राथना मां ज़ोवं, ‘हे सेना केरे यहोवा, तू ज़ै यरूशलेम ते यहूदारे नगरन पुड़ 70 सालन करां सेरकोरोस, एल्हेरेलेइ तू तैन पुड़ केइस तगर दया न केरेलो?’ 13 ते यहोवा जुवाबे मां तैस दूते सेइं ज़ै मीं सेइं गल्‍लां लगोरो थियो केरने, रोड़ी-रोड़ी ते शैन्तरी गल्‍लां ज़ोई। 14 तैखन ज़ै दूत मीं सेइं गल्‍लां लगोरो थियो केरने, तैनी मीं सेइं ज़ोवं, ‘तू ज़ोरे-ज़ोरे सेइं ज़ो, कि सेना केरो यहोवा इन ज़ोते, मीं यरूशलेम ते सिय्योनेरे*1:14 यरूशलेम ते सिय्योनेरे यरूशलेम नगरे जो सिय्योन ज़ोवं गाते। लेई बड़ी जलन भोवरीए। 15 ज़ैना गैर कौमां सुखे मां रैतिन, तैन पुड़ क्रोधे आईं; किजोकि मीं त थोड़ो ज़ेरो क्रोध कियोरो थियो, पन तैनेईं मुसीबत बधावरीए। 16 एल्हेरेलेइ यहोवा एन ज़ोते, हुनी अवं दया केरतां यरूशलेमे जो वापस एवरोईं; मेरू भवन तैस मां बनेलू, ते यरूशलेमे पुड़ नापनेरी डोरी छ़डी गाली, सेना केरो यहोवा एन ज़ोते।

शिंगां केरू दर्शन

17 "‘फिरी एन भी ज़ोरे सेइं ज़ो कि सेना केरो यहोवा एन ज़ोते, कि मेरे नगर दुबारां रोड़ी चीज़न सेइं भरपूर भोल्हे, ते यहोवा फिरी सिय्योने शान्ति देलो; ते यरूशलेमे फिरी अपनो बनालो।’"

18 फिरी मीं एछ़्छ़ी खोलतां तक्‍कू ते कुन लावं कि च़ेवर जानबरेरां शिंगन। 19 तैखन ज़ै दूत मीं सेइं गल्‍लां लगोरो थियो केरने, तैस मीं पुछ़ू, "एन कुने?" तैनी मीं जुवाब दित्तो, "एना तैन्ना शिंगन*1:19 शिंगन मतलब गैर इस्राएली लोक। ज़ैनेईं यहूदा ते इस्राएल ते यरूशलेम नगर तितर-बितर कियोरूए।" 20 तैसेरां बाद यहोवा मीं च़ेवर लुहार हिराए। 21 तैखन मीं पुछ़ू, "एना कुन केरने एवरेन?" तैनी जुवाब दित्तो, "एना तैन्ना शिंगन, ज़ैनेईं यहूदा एस तरीके सेइं तितर-बितर केरतां छ़डोरोए कि कोई क्रोड़ी खड़ी केरतां न च़ेलि बटे; पन एना लोक तैन निशान्नेरे लेई ते तैन कौमां केरां शिंगां कटनेरे लेई एवरेन, ज़ैनेईं यहूदा प्रदेश तितर-बितर केरनेरे लेई तैन केरे खलाफ अपना-अपना शिंगां खड़ां कियोरां थियां।"